୨ ବିଭାଗର ଅବହେଳାରୁ ଦନ୍ତା ମୃତ

ଭଞ୍ଜନଗର,୭।୬: ଗଞ୍ଜାମ ଜିଲା ଉତ୍ତର ଘୁମୁସର ବନଖଣ୍ଡ କେନ୍ଦ୍ରୀୟ ବନାଞ୍ଚଳ ଢଉପଲ୍ଲୀ ନିକଟ କାଜୁ ଜଙ୍ଗଲରେ ରବିବାର ରାତିରେ ଏକ ଅଭାବନୀୟ ଘଟଣା ଘଟିଛି। ୧୧ କେ.ଭି. ବିଦ୍ୟୁତ୍‌ ତାର ସଂସ୍ପର୍ଶରେ ଆସି ଏକ ଦନ୍ତାହାତୀର ଜୀବନ ଯାଇଛି। ସୋମବାର ସକାଳେ ବନ ବିଭାଗ ଓ ବିଦ୍ୟୁତ୍‌ ବିଭାଗ କର୍ମଚାରୀ ପହଞ୍ଚି ତଦନ୍ତ ଆରମ୍ଭ କରିଥିଲେ। ୨ ବିଭାଗର ଅବହେଳାରୁ ହାତୀ ମୃତ୍ୟୁ ଘଟିଥିବା ଜଣାପଡିଛି।
ହାତୀ ଓ ଅନ୍ୟ ବନ୍ୟଜନ୍ତୁ ସୁରକ୍ଷା ପାଇଁ ପ୍ରତି ୨ ମାସରେ ଥରେ ବିଦ୍ୟୁତ୍‌ ଓ ବନ ବିଭାଗର ସମନ୍ବୟ ବୈଠକ ଅନୁଷ୍ଠିତ ହୁଏ। ହେଲେ ୪ ମାସ ମଧ୍ୟରେ ଥରେ ବି ବୈଠକ ହୋଇ ନାହିଁ। ଫଳରେ ହାତୀ ଚଳପ୍ରଚଳ କରୁଥିବା ଅଞ୍ଚଳରେ ଓହଳି ରହିଥିବା ବିଦ୍ୟୁତ୍‌ ତାରଗୁଡ଼ିକ ଉପରକୁ ଟଣାଯାଇ ନ ଥିଲା। ଗତ ୩ ଦିନ ହେଲା ୮ଟି ହାତୀ ବାଘୁଆପଲ୍ଲୀ, ବିଭୂତିଆ, ଢଉପଲ୍ଲୀ ଅଞ୍ଚଳରେ ଘୂରି ବୁଲୁଥିଲେ। ସେମାନଙ୍କୁ ଜଙ୍ଗଲକୁ ଘଉଡ଼ାଇବା ପାଇଁ ବିଭିନ୍ନ ସମୟରେ ବନ ବିଭାଗ ପକ୍ଷରୁ ଚେଷ୍ଟା କରାଯାଇଥିଲେ ମଧ୍ୟ ବିଦ୍ୟୁତ୍‌ ତାର ଉପରକୁ ଉଠାଇବା ପାଇଁ ଗୁରୁତ୍ୱ ଦିଆଯାଇ ନ ଥିଲା। ରବିବାର ରାତି ପ୍ରାୟ ୧୧ଟାରେ ଢଉପଲ୍ଲୀ ଅଞ୍ଚଳରେ ହାତୀ ବୁଲୁଥିବା ଯୋଗୁ କିଛି ଘଣ୍ଟା ବିଦ୍ୟୁତ୍‌ କାଟ କରାଯାଇ ପୁଣି ସଂଯୋଗ ଦିଆଯାଇଥିଲା। ସୋମବାର ଭୋର୍‌ରେ ବନପାଳ ଅନିଲ ପଣ୍ଡା ଓ ଅନ୍ୟ କର୍ମଚାରୀ ଜଙ୍ଗଲକୁ ପାଟ୍ରୋଲିଂ ପାଇଁ ଯାଇଥିବା ବେଳେ ଏକ ଦନ୍ତାହାତୀ ମରିପଡ଼ିଥିବା ଦେଖିଥିଲେ। ଖବରପାଇ ଡିଏଫଓ ଅଭୟ କାନ୍ତ ଦଳେଇ, ଏସିଏଫ୍‌ ସୁଦର୍ଶନ ବାଦୀ, ରେଞ୍ଜର କୁମର ବେହେରା, ବିଦ୍ୟୁତ୍‌ ବିଭାଗ ନିର୍ବାହୀ ଯନ୍ତ୍ରୀ ଜଗତଜିତ୍‌ ଦାସ ମହାପାତ୍ର ପହଞ୍ଚି ତଦନ୍ତ କରିଛନ୍ତି। ଉକ୍ତ ଜଙ୍ଗଲରେ ବିଦ୍ୟୁତ୍‌ ତାର ୧୫ ଫୁଟ ଉଚ୍ଚରେ ରହିବା ବଦଳରେ ୧୨ ଫୁଟ ୬ ଇଞ୍ଚ ଉଚ୍ଚରେ ଥିବା ଦେଖାଯାଇଥିଲା। ହାତୀଟିର ଉଚ୍ଚତା ୮ ଫୁଟ ୮ ଇଞ୍ଚ। ଶୁଣ୍ଢର ଲମ୍ବ ୫ ଫୁଟ ୪ ଇଞ୍ଚ। ବିଦ୍ୟୁତ୍‌ ତାର ଠିକ୍‌ ଉଚ୍ଚତାରେ ରହିଥିଲେ ହାତୀ ସୁରକ୍ଷିତ ରହିପାରିଥାନ୍ତା। ଡିଏଫଓ ଦଳେଇ କହିଛନ୍ତି, ଯେଉଁଠି ଦିଦ୍ୟୁତ୍‌ ତାର ଓହଳି ରହୁଛି, ତାହାକୁ ଟାଣିବା ପାଇଁ ଡିଭିଜନସ୍ତରରେ ପୂର୍ବରୁ ନିର୍ବାହୀ ଯନ୍ତ୍ରୀଙ୍କୁ ଜଣାଇ ଦେଇଛୁ । ହାତୀ ବ୍ୟବଚ୍ଛେଦ ରିପୋର୍ଟ ଆସିବା ପରେ ଆବଶ୍ୟକ ପଦକ୍ଷେପ ନିଆଯିବ। ସେହିପରି ଘଟଣାର ତଦନ୍ତ ଚାଲିଥିବା ବିଦ୍ୟୁତ୍‌ ବିଭାଗ ନିର୍ବାହୀ ଯନ୍ତ୍ରୀ ଦାସ କହିଛନ୍ତି।