ମହିଳା ଉଦ୍ୟୋଗୀଙ୍କ ପାଇଁ ଋଣ ଉପରେ ୫% ସୁଧ ଛାଡ଼ ହେବ

ଭୁବନେଶ୍ୱର,୨୩ା୬(ବ୍ୟୁରୋ): କୋଭିଡ୍‌-୧୯ ମହାମାରୀରେ ଗୁରୁତର ଭାବେ ପ୍ରଭାବିତ ହୋଇଥିବା ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମ୍‌ଏସ୍‌ଏମ୍‌ଇ) ଉପରୁ ରାଜ୍ୟ ସରକାର ଋଣ ଭାର କମ୍‌ କରିବାକୁ ନିଷ୍ପତ୍ତି ନେଇଛନ୍ତି। ମଙ୍ଗଳବାର ଏମ୍‌ଏସ୍‌ଏମ୍‌ଇ ବିଭାଗ ପକ୍ଷରୁ ଗାଇଡ୍‌ଲାଇନ ଜାରି କରାଯାଇଛି। ଏମରଜେନ୍ସି କ୍ରେଡିଟ୍‌ ଲାଇନ ଗ୍ୟାରେଣ୍ଟି ସ୍କିମ୍‌ ଜରିଆରେ ରାଜ୍ୟ ସରକାର ମହିଳା ଏମ୍‌ଏସ୍‌ଏମ୍‌ଇ ଉଦ୍ୟୋଗୀଙ୍କ ପାଇଁ ୫ ପ୍ରତିଶତ ଏବଂ ପୁରୁଷ ଉଦ୍ୟୋଗୀଙ୍କ ପାଇଁ ୨ ପ୍ରତିଶତ ଋଣ ଉପରୁ ସୁଧ ଛାଡ଼ କରିବେ। ନିର୍ଦ୍ଧାରିତ ସମୟରେ ଋଣ ପଇଠ କଲେ ଏହି ସୁବିଧା ମିଳିପାରିବ। ୨୦୨୦-୨୧ ଆର୍ଥିକବର୍ଷ ପାଇଁ ଏହି ସୁବିଧା ପ୍ରଦାନ କରାଯିବ। ସରକାରଙ୍କ ନିର୍ଦ୍ଦେଶ ପରେ ଏହାକୁ ଚଳିତ ଆର୍ଥିକ ବର୍ଷ ପାଇଁ ମଧ୍ୟ ବୃଦ୍ଧି କରାଯିବା ନେଇ ଗାଇଡ୍‌ଲାଇନରେ ଉଲ୍ଲେଖ କରାଯାଇଛି। ଯେଉଁ ଏମ୍‌ଏସ୍‌ଏମ୍‌ଇଗୁଡ଼ିକ ନିଜର ଉତ୍ପାଦନ ଜାରି ରଖିଥିବେ ସେମାନଙ୍କୁ ଏହାର ଫାଇଦା ମିଳିପାରିବ। ଏହାଛଡ଼ା କରୋନା ମହାମାରୀ, ପ୍ରାକୃତିକ ବିପର୍ଯ୍ୟୟ, ବିଦ୍ୟୁତ୍‌ଜନିତ ସମସ୍ୟା କିମ୍ବା ଶ୍ରମିକ ସମସ୍ୟା ଯୋଗୁ ଯଦି ବନ୍ଦ ହୋଇଥିବ ତେବେ ସେଭଳି ଏମ୍‌ଏସ୍‌ଏମ୍‌ଇଗୁଡ଼ିକୁ ମଧ୍ୟ ଏହି ସୁବିଧା ମିଳିପାରିବ।