ୟାସ୍‌ ଯୋଗୁ ଜଳ ସମ୍ପଦ ବିଭାଗର ୮୭ କୋଟି କ୍ଷତି

ଭୁବନେଶ୍ୱର, ୧ା୬(ବ୍ୟୁରୋ): ବାତ୍ୟା ୟାସ୍‌ ଯୋଗୁ ଜଳ ସମ୍ପଦ ବିଭାଗର ୮୭ କୋଟି କ୍ଷୟକ୍ଷତି ହୋଇଛି। ବିଭାଗ ପକ୍ଷରୁ କରାଯାଇଥିବା ପ୍ରାଥମିକ ରିପୋର୍ଟ ଆକଳନ ଅନୁଯାୟୀ ବୃହତ୍‌ ଜଳ ସେଚନ ପ୍ରକଳ୍ପ ଏବଂ ଲୁଣାବନ୍ଧ ନଷ୍ଟ ହେବା ଯୋଗୁ ଯଥାକ୍ରମେ ୬୯.୧୮ କୋଟି ଟଙ୍କା ଏବଂ ଡ୍ରେନେଜ ପ୍ରକଳ୍ପ ପାଇଁ ୭.୬୬ କୋଟି ଟଙ୍କାର କ୍ଷତି ହୋଇଛି। ସେହିପରି ଉଠାଜଳସେଚନ ପ୍ରକଳ୍ପ ଏବଂ ମଧ୍ୟମ ଜଳସେଚନ ପ୍ରକଳ୍ପ ଯଥା କ୍ରମେ ୨.୬୩ କୋଟି ଏବଂ ୭.୦୮ କୋଟି ଟଙ୍କାର କ୍ଷତି ହୋଇଛି ବୋଲି ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ ଜ୍ୟୋତିର୍ମୟ ରଥ କହିଛନ୍ତି। ବର୍ଷା ଓ ସମୁଦ୍ର ଲହଡି ଯୋଗୁ ଏବେ ବି ବାଲେଶ୍ୱର ଜିଲାର କେତେକ ଅଞ୍ଚଳ ଜଳମଗ୍ନ ରହିଛି। ପାଣିଛାଡିବା ପରେ ଏ ନେଇ ଚୂଡାନ୍ତ ଆକଳନ କରାଯିବ ବୋଲି ସେ କହିଛନ୍ତି। ବିଭିନ୍ନ ବନ୍ଧରେ ୭୭ଟି ଘଳିଆ ହୋଇଥିଲା। ସେଗୁଡିକ ମଧ୍ୟରୁ ୩୫ଟିର ମରାମତି କରାଯାଇଛି।