କୃଷି ଯନ୍ତ୍ରପାତି ବିକ୍ରି ଆଳରେ ୩.୫କୋଟି ରିହାତି ହଡ଼ପ

ବରଗଡ଼ ଅଫିସ୍‌,୨୩।୬: କୃଷି ଯନ୍ତ୍ରପାତି ବିକ୍ରି ଆଳରେ ରିହାତି ତୋଷରପାତ ଭଳି ଏକ ବଡ଼ ଧରଣର ଅନିୟମିତତା କ୍ରାଇମବ୍ରାଞ୍ଚ ଆର୍ଥିକ ଅପରାଧ ଶାଖା ହାତରେ ଲାଗିଛି। ଜାଲିଆତି କରି ସାଢ଼େ ୩ କୋଟି ଟଙ୍କାର ସରକାରୀ ରିହାତି ତୋଷରପାତ କରିଥିବା ଅଭିଯୋଗରେ ମଙ୍ଗଳବାର ସନ୍ଧ୍ୟାରେ କ୍ରାଇମବ୍ରାଞ୍ଚ ଜଣେ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଜଣକ ହେଲେ ବରଗଡ଼ର କମଳଜିତ ସିଂ। ତାଙ୍କ ବିରୋଧରେ ଦଫା ୪୧୯, ୪୨୦, ୪୦୬, ୪୬୭, ୪୬୮, ୪୭୧, ୨୦(ବି) ଆଇପିସି ଏବଂ ଆଇଟି ଆକ୍ଟର ଧାରା ୬୬କ୍ରମେ ଏକ ମାମଲା(ନଂ. ୭/୨୧) ରୁଜୁ ହୋଇଛି। ଅଭିଯୁକ୍ତଙ୍କୁ ବରଗଡ଼ ଏସ୍‌ଡିଜେଏମ କୋର୍ଟକୁ ଚାଲାଣ କରାଯାଇଛି। ଜାମିନ ନାମଞ୍ଜୁର ହେବା ପରେ ତାଙ୍କୁ ବରଗଡ଼ ସବ୍‌ଜେଲ ହାଜତକୁ ପଠାଇ ଦିଆଯାଇଛି ।
ପ୍ରକାଶ ଯେ, ଗିରଫ ଅଭିଯୁକ୍ତ ଏବଂ ତାଙ୍କର ଜଣେ ସମ୍ପର୍କୀୟ ହରପାଲ ସିଂ କେରଳରେ ରହିଥିବା ରେଡ୍‌ଲାଣ୍ଡସ୍‌ ଆସଲିନ୍‌ ମୋଟର୍ସ ନାମକ କୃଷି ଯନ୍ତ୍ରପାତି ନିର୍ମାଣକାରୀ କମ୍ପାନୀ ନାମରେ ଜାଲ୍‌ କାଗଜ ପତ୍ର ଓଡ଼ିଶା ରାଜ୍ୟ କୃଷି ବିଭାଗ ନିକଟରେ ଦାଖଲ କରିଥିଲେ। ପରେ ଡାଇରେକ୍ଟ ବେନିଫିଟ୍‌ ଟ୍ରାନ୍ସଫର(ଡିବିଟି)ରେ କୃଷି ଯନ୍ତ୍ରପାତି ବିକ୍ରିର ରିହାତି ଫାଇଦା ଉଠାଇଥିଲେ। ଏପରିକି ଉପରୋକ୍ତ କମ୍ପାନୀ ଆଦୌ ରାଇସ୍‌ ଟ୍ରାନ୍ସପ୍ଲାଣ୍ଟର ମେଶିନ (କୃଷି ଯନ୍ତ୍ରପାତି) ବିକ୍ରି କରି ନ ଥିଲା। ଅଭିଯୁକ୍ତମାନେ ରାଜ୍ୟ କୃଷି ବିଭାଗକୁ ଜାଲିଆତି ତଥ୍ୟ ଦେଇ ୨୮୧ଟି କୃଷି ଯନ୍ତ୍ରପାତି ବିକ୍ରି କରିଥିବା ଦର୍ଶାଇ ଡିବିଟି ମାଧ୍ୟମରେ ସାଢ଼େ ୩ କୋଟି ଟଙ୍କାର ସରକାରୀ ରିହାତି ଉଠାଇ ନେଇ ଠକେଇ କରିଥିଲେ।
ସେଭଳି ଠକେଇ ତଥା ଜାଲିଆତି ନେଇ ଉପରୋକ୍ତ କମ୍ପାନୀ ସୂଚନା ପାଇବା ପରେ କମ୍ପାନୀର ମ୍ୟାନେଜର(ଜନସମ୍ପର୍କ) ରିଗିନ ବେନେଟ୍‌ କ୍ରାଇମବ୍ରାଞ୍ଚ ଅପରାଧ ଶାଖା, ଭୁବନେଶ୍ୱରରେ ଏତଲା ଦେଇଥିଲେ। ଏତଲାକୁ ଭିତ୍ତି କରି କ୍ରାଇମବ୍ରାଞ୍ଚ ଖୋଳତାଡ଼ ଆରମ୍ଭ କରିଥିଲା।