ବୃଦ୍ଧଙ୍କ ଘରୁ ମିଳିଲା ୩,୭୮୭ ଖଣ୍ଡ ମଣିଷ ହାଡ଼

ମେକ୍ସିକୋ ସିଟି,୨୫।୬: ମେକ୍ସିକୋ ସହର ବାହାର ଅଞ୍ଚଳରେ ଏକ ସନ୍ଦିଗ୍ଧ ହତ୍ୟାକାରୀଙ୍କ ଘର ଚଟାଣ ଖୋଳା ହେବାରୁ ମିଳିଛି ୩,୭୮୭ ଖଣ୍ଡ ହାଡ଼। ଏହା ୧୭ ଜଣ ଲୋକଙ୍କ ହାଡ଼ ବୋଲି ଆକଳନ କରୁଛନ୍ତି ଯାଞ୍ଚକର୍ତ୍ତା। ମେ’ ୧୭ରୁ ଚାଲିଥିବା ଖୋଳା କାର୍ଯ୍ୟ ଏପର୍ଯ୍ୟନ୍ତ ଶେଷ ହୋଇନାହିଁ। ଅଳିଆ ଆବର୍ଜନାରେ ଭର୍ତ୍ତି ହୋଇଥିବା ଘରେ ଅନେକ ଲୋକଙ୍କ ପରିଚୟ ପତ୍ର ମିଳିଛି, ଯେଉଁମାନେ ଦୀର୍ଘ ବର୍ଷ ହେଲା ନିଖୋଜ ଅଛନ୍ତି। ଏତେ ସଂଖ୍ୟାରେ ହାଡ଼ ମିଳିବା ସ୍ପଷ୍ଟ କରୁଛି ଯେ, ହତ୍ୟାକାରୀ ଏହି ଘରେ ଦୀର୍ଘ ବର୍ଷ ହେଲା ଲୋକଙ୍କୁ ହତ୍ୟା କରି ଆସୁଅଛନ୍ତି।

ଯାଞ୍ଚକର୍ତ୍ତାଙ୍କ ପକ୍ଷରୁ ଶନିବାର କୁହାଯାଇଛି ଯେ, ମିଳିଥିବା ଖଣ୍ଡ ବିଖଣ୍ଡିତ ହାଡ଼କୁ ଖୁବ୍‌ ସତର୍କତା ସହ ସଫା କରାଯାଉଛି। ହାଡ଼ ଶରୀରର କେଉଁ ଅଂଶର ଜାଣିବା ପାଇଁ ଅଧ୍ୟୟନ କରାଯାଉଛି। ଏହି ପ୍ରକ୍ରିୟା ଦ୍ୱାରା ଏପର୍ଯ୍ୟନ୍ତ ୧୭ ଜଣଙ୍କ ହାଡ଼ ମିଳିଛି।

ଦେଶର ଆଇନ ଅନୁଯାୟୀ, ଯାଞ୍ଚକର୍ତ୍ତା ୭୨ ବର୍ଷୀୟ ସଂଦିଗ୍ଧଙ୍କ ପରିଚୟ ସର୍ବସାଧାରଣରେ ଉଲ୍ଲେଖ କରି ନାହାନ୍ତି। ଉକ୍ତ ହତ୍ୟାକାରୀ ବିରୋଧରେ ୩୪ ବର୍ଷୀୟା ମହିଳାଙ୍କ ହତ୍ୟା ମାମଲା ଚାଲିଛି। ଜଣେ ପୋଲିସ ଅଧିକାରୀଙ୍କ ସ୍ତ୍ରୀ ନିଖୋଜ ହେବା ପରେ ଅଭିଯୁକ୍ତ ଧରା ପଡ଼ିଥିଲା। ସଂଦିଗ୍ଧ ବ୍ୟକ୍ତିଙ୍କ ସହ ପୋଲିସ ଅଧିକାରୀଙ୍କ ସ୍ତ୍ରୀ ଆଗରୁ ପରିଚିତ ଥିଲେ। ଘଟଣା ଦିନ ମାର୍କେଟ ଯାଇଥିଲେ ଦୁହେଁ। କିନ୍ତୁ ମହିଳା ଘରକୁ ନ ଫେରିବା ପରେ ପୋଲିସ ଅଧିକାରୀ ସଂଦିଗ୍ଧଙ୍କ ବିରୋଧରେ ଏତଲା ଦେଇଥିଲେ। ମହିଳା ଜଣଙ୍କ ସଂଦିଗ୍ଧଙ୍କ ଘରେ ପଶିବା ପରେ ବାହାରକୁ ବାହାରି ନ ଥିବା ସିସିଟିଭିରେ ଦେଖିବାକୁ ମିଳିଥିଲା। ପୋଲିସ ତଦନ୍ତ ପରେ ସଂଦିଗ୍ଧଙ୍କ ଘରୁ ମିଳିଥିଲା ମହିଳାଙ୍କ ପରିଚୟ ପତ୍ର।