କରୋନାରେ ୯,୩୪୬ ପିଲା ହୋଇଛନ୍ତି ବେସାହାରା

ନୂଆଦିଲ୍ଲୀ,୩।୬: କରୋନାର ଦ୍ୱିତୀୟ ଲହର ସମଗ୍ର ଦେଶକୁ ପ୍ରଭାବିତ କରିଛି। ମହାମାରୀ ଦ୍ୱାରା ପିଲାମାନେ ଅଧିକ ପ୍ରଭାବିତ ହୋଇଛନ୍ତି। ଏକ ଆକଳନରୁ ଜଣାପଡିଛି ଯେ, ସମଗ୍ର ଦେଶରେ ଏପର୍ଯ୍ୟନ୍ତ ୯୩୪୬ ପିଲା ଅନାଥ କିମ୍ବା ବେସାହାରା ହୋଇଯାଇଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ଉଭୟ ମାତାପିତାଙ୍କୁ ହରାଇଥିବାବେଳେ ଅନେକ ପିଲାଙ୍କ ମୁଣ୍ଡ ଉପରୁ ନିଜ ଅଭିଭାବକଙ୍କ ଛାୟା ଉଠିଯାଇଛି। ଜାତୀୟ ଶିଶୁ ସୁରକ୍ଷା ଅଧିକାର ଆୟୋଗ ଦ୍ୱାରା ଏହି ସୂଚନା ସୁପ୍ରିମକୋର୍ଟରେ ଉପସ୍ଥାପିତ କରାଯାଇଛି। ମହାରାଷ୍ଟ୍ର ସରକାର ଜଷ୍ଟିସ ଏଲ.ଏନ ରାଓ ଏବଂ ଅନିରୁଦ୍ଧ ବୋଷଙ୍କ ଏକ ବେଞ୍ଚ ସମ୍ମୁଖରେ ଏହି ତଥ୍ୟ ଉପସ୍ଥାପନ କରିଛନ୍ତି। ପ୍ରକାଶ ଯେ, ମେ ୩୦ ସୁଦ୍ଧା ୪,୪୫୧ ପିଲା ରାଜ୍ୟର ବିଭିନ୍ନ ଅଞ୍ଚଳରେ ସେମାନଙ୍କ ମାତାପିତାଙ୍କ ମଧ୍ୟରୁ ଜଣଙ୍କୁ ହରାଇଛନ୍ତି। ଏହି ସମୟରେ, ୧୪୧ ପିଲା ଅଛନ୍ତି, ଯାହାର ମାତାପିତା ଉଭୟଙ୍କର ମୃତ୍ୟୁ ହୋଇଛି । ଏନ୍‌ପିସିଆର୍‌ର ଓକିଲ ନୀରୁପମା ଚତୁଃର୍ବେଦୀ କହିଛନ୍ତି ଯେ, ସମଗ୍ର ଦେଶରେ ସର୍ବାଧିକ ଉତ୍ତର ପ୍ରଦେଶରରେ ୨୧୧୦ ଜଣ ପିଲା ବେସାହାରା ହୋଇଛନ୍ତି। ଦ୍ୱିତୀୟ ସ୍ଥାନରେ ରହିଛି ବିହାର (୧୩୨୭), ତୃତୀୟ ସ୍ଥାନରେ କେରଳ(୯୫୨) ଏବଂ ଚତୁର୍ଥ ସ୍ଥାନରେ ମଧ୍ୟପ୍ରଦେଶ(୭୧୨) ରହିଛି।