ଭାରତୀୟଙ୍କୁ ବର୍ଣ୍ଣବୈଷମ୍ୟ ଆକ୍ଷେପ: ବଟଲର, ମୋର୍ଗାନଙ୍କ ବିରୋଧରେ ଇସିବିର ତଦନ୍ତ

ଲଣ୍ଡନ,୧୦।୬(ପି.ଟି.): ଭାରତୀୟଙ୍କ ବିରୋଧରେ ବର୍ଣ୍ଣବୈଷମ୍ୟ ଆକ୍ଷେପ କରି ଇଂଲଣ୍ଡ ସୀମିତ ଓଭର ଅଧିନାୟକ ଇଅନ ମୋର୍ଗାନ ଓ ଉଇକେଟକିପର ବ୍ୟାଟ୍ସମ୍ୟାନ ଜୋଶ ବଟଲର ଏବେ ହରଡ଼ଘଣାରେ ପଡିଛନ୍ତି। ବିଭିନ୍ନ ସୋସିଆଲ ମିଡିଆରେ ଭାରତୀୟମାନଙ୍କୁ ପରିହାସ କରି ଏହି ଦୁଇ କ୍ରିକେଟର ଟୁଇଟ୍‌ କରିଥିଲେ। ଏହି ଟୁଇଟ୍‌ରେ ବର୍ଣ୍ଣବୈଷମ୍ୟ ଆକ୍ଷେପ କରାଯାଇଥିବାର ଅଭିଯୋଗ ହୋଇଛି। ଏବେ ଏହି ଦୁଇ ତାରକା କ୍ରିକେଟର ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି)ର ତଦନ୍ତ ପରିସରଭୁକ୍ତ ହୋଇଛନ୍ତି। ଏମାନଙ୍କ ବିରୋଧରେ ଉଚିତ ତଥା ପ୍ରାସଙ୍ଗିକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଓ ପ୍ରତ୍ୟେକ ମାମଲା ବ୍ୟକ୍ତିଗତ ଅଧାରରେ ବିଚାର କରାଯିବ ବୋଲି ଇସିବି ସ୍ପଷ୍ଟ କରିଛି।
ଭାରତୀୟଙ୍କୁ ପରିହାସ କରି ବଟଲର ଓ ମୋର୍ଗାନ ‘ସାର’ ଶବ୍ଦ ବ୍ୟବହାର କରିଥିଲେ। ୨୦୧୨-୧୩ରେ ଦ୍ରୁତ ବୋଲର ଓଲି ରବିନଶନ ଆପତ୍ତିଜନକ ଟୁଇଟ୍‌ କରିଥିଲେ। ଫଳରେ ଇସିବ ତାଙ୍କୁ ସସ୍‌ପେଣ୍ଡ କରିଥିଲା। ଏହାକୁ ଭିତ୍ତିକରି ଏହି ଦୁଇ କ୍ରିକେଟର ଟୁଇଟ୍‌ କରି ଭାରତୀୟଙ୍କୁ ପରିହାସ କରିବାକୁ ପ୍ରୟାସ କରିଥିଲେ। ବଟଲର ଓ ମୋର୍ଗାନ ଉଭୟ ଇଣ୍ଡିଆନ ପ୍ରିମିୟର ଲିଗ୍‌ (ଆଇପିଏଲ୍‌)ରେ ଖେଳିଛନ୍ତି। ମୋର୍ଗାନ କୋଲକାତା ନାଇଟ୍‌ ରାଇଡର୍ସ ଓ ବଟଲର ରାଜସ୍ଥାନ ରୟାଲ୍ସ ତରଫରୁ ଏଥର ଆଇପିଏଲ୍‌ରେ ପ୍ରତିନିଧିତ୍ୱ କରିଥିଲେ। ଇତିମଧ୍ୟରେ ୨୦୧୦ରେ ଅଭିଜ୍ଞ ଦ୍ରୁତ ବୋଲର ଜେମ୍ସ ଆଣ୍ଡରସନ ସମଲିଙ୍ଗୀକୁ ନେଇ କରିଥିବା ଏକ ଟୁଇଟ୍‌କୁ ନେଇ ମଧ୍ୟ ଚର୍ଚ୍ଚା ସୃଷ୍ଟି ହୋଇଛି। ସେତେବେଳେ ସେ ଯୁବ ଦ୍ରୁତ ବୋଲର ଷ୍ଟୁଆର୍ଟ ବ୍ରଡ୍‌ଙ୍କୁ ନେଇ ଆପତ୍ତିଜନକ ମନ୍ତବ୍ୟ ଦେଇଥିଲେ। କ୍ରୀଡ଼ାରେ କୌଣସି ପ୍ରକାର ବର୍ଣ୍ଣବୈଷମ୍ୟବାଦକୁ ବରଦାସ୍ତ କରାଯିବ ନାହିଁ ବୋଲି ଇସିବି କହିଛି।