ଡୋଜ୍‌ ନେଲା ପରେ ବି ହେଉଛି କରୋନା: ବଢୁଛି ଚିନ୍ତା…

ଓ୍ବାଶିଂଟନ/ଲଣ୍ଡନ/ନୂଆଦିଲ୍ଲୀ,୧୬।୬: ପୃଥିବୀରେ କରୋନା ମହାମାରୀ ସଂକ୍ରମଣ ଯୋଗୁ ଆତଙ୍କ ଦେଖାଦେଇଛି। ସଂକ୍ରମଣରୁ ଦୂରେଇ ରହିବା ଲାଗି ଟିକାକରଣ ଅଭିଯାନ ଜାରି ରହିଛି। ତେବେ ଭାକ୍ସିନ୍‌ର ଦୁଇ ଡୋଜ୍‌ ନେବା ପରେ ବି ଲୋକେ କରୋନାରେ ପୁଣି ଆକ୍ରାନ୍ତ ହେଉଛନ୍ତି। ତେଣୁ ସୁରକ୍ଷା ନେଇ ଅନ୍ତର୍ଜାତୀୟସ୍ତରରେ ଚିନ୍ତା ବଢ଼ିବାରେ ଲାଗିଛି। ୨୦୨୦ ଡିସେମ୍ବରରେ ବ୍ରିଟେନ୍‌ରେ ପ୍ରଥମ ଟିକାକରଣ ଅଭିଯାନ ଆରମ୍ଭ ହୋଇଥିଲା। ଇତିମଧ୍ୟରେ ୭ ମାସ ବିତିଛି। ପୃଥିବୀର ବିଭିନ୍ନ ଦେଶର ବୈଜ୍ଞାନିକ ୧୦୦ରୁ ଅଧିକ ଭାକ୍ସିନ୍‌ ତିଆରି କରିବାରେ ବ୍ୟସ୍ତ ଅଛନ୍ତି। ଇତିମଧ୍ୟରେ ୨୩୦ କୋଟି ଲୋକଙ୍କୁ ଭାକ୍ସିନ୍‌ର ଡୋଜ୍‌ ପ୍ରଦାନ କରାଯାଇଛି। ଭାରତରେ ଜୁନ୍‌ ୧୫ ସୁଦ୍ଧା ୨୬ କୋଟି ୧୯ ଲକ୍ଷ ୭୨ ହଜାର ୧୪ ଲୋକଙ୍କୁ ଟିକାଦାନ କରାଯାଇ ସାରିଛି। ମୋଟ ଜନସଂଖ୍ୟାର ୩.୫ ପ୍ରତିଶତ ଅର୍ଥାତ୍‌ ୪.୭୨ କୋଟି ଲୋକଙ୍କୁ ଭାକ୍ସିନ୍‌ର ଉଭୟ ଡୋଜ୍‌ ଦିଆଯାଇଛି। କରୋନା ମହାମାରୀର ଏନ୍ତୁଡ଼ିଶାଳ ପାଲଟିଥିବା ଚାଇନାରେ ଇତିମଧ୍ୟରେ ୯୦ କୋଟି ଡୋଜ୍‌ ପ୍ରଦାନ କରାଯାଇଛି। ଟିକାଦାନରେ ଏହାପଛକୁ ଆମେରିକା ରହିଛି। ଆମେରିକାରେ ୩୧ କୋଟିରୁ ଅଧିକ ଡୋଜ୍‌ ପ୍ରଦାନ କରାଯାଇ ସାରିଛି। ଏଠାରେ ଦେଶର ୪୪ ପ୍ରତିଶତ ଜନସଂଖ୍ୟାଙ୍କୁ ଭାକ୍ସିନ୍‌ର ଦୁଇ ଡୋଜ୍‌ ଦିଆଯାଇଛି। ସେହିପରି ଇସ୍ରାଏଲ୍‌ରେ ୫୭ ପ୍ରତିଶତଙ୍କୁ ଭାକ୍ସିନ୍‌ର ଦୁଇ ଡୋଜ୍‌ ଦିଆଯାଇଛି। ଏଠାରେ ୭.୧୭ କୋଟି ଟିକା ଦିଆଯାଇଛି। ବ୍ରିଟେନ୍‌ରେ ୪୫ ପ୍ରତିଶତ ଜନସଂଖ୍ୟା ଅର୍ଥାତ୍‌ ୩ କୋଟିରୁ ଅଧିକଙ୍କୁ ଟିକାଦାନ କରାଯାଇଛି। ଫ୍ରାନ୍ସ୍‌ରେ ୪.୪୩ କୋଟିଙ୍କୁ ଭାକ୍ସିନ୍‌ ଦିଆଯାଇଛି। ଏଠାରେ ୨୧.୪ ପ୍ରତିଶତ ଜନସଂଖ୍ୟା ଅର୍ଥାତ୍‌ ୧.୪୪ କୋଟିଙ୍କଠାରେ ଦୁଇ ଡୋଜ୍‌ ଟିକାକରଣ ସମ୍ପନ୍ନ ହୋଇଛି। ରୁଷିଆରେ ୩.୨୯ କୋଟିଙ୍କୁ ଭାକ୍ସିନ୍‌ ଦିଆଯାଇଥିବାବେଳେ ୯.୯ ପ୍ରତିଶତ ଅର୍ଥାତ୍‌ ୧.୪୩ କୋଟିଙ୍କୁ ଉଭୟ ଡୋଜ୍‌ ଦିଆଯାଇଛି।