ରାଜସ୍ଥାନ ଅଧିନାୟକଙ୍କ ଭବିଷ୍ୟବାଣୀ ହେଲା ସତ! ଭାରତୀୟ କ୍ରିକେଟ ଟିମ୍‌ରେ ଚୟନକୁ ନେଇ ଏଭଳି…

ନୂଆଦିଲ୍ଲୀ,୧୨।୬: ନିକଟରେ ଶ୍ରୀଲଙ୍କା ଗସ୍ତ ଲାଗି ଭାରତୀୟ ଟିିମ୍‌ର ଘୋଷଣା କରାଯାଇଛି। ଏଥିରେ ଅନେକ ଯୁବ କ୍ରିକେଟରଙ୍କୁ ସୁଯୋଗ ମିଳିଛି। ସେମାନଙ୍କ ମଧ୍ୟରୁ ଦ୍ରୁତ ବୋଲର ଚେତନ ସାକାରିଆ ଜଣେ। ଆଇପିଏଲ୍‌ ୨୦୨୧ରେ ରାଜସ୍ଥାନ ରୟାଲ୍ସ ପକ୍ଷରୁ ସେ ଉଲ୍ଲେଖନୀୟ ବୋଲିଂ କରି ଚୟନକର୍ତ୍ତାଙ୍କ ଧ୍ୟାନ ଆକର୍ଷିତ କରି ବାରେ ସଫଳ ହୋଇଛନ୍ତି। ଏବେ ସେ ପ୍ରଥମ ଥର ପାଇଁ ଭାରତୀୟ ଟିମ୍‌ ଲାଗି ଚୟନ ହେବାକୁ ନେଇ ଏକ ରହସ୍ୟ ଉପରୁ ପରଦା ଉଠାଇଛନ୍ତି। ଆଇପିଏଲ୍‌ ସମୟରେ ରାଜସ୍ଥାନର ଅଧିନାୟକ ସଞ୍ଜୁ ସାମସନ ତାଙ୍କ ଦଳରେ ଚୟନ ହେବା ନେଇ ଭବିଷ୍ୟବାଣୀ କରିଥିଲେ ବୋଲି ସେ କହିଛନ୍ତି।

ଏକ ସାକ୍ଷାତକାରରେ ସାକାରିଆ କହିଛନ୍ତି, ସଞ୍ଜୁ ଭାଇ ଅନ୍ୟମାନଙ୍କଠାରୁ ଅଧିକ ମୋ ଉପରେ ବିଶ୍ୱାସ ଥିବା ଦର୍ଶାଉଥିଲେ। ଯେଉଁଭଳି ଭାବେ ବୋଲିଂ କରୁଛ, ଭାରତୀୟ ଟିମ୍‌ ପାଇଁ ଚୟନ ହେବାର ଦିନ ପାଖେଇ ଆସୁଛି ବୋଲି ଆଇପିଏଲ୍‌ ସମୟରେ ସେ କହିଥିଲେ। ହେଲେ ତାଙ୍କର ବିଶ୍ୱାସ ନଥିଲା। ସେ କେବଳ ଜଣେ ନେଟ୍‌ ବୋଲର୍‌ ଭାବେ ଟିମ୍‌ ସହ ଯୋଡ଼ି ହୋଇ ରହିବାକୁ ଆଶା ରଖିଥିବା ସାକାରିଆ କହିଛନ୍ତି।

ଆଇପିଏଲ୍‌ ପରେ ଲୋକେ ମୋ ବିଷୟରେ ଯେଉଁଭଳି ଭାବେ କଥା ହେଉଥିଲେ, ଅତିକମ୍‌ରେ ଭାରତୀୟ ଟିମ୍‌ ପାଇଁ ନେଟ୍‌ ବୋଲର୍‌ ହେବାର ସୁଯୋଗ ମିଳିବ ବୋଲି ଆଶା ରହିଥିଲା। ହେଲେ ଶ୍ରୀଲଙ୍କା ଗସ୍ତ ପାଇଁ ଦଳରେ ସାମିଲ କରାଯିବ ସ୍ବପ୍ନ ଭଳି ଥିଲା। ଯଦି ଏହା ସତ ହୋଇଛି ତେବେ ନିଜର ଶ୍ରେଷ୍ଠ ଦେବାକୁ ଚେଷ୍ଟା କରିବି।

ପ୍ରକାଶ ଯେ, ଗତ ମାସରେ କରୋନାରେ ସଂକ୍ରମିତ ହେବା କାରଣରୁ ସାକାରିଆଙ୍କ ବାପାଙ୍କ ପରଲୋକ ଘଟିଛି। ଏବେ ଦଳରେ ସାକାରିଆଙ୍କୁ ସୁଯୋଗ ମିଳିଥିଲେ ହେଁ ଖୁସି ଦେଖିବାକୁ ସେ ଆଉ ନାହାନ୍ତି। ଏହା ବେଶ ଆଘାତ ଦେଇଛି କ୍ରିକେଟରଙ୍କୁ।