ଫିଫା ୱାର୍ଲଡ କପ୍‌ କ୍ୱାଲିଫାୟର: ବ୍ରାଜିଲର କ୍ରମାଗତ ପଞ୍ଚମ ବିଜୟ

ସାଓ ପାଉଲୋ,୬।୬(ଏପି): ଦକ୍ଷିଣ ଆମେରିକା ଫୁଟ୍‌ବଲ ପାଓ୍ବାର ହାଉସ୍‌ ରୂପେ ଜଣାଥିବା ବ୍ରାଜିଲ ଫିଫା ବିଶ୍ୱକପ୍‌ କ୍ୱାଲିଫାୟର ମ୍ୟାଚ୍‌ରେ ୨-୦ ଗୋଲରେ ଇକ୍ୱେଡରକୁ ପରାସ୍ତ କରିଛି। ଏଥିସହ ବ୍ରାଜିଲ ଦକ୍ଷିଣ ଆମେରିକା ବିଶ୍ୱକପ୍‌ କ୍ୱାଲିଫାଇଙ୍ଗ୍‌ରେ କ୍ରମାଗତ ୫ଟି ବିଜୟ ହାସଲ କରିଛି। ବ୍ରାଜିଲ ଏହି ରାଉଣ୍ଡ ରବିନ ଟୁର୍ନାମେଣ୍ଟରେ ୧୫ ପଏଣ୍ଟ ହାସଲ କରି ଶୀର୍ଷରେ ରହିଛି। ଦ୍ୱିତୀୟ ସ୍ଥାନରେ ଥିବା ଆର୍ଜେଣ୍ଟିନା ୧୧ ପଏଣ୍ଟ ପାଇଛି। ୨୦୨୨ରେ କାତାରରେ ଆୟୋଜନ ହେବାକୁ ଥିବା ଫିଫା ବିଶ୍ୱକପ୍‌ ପାଇଁ ବ୍ରାଜିଲ ସିଧାସଳଖ ଯୋଗ୍ୟତା ହାସଲ କରିବା ଏକପ୍ରକାର ନିଶ୍ଚିତ ହୋଇଛି। ଦକ୍ଷିଣ ଆମେରିକାରୁ ୪ଟି ଶ୍ରେଷ୍ଠ ଦଳ ବିଶ୍ୱକପ୍‌ ଯୋଗ୍ୟତା ହାସଲ କରିବେ।
ସ୍ଥାନୀୟ ବେରା- ରିଓ ଷ୍ଟାଡିୟମରେ ଶୁକ୍ରବାର ଖେଳାଯାଇଥିବା ଏହି କାତାର ବିପକ୍ଷ ମ୍ୟାଚରେ ବ୍ରାଜିଲ ପ୍ରଭାବ ବିସ୍ତାର କରି ଖେଳିଥିଲା। ବ୍ରାଜିଲ ତରଫରୁ ୬୫ତମ ମିନିଟ୍‌ରେ ରିଚାର୍ଲିଶନ ଗୋଲ କରି ଦଳକୁ ଅଗ୍ରଣୀ କରାଇଥିଲେ। ସେହିପରି ମ୍ୟାଚ୍‌ର ଶେଷ ମୁହୂର୍ତ୍ତରେ ଅର୍ଥାତ ଇଞ୍ଜୁରୀ ଟାଇମର ଚତୁର୍ଥ ମିନିଟ୍‌ରେ ପେନାଲ୍ଟି ଜରିଆରେ ନେମାରେ ଏକ ଚମତ୍କାର ଗୋଲ କରି ଦଳକୁ ୨-୦ ରେ ଜିତାଇଥିଲେ। ଅବଶ୍ୟ କୋଭିଡ୍‌-୧୯ ମହାମାରୀ କାରଣରୁ ଖେଳାଳିମାନେ ଏହି ମ୍ୟାଚ୍‌ ଖେଳିବାକୁ କୁଣ୍ଠାପ୍ରକାଶ କରିଥିଲେ।