ରାଜଧାନୀରୁ ୬୦ ଲକ୍ଷର ବ୍ରାଉନସୁଗାର ଜବତ

ଭୁବନେଶ୍ୱର,୧୯।୬(ବ୍ୟୁରୋ): କରୋନା କଟକଣା ଭିତରେ ରାଜ୍ୟରେ ବେଧଡ଼କ ଚାଲିଛି ନିଶା କାରବାର। ବିଶେଷକରି ବ୍ରାଉନସୁଗାର ଚୋରା ଚାଲାଣ ର଼୍ୟାକେଟ ବାଲେଶ୍ୱରରୁ ଭୁବନେଶ୍ୱର ଲମ୍ବିଛି। କିଛି ଦିନର ବ୍ୟବଧାନ ପରେ ପୁଣି ରାଜଧାନୀରୁ ବିପୁଳ ବ୍ରାଉନସୁଗାର ଜବତ ହୋଇଛି। ବଡଗଡ ଥାନା ଅନ୍ତର୍ଗତ ବ୍ରିଟ୍‌ କଲୋନୀରେ କ୍ୟୁଏଟି ଓ ସ୍ଥାନୀୟ ପୋଲିସ ଚଢାଉ କରି ୫୭୭.୬୬ ଗ୍ରାମର ବ୍ରାଉନସୁଗାର ଜବତ କରିବା ସହ ସମ୍ପୃକ୍ତ ଜଣେ ଯୁବକଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଜଣକ ହେଲେ ବାଲେଶ୍ୱର ଜିଲା ସହଦେବଖୁଣ୍ଟା ଥାନା ଅନ୍ତର୍ଗତ ଅରଡବଜାର ଅଞ୍ଚଳର ବିଟୁ ଖାନ୍‌। ତାଙ୍କୁ ପଚରା ଉଚରାବେଳେ କିଙ୍ଗ୍‌ପିନ୍‌ ଓ ସମ୍ପୃକ୍ତ ଅନ୍ୟମାନଙ୍କ ସମ୍ପର୍କରେ ପୋଲିସ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପାଇଛି। ବିଟୁ ପାଠ ପଢିବା ସହ ମାଛ ବେପାର କରୁଛନ୍ତି। ତେବେ ପ୍ରଥମଥର ଜଣେ ବ୍ରାଉନସୁଗାର ଡିଲର ତାଙ୍କୁ ଏହି କାରବାରରେ ସାମିଲ କରିଥିବା ସେ ପୋଲିସକୁ କହିଛନ୍ତି। ର଼୍ୟାକେଟର କିଙ୍ଗ୍‌ପିନ୍‌ ଭୁବନେଶ୍ୱରର କେତେଜଣ ଇଞ୍ଜିନିୟରିଂ ଛାତ୍ରଙ୍କ ମାଧ୍ୟମରେ ଏହି କାରବାର ଚଳାଇଥିବା ସୂଚନା ମିଳିବା ପରେ ସେମାନଙ୍କୁ ଧରିବାକୁ ଚଢ଼ାଉ ଚାଲିଥିବା ଥାନା ଅଧିକାରୀ ବିଶ୍ୱରଞ୍ଜନ ନାୟକ ସୂଚନା ଦେଇଛନ୍ତି। ବିଟୁଙ୍କଠାରୁ ବ୍ରାଉନସୁଗର ସହ ମୋବାଇଲ୍‌ ଫୋନ୍‌, ଏଟିଏମ୍‌ କାର୍ଡ ଓ ଏକ ସ୍କୁଟି ଜବତ କରାଯାଇଛି। ଜବତ ବ୍ରାଉନସୁଗାରର ବଜାର ମୂଲ୍ୟ ପ୍ରାୟ ୬୦ଲକ୍ଷ ଟଙ୍କା ହେବ। ଏନେଇ ଏକ ମାମଲା (ନଂ.୨୧୭/୨୧) ରୁଜୁ କରାଯାଇ ଶୁକ୍ରବାର ବିଟୁଙ୍କୁ କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ଜେଲ ହାଜତକୁ ପଠାଇ ଦିଆଯାଇଥିବା ସେ କହିଛନ୍ତି।
ସୂଚନା ମୁତାବକ, ବାଂଲାଦେଶ ଓ କୋଲକାତାରୁ ବ୍ରାଉନସୁଗାର ବାଲେଶ୍ୱରକୁ ଆସୁଛି। ସେଠାରୁ ଭୁବନେଶ୍ୱର ସମେତ ରାଜ୍ୟ ତଥା ବାହାରକୁ ପଠାଯାଉଛି। ଏବେ ରାଜ୍ୟ ବାହାରକୁ ଚୋରା ଚାଲାଣ କଷ୍ଟକର ହେଉଥିବାରୁ ରାଜ୍ୟରେ ଏହି ର଼୍ୟାକେଟ ଅଧିକ ସକ୍ରିୟ ରହିଛି। ତେବେ ରାଜଧାନୀ ଭୁବନେଶ୍ୱର ଏବେ ବ୍ରାଉନସୁଗାର ବ୍ୟବସାୟର ବଡ଼ ବଜାର ପାଲଟିଛି। ଭୁବନେଶ୍ୱରକୁ ବ୍ରାଉନସୁଗାର ଚାଲାଣ ସଂକ୍ରାନ୍ତରେ କ୍ୟୁଏଟି ନିକଟରେ ଖବର ପହଞ୍ଚତ୍ବା ପରେ ମିଳିତ ଟିମ୍‌ ବଡଗଡ ବ୍ରିଟ କଲୋନୀ ଚାରିଛକ ଅଞ୍ଚଳରେ ଗୁରୁବାର ସନ୍ଧ୍ୟାରେ ଜାଲ ବିଛାଇଥିଲା। ଅଭିଯୁକ୍ତ ବିଟୁ ଏକ ସ୍କୁଟିରେ ପହଞ୍ଚତ୍ବା ପରେ ପୋଲିସ ତାଙ୍କୁ କାବୁ କରିନେଇଥିଲା।