ଆଇପିଏଲ ପାଇଁ ଖୁସି ଖବର

ଜାମାଇକା,୧୮ା୬: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଅନୁରୋଧ କ୍ରମେ କାରିବିୟନ ପ୍ରିମିୟର ଲିଗ୍‌ (ସିପିଏଲ)ର କାର୍ଯ୍ୟସୂଚୀରେ ପରିବର୍ତ୍ତନ କରିଛି କ୍ରିକେଟ ଓ୍ବେଷ୍ଟଇଣ୍ଡିଜ (ସିଡବ୍ଲ୍ୟୁଆଇ)। ୟୁଏଇରେ ହେବାକୁ ଥିବା ଇଣ୍ଡିଆନ ପ୍ରିମିୟର ଲିଗ୍‌ (ଆଇପିଏଲ)ର ଦ୍ୱିତୀୟ ପର୍ଯ୍ୟାୟ ପାଇଁ ସିପିଏଲକୁ ଧାର୍ଯ୍ୟ ତାରିଖ ଆଗରୁ ଆରମ୍ଭ କରିବାକୁ ବିସିସିଆଇ ଅନୁରୋଧ କରିଥିଲା। ଯାହା ଫଳରେ ସିପିଏଲରେ ଭାଗ ନେଉଥିବା ଓ୍ବେଷ୍ଟଇଣ୍ଡିଜ ଓ ଅନ୍ୟ ଦେଶର ଖେଳାଳିମାନେ ଆଇପିଏଲ ଆରମ୍ଭରୁ ଉପଲବ୍ଧ ହୋଇପାରିବେ।

ବିସିସିଆଇର ସାଧାରଣ ସମ୍ପାଦକ ଜୟ ଶାହ ସିପିଏଲ ସିଓଓ ପେଟେ ରସେଲଙ୍କ ସହ ଫୋନ ଯୋଗେ କଥା ହୋଇଥିଲେ। ଏହାପରେ ବିସିସିଆଇ ଓ ସିପିଏଲ ଅଧିକାରୀ ଲିଗ୍‌ର କାର୍ଯ୍ୟସୂଚୀରେ ପରିବର୍ତ୍ତନ କରିବାକୁ ଏକମତ ହୋଇଛନ୍ତି। ମିଳିଥିବା ସୂଚନା ମୁତାବକ, ସିପିଏଲ ଅଗଷ୍ଟ ୨୫ରୁ ସେପ୍ଟେମ୍ବର ୧୫ ମଧ୍ୟରେ ଖେଳାଯିବ। ର୍ପୂବରୁ ଏହି ଲିଗ୍‌ ଅଗଷ୍ଟ ୨୮ରୁ ସେପ୍ଟେମ୍ବର ୧୯ ମଧ୍ୟରେ ଖେଳାଯିବାର ଥିଲା। ସିପିଏଲ ଶେଷ ହେବା ପରେ ଓ୍ବେଷ୍ଟଇଣ୍ଡିଜ ଖେଳାଳିମାନେ ସ୍ବତନ୍ତ୍ର ଚାଟର ବିମାନ ଯୋଗେ ୟୁଏଇ ପହଞ୍ଚିବେ। ସେଠାରେ ୩ ଦିନିଆ ହାର୍ଡ କ୍ୱାରେଣ୍ଟିନ ରହିବା ପରେ ସେପ୍ଟେମ୍ବର ୧୮-୧୯ରୁ ଆରମ୍ଭ ହେବାକୁ ଥିବା ଆଇପିଏଲର ବଳକା ମ୍ୟାଚ୍‌ ଉପଲବ୍ଧ ହୋଇପାରିବେ।