ତୃତୀୟ ଲହର ମୁକାବିଲା ପ୍ରସ୍ତୁତି: ୫ହଜାର ସ୍ବାସ୍ଥ୍ୟସହାୟକଙ୍କୁ ଦିଆଯିବ ତାଲିମ୍‌

ନୂଆଦିଲ୍ଲୀ,୧୬।୫: କରୋନାର ସମ୍ଭାବ୍ୟ ତୃତୀୟ ଲହର ସହ ମୁକାବିଲା ନେଇ ଦିଲ୍ଲୀ ସରକାର ଆଗୁଆ ପ୍ରସ୍ତୁତି ଆରମ୍ଭ କରିଛନ୍ତି। ଡାକ୍ତରୀ କର୍ମଚାରୀଙ୍କ ଅଭାବକୁ ଧ୍ୟାନରେ ରଖି ସରକାର ୫ହଜାର ସ୍ବାସ୍ଥ୍ୟସହାୟକଙ୍କୁ ତାମିଲ ଦେବା ପାଇଁ ଯୋଜନା କରିଛନ୍ତି। ଏନେଇ ବୁଧବାର ଆୟୋଜିତ ଏକ ଖବରଦାତା ସମ୍ମିଳନୀରେ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ସୂଚନା ଦେଇଛନ୍ତି। ଏଥିସହ ସେ କହିଛନ୍ତି, ଏହି ସ୍ବାସ୍ଥ୍ୟସହାୟକଙ୍କୁ ୨ ସପ୍ତାହ ଧରି ଟ୍ରେନିଂ ଦିଆଯିବ। ଆଉ ଏହି ଟ୍ରେନିଂ ଆଇପି ୟୁନିଭର୍ସିଟି ଦେବ। ସମସ୍ତ ୫ହଜାର ଯୁବବର୍ଗଙ୍କୁ ଦିଲ୍ଲୀର ୯ଟି ବଡ଼ ମେଡିକାଲ ଇନ୍‌ଷ୍ଟିଚ୍ୟୁଟରେ ସାଧାରଣ ତାଲିମ୍‌ ପ୍ରଦାନ କରାଯିବ। ଏହି ଯୁବବର୍ଗ ଡାକ୍ତର ଓ ନର୍ସଙ୍କ ନିର୍ଦ୍ଦେଶରେ କାମ କରିବେ। ହୋମ୍‌ କେୟାର କିମ୍ବା ପ୍ରାଥମିକ ଚିକିତ୍ସାରେ ସେମାନଙ୍କ ସହାୟତା ନିଆଯିବ ବୋଲି କେଜରିଓ୍ବାଲ କହିଛନ୍ତି। ଏତଦ୍‌ ବ୍ୟତୀତ ଟିକାକରଣ, ରକ୍ତଚାପ ଯାଞ୍ଚ, ଡାଏପର ବଦଳାଇବା ଓ ନମୁନା ନେବା ଆଦି କାର୍ଯ୍ୟ ଉପରେ ସେମାନଙ୍କୁ ଟ୍ରେନିଂ ଦିଆଯିବ। ସେମାନେ ଯେତେଦିନ ଯାଏ କାମ କରିବେ ସେତେ ଦିନର ଦରମା ଦିଆଯିବ। ଏଥିପାଇଁ ଜୁନ ୧୭ରୁ ଆବେଦନ ଗ୍ରହଣ କରାଯିବ ଏବଂ ଜୁନ ୨୮ରୁ ଟ୍ରେନିଂ ଆରମ୍ଭ ହେବ। ତେବେ ଉକ୍ତ ସ୍ବାସ୍ଥ୍ୟସହାୟକଙ୍କ ହେବା ପାଇଁ ଦ୍ୱାଦଶ ପାସ୍‌ ହେବା ସହ ୧୮ବର୍ଷରୁ ଊର୍ଦ୍ଧ୍ୱ ବୟସ ହୋଇଥିବା ଜରୁରୀ ବୋଲି କେଜରିଓ୍ବାଲ ଘୋଷଣା କରିଛନ୍ତି।