ବ୍ରହ୍ମପୁର ଅଫିସ,୪ା୬: ଗଞ୍ଜାମ ଜିଲା ସଦର ଥାନା ଅନ୍ତର୍ଗତ ନିମଖଣ୍ଡି ଫାଣ୍ଡି ନିକଟ ବେଡ଼ାବନ୍ଧ ହୁଡ଼ାରେ ଥିବା ଏକ ଖଜୁରୀ ଗଛରୁ ଜଣେ ଯୁବକଙ୍କ ଝୁଲନ୍ତା ମୃତଦେହ ଜବତ ହୋଇଛି। ମୃତକଙ୍କ ମୋବାଇଲ୍ରୁ ପୋଲିସ ପରିବାର ସହ ଯୋଗାଯୋଗ ପରେ ତାଙ୍କ ଭାଇ ପହଞ୍ଚି ମୃତଦେହ ଚିହ୍ନଟ କରିଛନ୍ତି। ମୃତକ ଟି. ରାକେଶ ରାଓ (୨୨) ବୋଲି। ମୃତଦେହ ଜବତ କରି ୨୬/୨୧ରେ ଏକ ଅପମୃତ୍ୟୁ ମାମଲା ରୁଜୁ କରି ପୋଲିସ ବ୍ୟବଚ୍ଛେଦ ପାଇଁ ପଠାଇଛି।
ସୂଚନାନୁଯାୟୀ ଗୋବିନ୍ଦ ବିହାର ପ୍ରଥମ ଲାଇନରେ ଭେଙ୍କଟ ଓ ତାଙ୍କ ଭାଇ ରାକେଶ ଏକ ଘର ଭଡ଼ା ନେଇ ରୁହନ୍ତି। ରାକେଶ ଜଣେ ଅଟୋ ଚାଳକ ହୋଇଥିବା ବେଳେ ପ୍ରତିଦିନ ମଦ୍ୟପାନ କରି ଘରକୁ ଆସି ଭାଉଜଙ୍କ ସହ ଝଗଡ଼ା କରୁଥିଲେ। ଗତ ତିନିଦିନ ତଳେ ଭେଙ୍କଟ ଓ ତାଙ୍କ ଭାଇ ରାକେଶଙ୍କ ସହ ଝଗଡ଼ା ହୋଇଥିଲା। ଘଟଣା ପରେ ରାକେଶ ଘରଛାଡ଼ି ଚାଲି ଯାଇଥିଲେ। ଉକ୍ତ ଝଗଡ଼ାକୁ କେନ୍ଦ୍ରକରି ସେ ଆତ୍ମହତ୍ୟା କରିଥିବା ପୋଲିସ ସନ୍ଦେହ କରିଛି।
