ପାଟନା,୧୯।୬: ସୁନିଲା ଦେବୀ ନାମକ ଜଣେ ବୃଦ୍ଧାଙ୍କୁ ମାତ୍ର ୫ ମିନିଟ୍ର ବ୍ୟବଧାନରେ ଉଭୟ କୋଭାକ୍ସିନ ଓ କୋଭିଶିଲ୍ଡ ଟିକା ଦିଆଯାଇଛି। ୬୩ ବର୍ଷୀୟା ବୃଦ୍ଧା ଅଓ୍ବଧପୁର ଗ୍ରାମର ବାସୀନ୍ଦା। ପାଟନାସ୍ଥିତ ବେଲଦାରିଚକ ମିଡ୍ଲ ସ୍କୁଲରେ ଚାଲିଥିବା ଟିକାକରଣ କେନ୍ଦ୍ରରେ ତାଙ୍କୁ ଉଭୟ ଟିକା ଦିଆଯାଇଛି।
ବୃଦ୍ଧାଙ୍କ ସ୍ବାସ୍ଥ୍ୟବସ୍ଥା ସ୍ଥିର ଅଛି। ସେ ଏବେ ଡାକ୍ତରଙ୍କ ତତ୍ତ୍ୱାବଧାନରେ ଅଛନ୍ତି। ତାଙ୍କୁ ଭୁଲ ବଶତଃ ଉଭୟ ଟିକା ଦିଆଯାଇଛି ସ୍ବାସ୍ଥ୍ୟ ଅଧିକାରୀ କହିଛନ୍ତି। ଏହି ଘଟଣା ପଦାକୁ ଆସିବା ପରେ ଟିକାକରଣ କେନ୍ଦ୍ରରେ ମେଡିକାଲ ବିଶେଷଜ୍ଞ ତଦନ୍ତ ଆରମ୍ଭ କରିଛନ୍ତି।
ଗଣମାଧ୍ୟମ ରିପୋର୍ଟ ଅନୁଯାୟୀ, ରେଜିଷ୍ଟ୍ରେଶନ କରାଯିବା ପରେ ୬୩ ବର୍ଷୀୟା ବୃଦ୍ଧାଙ୍କୁ ପ୍ରଥମେ କୋଭିଶିଲ୍ଡ ଦିଆଯାଇଥିଲା। ଟିକା ନେବା ପରେ ତାଙ୍କୁ ୫ ମିନିଟ୍ ଅପେକ୍ଷା କରିବାକୁ କହିଥିଲେ ନର୍ସ। କିନ୍ତୁ ବୃଦ୍ଧା ଜାଣି ନ ପାରି ଦ୍ୱିତୀୟ ଧାଡ଼ିରେ ଛିଡ଼ା ହୋଇଯାଇଥିଲେ, ଯେଉଁ ଧାଡ଼ିର ଲୋକଙ୍କୁ କୋଭାକ୍ସିନ ଦିଆଯାଉଥିଲା। ଦ୍ୱିତୀୟ ଟିକା ଦିଆଯିବା ପୂର୍ବରୁ ନର୍ସଙ୍କୁ ପ୍ରଥମ ଟିକା ସମ୍ପର୍କରେ ଜଣାଇଥିଲେ। ହେଲେ ନର୍ସ ଜଣଙ୍କ କିଛି ଶୁଣି ନ ଥିଲେ।
