କରୋନା ସଂକଟରେ ରୋଜଗାର ହରାଇ ହାତବାନ୍ଧି ବସିଛନ୍ତି ଅଟୋ ଚାଳକ

ବୁଗୁଡ଼ା, ୫।୬(ଡି.ଏନ୍‌.ଏ.): ଚକ ଗଡ଼ିଲେ ଜଳୁଥିଲା ଚୁଲି। ଏବେ ତେଲ ପଇସା ମଧ୍ୟ ବାହାରୁନି। ଫଳରେ ଭୋକ ଉପାସରେ ଜୀବନ ବିତାଉଛନ୍ତି ଅଧିକାଂଶ ପରିବାର। କରୋନା ସଂକଟରେ ରୋଜଗାର ହରାଇ ଗଞ୍ଜାମ ଜିଲା ବୁଗୁଡ଼ା ସହରର ଅଟୋ ଚାଳକମାନେ ଏବେ ହାତବାନ୍ଧି ବସିଛନ୍ତି। କରୋନାର ପ୍ରଥମ ଲହର ସମୟରେ ଦୀର୍ଘ ୯ ମାସ ଧରି ସାରା ରାଜ୍ୟରେ ଲକ୍‌ଡାଉନ ରହିବା ଯୋଗୁ ଅଟୋ ଚାଳକମାନଙ୍କ ଆର୍ଥିକ ମେରୁଦଣ୍ଡ ଭାଙ୍ଗିପଡିଥିଲା। ତେବେ ପରିସ୍ଥିତିରେ ସାମାନ୍ୟ ସୁଧାର ଆସିବା ପରେ ସେମାନେ ଅଣ୍ଟା ସଳଖି ଛିଡ଼ା ହେବା ପାଇଁ ଚେଷ୍ଟା କରୁଥିବା ବେଳେ ପୁଣି ଦ୍ୱିତୀୟ ଲହର ସେମାନଙ୍କ ଦୁଃଖକୁ ଆହୁରି ଦ୍ୱିଗୁଣିତ କରିଦେଇଛି । ବୁଗୁଡ଼ା ସହର ମେଡିକାଲ ଛକର ଶ୍ରୀଜଗନ୍ନାଥ ଅଟୋ ଚାଳକ ସଂଘ ଏବଂ ବସ୍‌ଷ୍ଟାଣ୍ଡର ଶ୍ରୀବଳଦେବସ୍ବାମୀ ଅଟୋ ଚାଳକ ସଂଘର ଶତାଧିକ ଅଟୋ ଚାଳକ ଲକଡାଉନ ଯୋଗୁ ପ୍ରଭାବିତ ହୋଇଛନ୍ତି। ଦୈନିକ ରୋଜଗାର ଏବେ ଠପ୍‌ ହୋଇପଡ଼ିଥିବାରୁ ପରିବାର ଚଳାଇବା ସେମାନଙ୍କପକ୍ଷେ କଷ୍ଟକର ହୋଇପଡିଛି l ଅନ୍ୟପଟେ ସରକାରୀ ସ୍ତରରେ ହେଉ କି ନିଜ ସଂସ୍ଥା ପକ୍ଷରୁ କିଛି ବି ସହାୟତା ମିଳୁନାହିଁ। ଯଦି ଆଗକୁ ଲକ୍‌ଡାଉନ ଅବଧି ପୁଣି ବୃଦ୍ଧି କରାଯାଏ ତେବେ ସେମାନଙ୍କ ବଞ୍ଚି ରହିବା ଅସହନୀୟ ହୋଇପଡ଼ିବ ବୋଲି ଅଟୋ ଚଳାକ ସଂଘ କହିଛନ୍ତି l ତେଣୁ ସରକାର ଏ ଦିଗରେ ଦୃଷ୍ଟି ଦେବାକୁ ସ୍ଥାନୀୟ ଶ୍ରୀଜଗନ୍ନାଥ ଅଟୋ ଚାଳକ ସଂଘର ସଭାପତି ଓ ସଂପାଦକ ଏବଂ ଶ୍ରୀବଳଦେବସ୍ବାମୀ ଅଟୋ ଚାଳକ ସଂଘର ସଭାପତି ଓ ସଂପାଦକ ଅନୁରୋଧ କରିଛନ୍ତି।