ନୂଆଦିଲ୍ଲୀ,୪।୬: ଦେଶରେ କରୋନା ଟିକାକରଣକୁ ଆହୁରି ତ୍ୱରାନ୍ବିତ କରାଯିବ। ସେପ୍ଟେମ୍ବର ସୁଦ୍ଧା ଦେଶର ୭୦କୋଟି ଲୋକଙ୍କୁ କରୋନା ଭାକ୍ସିନର ପ୍ରଥମ ଡୋଜ୍ ଦିଆଯିବା ନେଇ ସରକାର ଲକ୍ଷ୍ୟ ରଖିଛନ୍ତି। ଏନେଇ କେନ୍ଦ୍ର ସରକାରଙ୍କ ମୁଖ୍ୟ ଆର୍ଥିକ ପରାମର୍ଶଦାତା(ସିଇଏ) କେ.ବି ସୁବ୍ରମଣ୍ୟମ କହିଛନ୍ତି। କରୋନା ଲଢ଼େଇରେ ଭାକ୍ସିନ ଏକମାତ୍ର ଅସ୍ତ୍ର ଥିବା ବେଳେ ଯଦି ଟିକାକରଣ ଗତିକୁ ଆହୁରି ବୃଦ୍ଧି କରାଯାଏ ତେବେ ତୃତୀୟ ଲହର ଆସିବା ଆଶଙ୍କା ଆହୁରି କମିଯିବ ବୋଲି ସୁବ୍ରମଣ୍ୟମ କହିଛନ୍ତି। ତେଣୁ ସେପ୍ଟେମ୍ବର ସୁଦ୍ଧା ଦେଶର ୭୦ କୋଟି ଲୋକଙ୍କୁ ଭାକ୍ସିନର ପ୍ରଥମ ଡୋଜ୍ ଦିଆଯିବାକୁ ଥିବା ବେଳେ ଡିସେମ୍ବର ଶେଷ ସୁଦ୍ଧା ୧୮ରୁ ଊର୍ଦ୍ଧ୍ୱ ବୟସ୍କଙ୍କୁ ଟିକା ଦିଆଯିବା ନେଇ ଲକ୍ଷ୍ୟ ରଖାଯାଇଛି। ଅନ୍ୟପଟେ ଦ୍ୱିତୀୟ ଲହରରେ ଅର୍ଥବ୍ୟବସ୍ଥାକୁ ନେଇ ସୁବ୍ରମଣ୍ୟମ କହିଛନ୍ତି, ବର୍ତ୍ତମାନ ଏହା ଉପରେ ଅଧିକ ପ୍ରଭାବ ପଡ଼ି ନାହିଁ ଏବଂ ତ୍ରୈମାସିକ ସୁଦ୍ଧା ଏଥିରେ ସୁଧାର ଆସିବା ଆରମ୍ଭ ହୋଇଯିବ। ଲକ୍ଡାଉନ ଯୋଗୁ କିଛିମାତ୍ରାରେ ଅର୍ଥନୀତିରେ ପ୍ରଭାବ ପଡ଼ିଛି। ଅନ୍ୟପଟେ ବିଶେଷଜ୍ଞ ମତ ଅନୁସାରେ ଜୁନ ୧୫ ପରେ କରୋନା ସଂକ୍ରମଣର ପଜିଟିଭ୍ ହାର କମ୍ ହୋଇଯିବ ବୋଲି ସୁବ୍ରମଣ୍ୟମ ସୂଚନା ଦେଇଛନ୍ତି।
