୧୯ ମାଛ ୧୮.୬୫ ଲକ୍ଷ

ପାରାଦୀପ,୨୩ା୬(ସ୍ବ.ପ୍ର.): ପାରାଦୀପ ନିକଟ ସମୁଦ୍ରରୁ ମଙ୍ଗଳବାର ୧୯ଟି ତେଲିଆ ବୋରେଇ ମାଛ ମିଳିଛି। ସେଗୁଡିକ ମଧ୍ୟରେ ୪ଟି ମାଛ ୩୦ କିଲୋ ଓଜନର ହୋଇଥିବା ବେଳେ ବାକିଗୁଡ଼ିକର ଓଜନ ୨୦ରୁ ୨୨ କିଲୋମଧ୍ୟରେ ରହିଛି। ନୂଆବଜାର ନୋଳିଆ ବସ୍ତିର ଦଙ୍ଗଲ ରାଜୁ ଡଙ୍ଗାରେ ମାଛ ଧରିବାକୁ ଯାଇଥିବାବେଳେ ଏସବୁ ମାଛ ଧରିଛନ୍ତି। ଖୋଲା ବଜାରରେ ମାଛଗୁଡ଼ିକୁ ୧୮.୬୫ ଲକ୍ଷ ଟଙ୍କାରେ ସେ ବିକ୍ରି କରିଛନ୍ତିି। ଅଠରବାଙ୍କି ବାଲିପ୍ଲଟ୍‌ ବଜାରରେ ଏହି ମାଛଗୁଡ଼ିକୁ ନିଲାମ କରାଯାଇଥିଲା। କୋଲକାତାର ଜଣେ ବ୍ୟବସାୟୀ ଉପରୋକ୍ତ ମୂଲ୍ୟରେ ମାଛଗୁଡ଼ିକୁ କିଣିଥିଲେ। ଜୁନ୍‌ ୧୪ରେ ସୁବା ରାଓ ନାମକ ଜଣେ ଡଙ୍ଗା ମାଲିକ କେତେକ ତେଲିଆବୋରେଇ ମାଛକୁ ୮ ଲକ୍ଷ ଟଙ୍କାରେ ବିକ୍ରି କରିଥିଲେ। ଏହି ମାଛରୁ ଅନେକ ଔଷଧୀୟ ସାମଗ୍ରୀ ତିଆରି ହୋଇଥାଏ। ଏଥିଯୋଗୁ ଅନ୍ତର୍ଜାତୀୟ ବଜାରରେ ଏହାର ମୂଲ୍ୟ ବହୁତ ଅଧିକ ଥାଏ ବୋଲି ସାମୁଦ୍ରିକ ମତ୍ସ୍ୟ ଅଧିକାରୀ ମନୋରଞ୍ଜନ ମହାପାତ୍ର କହିଛନ୍ତି। ସେ କହିଛନ୍ତି, ବିଶେଷକରି ଏହି ମାଛର ପୁଟିର ଚାହିଦା ଅଧିକ ଥାଏ। ତେଲିଆ ବୋରେଇ ଗଭୀର ସମୁଦ୍ରରେ ରହିଥାନ୍ତି। ବର୍ଷାବେଳେ ସେମାନେ ଦଳ ହୋଇ କୂଳକୁ ଆସିଥାନ୍ତି। ଏବେ ଲଗାଣ ବର୍ଷା ହେଉଥିବାରୁ ଏହି ମାଛ ଧରି ହେଉଛି ବୋଲି ମହାପାତ୍ର କହିଛନ୍ତି।