ସାଉଥାମ୍ପଟନ,୨୪।୬: ବିଶ୍ୱ ଟେଷ୍ଟ ଚାମ୍ପିୟନଶିପ୍(ଡବ୍ଲୁଟିସି) ପ୍ରତମ ସଂସ୍କରଣରେ କେନ୍ ଓ୍ବିଲିୟମସନ୍ଙ୍କ ନେତୃତ୍ୱାଧୀନ ନ୍ୟୁଜିଲାଣ୍ଡ ଚାମ୍ପିୟନ ହୋଇଛି। ଏହା ଉଇକେଟକିପର ବ୍ୟାଟ୍ସମ୍ୟାନ ବି ଜେ ଓ୍ବାଟଲିଂଙ୍କ କ୍ୟାରିୟରର ଅନ୍ତିମ ମ୍ୟାଚ୍ ଥିଲା। ଆହତ ସମସ୍ୟା ସତ୍ତ୍ୱେ ସେ ପଡ଼ିଆକୁ ଓହ୍ଲାଇବା ସହ ବେଶ୍ ଉଲ୍ଲେଖନୀୟ ପ୍ରଦର୍ଶନ କରି ଭାରତୀୟ ଅଧିନାୟକ ମହେନ୍ଦ୍ର ସିଂହ ଧୋନୀଙ୍କ ରେକର୍ଡ ଭାଙ୍ଗିବାରେ ସଫଳ ହୋଇଛନ୍ତି।
ଓ୍ବାଟଲିଂ ଟେଷ୍ଟ କ୍ରିକେଟରେ ସବୁଠାରୁ ଅଧିକ କ୍ୟାଚ୍ ନେଇଥିବା ଦୁନିଆର ୭ମ ଉଇକେଟକିପର ପାଲଟିଛନ୍ତି। ଭାରତର ଦ୍ୱିତୀୟ ସେସନରେ ରବିନ୍ଦ୍ର ଜାଡେଜାଙ୍କ କ୍ୟାଚ୍ ନେଇ ସେ ଏହି ଉପଲବ୍ଧି ହାସଲ କରିଥିଲେ।
ଓ୍ବାଟଲିଂ ନ୍ୟୁଜିଲାଣ୍ଡ ପକ୍ଷରୁ ୭୫ ଟେଷ୍ଟର ୧୨୭ ପାଳିରେ ଉଇକେଟକିପିଂ କରିଥିବା ବେଳେ ୨୫୭ କ୍ୟାଚ୍ ଧରିଛନ୍ତି। ଅପରପକ୍ଷେ ଧୋନୀ ୯୦ ମ୍ୟାଚ୍ରେ ୨୫୬ କ୍ୟାଚ୍ ଧରିଥିଲେ। ମୋଟାମୋଟି ଦେଖିଲେ ଦକ୍ଷିଣ ଆଫ୍ରିକାର ପୂର୍ବ ଉଇକେଟକିପର ତଥା ବର୍ତ୍ତମାନର ପ୍ରମୁଖ କୋଚ୍ ମାର୍କ ବାଉଚର ଟେଷ୍ଟ କ୍ରିକେଟରେ ସବୁଠାରୁ ଅଧିକ କ୍ୟାଚ୍ ଧରିଥିବା ଉଇକେଟକିପର ରହିଛନ୍ତି। ସେ ୧୪୭ ଟେଷ୍ଟର ୨୮୧ ପାଳିରେ ୫୩୨ କ୍ୟାଚ୍ ଧରିଥିଲେ।
