ଧାନ ବୁଣିବାକୁ କେନ୍ଦ୍ର କରି ଗୋଷ୍ଠି ସଂଘର୍ଷ

ଲୋଇସିଂହା,୨୦।୬: ବଲାଙ୍ଗୀର ଜିଲା ଲୋଇସିଂହା ଥାନା କୁଟୁରାପାଲି ଗ୍ରାମରେ ପୈତୃକ ଜମି ବିବାଦକୁ କେନ୍ଦ୍ର କରି ରବିବାର ଦୁଇପକ୍ଷ ମଧ୍ୟରେ ମାରପିଟରୁ ଜଣଙ୍କର ମୃତ୍ୟୁ ହୋଇଛି। ମୃତକ ହେଲେ ପ୍ରସନ୍ନ ବାଗ(୪୨)। ଏଥିରେ ଉଭୟ ପକ୍ଷର ଅନ୍ୟ ୭ଜଣ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ଗୁରୁତର ଥିବା ଦଶରଥ ବାଗ ଓ କସରତ ବାଗଙ୍କୁ ବଲାଙ୍ଗୀର ଭୀମଭୋଇ ମେଡିକାଲକୁ ସ୍ଥାନାନ୍ତର କରାଯାଇଛି । ଲୋଇସିଂହା ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।

ପୋଲିସ ସୂଚନା ମୁତାବକ, ସକମା ପଞ୍ଚାୟତ ଅଧୀନ କୁଟୁରାପାଲି ଗ୍ରାମର ଅଇଁଠୁ ବାଗ, ନରସିଂହ ବାଗ, ଭରତ ବାଗ ଓ ଅଶ୍ୱିନୀ ବାଗ ରବିବାର ସକାଳେ ଟାଙ୍ଗର ଜମି(ଖେତ)କୁ ଧାନ ବୁଣି ଯାଇଥିଲେ। ତେବେ ବିବାଦୀୟ ଥିବା ଉକ୍ତ ଜମିରେ ଧାନ ନ ବୁଣିବାକୁ ପ୍ରସନ୍ନ ବାଗ, ଦଶରଥ ବାଗ, କସରତ ବାଗ ବାରଣ କରିଥିଲେ  । ଏହାକୁ ନେଇ ଉଭୟ ପକ୍ଷ ମଧ୍ୟରେ କଥା କଟାକଟି ହୋଇଥିଲା। ପରେ ଏହା ଉଗ୍ରରୂପ ନେଇଥିଲା  । ଠେଙ୍ଗାବାଡି, ଟାଙ୍ଗିଆରେ ଗୋଟିଏ ପକ୍ଷ ଅନ୍ୟ ପକ୍ଷକୁ ଆକ୍ରମଣ କରିଥିଲେ। ଏଥିରେ ଘଟଣାସ୍ଥଳରେ ପ୍ରସନ୍ନଙ୍କ ମୃତ୍ୟୁ ହୋଇଯାଇଥିଲା। ମୃତକଙ୍କ ପରିବାରର ଦଶରଥ, କସରତ ଓ ସୁନୀଲ ଗୁରୁତର ହୋଇଥିଲେ  । ଅପରପକ୍ଷର ଅଇଁଠୁ, ନରସିଂହ, ଭରତ ଓ ଅଶ୍ୱିନୀ ମଧ୍ୟ ଆହତ ହୋଇଛନ୍ତି। ଖବର ପାଇ ଡିଏସ୍‌ପି ଅମରତ କୁମାର ପଣ୍ଡା, ଆଇଆଇସି ରମାକାନ୍ତ ଜେନା ଓ ଷ୍ଟାଫ୍‌ ଘଟଣାସ୍ଥଳରେ ପହଞ୍ଚତ୍ ତନାଘନା କରିଥିଲେ। ପୋଲିସ ସେଠାରୁ ଟାଙ୍ଗିଆ, ଠେଙ୍ଗା ଜବତ କରିଛି। ଆହତଙ୍କୁ ଚିକିତ୍ସା ପାଇଁ ଲୋଇସିଂହା ଡାକ୍ତରଖାନା ପଠାଯାଇଛି। ମୃତ ପ୍ରସନ୍ନଙ୍କ ପୁତୁରା ଆକାଶ ବାଗଙ୍କ ଲିଖିତ ଅଭିଯୋଗକ୍ରମେ ଥାନାରେ ଏକ ମାମଲା(ନଂ. ୧୭୫/୨୧)ରୁଜୁ ହୋଇଛି। ଅପରପକ୍ଷର ରାମପ୍ରସାଦଙ୍କ ଅଭିଯୋଗକ୍ରମେ ଥାନାରେ (ନଂ.୧୭୬/୨୧)ରେ ଅନ୍ୟ ଏକ ମାମଲା ରୁଜୁ ହୋଇଛି।