ପୁରୁଷଙ୍କ ଗର୍ଭରେ ଶିଶୁ, ଏପରି କିପରି ହୁଏ, ଜାଣନ୍ତୁ…

ଲଣ୍ଡନ,୮।୬: ମହିଳାଙ୍କ ଗର୍ଭରେ ଶିଶୁ ସୃଷ୍ଟି ପାଇଁ ପ୍ରକୃତି ସମସ୍ତ ପ୍ରକାର ସୁବିଧା ସୁଯୋଗ ଖଞ୍ଜି ଦେଇଛି। ତେବେ ପୁରୁଷଙ୍କ ଶରୀରରେ ଏଭଳି ସ୍ଥିତି ସୃଷ୍ଟି ହେବା ପ୍ରାୟତଃ ଦେଖାଯାଇ ନ ଥାଏ। ତେବେ ଆଧୁନିକ ବିଜ୍ଞାନ ଯୋଗୁ ଏବେ ସବୁ ସମ୍ଭବ ହେଉଛି। କେତେକ ପୁରୁଷ ମହିଳାଙ୍କ ପରି ଗର୍ଭ ବେଦନା ସହିତ ଅନ୍ୟ ପାରିପାର୍ଶ୍ୱିକ ଅବସ୍ଥାକୁ ସହଜରେ ଅନୁଭବ କରିପାରନ୍ତି। ଏଭଳି ସ୍ଥିତିକୁ ଡାକ୍ତରୀ ଭାଷାରେ କୌଭାଡେ ସିଣ୍ଡ୍ରୋମ୍‌ କୁହାଯାଇଥାଏ। ଏକ୍ଷେତ୍ରରେ ପୁରୁଷଙ୍କ କ୍ଷେତ୍ରରେ ଗର୍ଭବତୀଙ୍କଠାରେ ଦୃଷ୍ଟିଗୋଚର ହେଉଥିବା ସମସ୍ତ ଲକ୍ଷଣ ମଧ୍ୟ ପରିପ୍ରକାଶ ହୋଇଥାଏ। ଗର୍ଭବତୀଙ୍କ ସହିତ ଅତି ଅନ୍ତରଙ୍ଗ ଭାବେ ଜଡ଼ିତ ଥିବା ପୁରୁଷ ସାଥୀଙ୍କଠାରେ ଗର୍ଭାବସ୍ଥାର ସମସ୍ତ ଲକ୍ଷଣ ପ୍ରକାଶ ପାଇଥାଏ। ଏହାକୁ ସହାନୁଭୁତି ଗର୍ଭବସ୍ଥା ମଧ୍ୟ କୁହାଯାଇଥାଏ। ବର୍ତ୍ତମାନ ସୁଦ୍ଧା ଏଭଳି ଅବସ୍ଥାକୁ ଚିକିତ୍ସା ବିଜ୍ଞାନରେ କୌଣସି ମାନସିକ ଡିଜ୍‌ଅର୍ଡର ଭାବେ ଗ୍ରହଣ କରାଯାଇ ନାହିଁ। ଲଣ୍ଡନର ସେଣ୍ଟ୍‌ ଜର୍ଜ ହସ୍ପିଟାଲରେ ହୋଇଥିବା ଏକ ଗବେଷଣା ରିପୋର୍ଟରେ ଏସମ୍ପର୍କରେ ଉଲ୍ଲେଖ କରାଯାଇଛି। କୌଭାଡେ ସିଣ୍ଡ୍ରୋମ୍‌ରେ ପୁରୁଷଙ୍କ ପେଟରେ ଗର୍ଭବତୀଙ୍କ ଭଳି ଯନ୍ତ୍ରଣା ହେବା ସହିତ ପେଟ ଫୁଲିବା, ପିଠି ଯନ୍ତ୍ରଣା, ଆଳସ୍ୟ ବୋଧ, ମର୍ନିଂ ସିକ୍‌ନେସ୍‌, ଦାନ୍ତ ଯନ୍ତ୍ରଣା, ଅଧିକ ଭୋକ ଲାଗିବା ଆଦି ଲକ୍ଷଣ ପ୍ରକାଶ ପାଇଥାଏ। ଗର୍ଭବତୀଙ୍କର ପ୍ରସବ ହେବାର କିଛି ଦିନ ପର୍ଯ୍ୟନ୍ତ ମଧ୍ୟ ସମ୍ପୃକ୍ତ ପୁରୁଷ ସାଥୀଙ୍କଠାରେ କେତେକ ଲକ୍ଷଣ ପ୍ରକାଶ ପାଇଥାଏ। ପରବର୍ତ୍ତୀ ସମୟରେ ଏହା ସମ୍ପୂର୍ଣ୍ଣ ଦୂର ହୋଇଥାଏ। ବିକଶିତ ଦେଶରେ କୌଭାଡେ ସିଣ୍ଡ୍ରୋମ୍‌ ପୁରୁଷଙ୍କଠାରେ ଅଧିକ ଦେଖିବାକୁ ମିଳିଥାଏ। ଆମେରିକା, ସ୍ବିଡେନ୍‌, ଥାଇଲାଣ୍ଡ୍‌ ଏବଂ ବ୍ରିଟେନ୍‌ରେ ପୁରୁଷଙ୍କଠାରେ ଏଭଳି ସ୍ଥିତି ଅଧିକ ଦୃଷ୍ଟି ଗୋଚର ହୋଇଥାଏ। ଗଭବତୀଙ୍କ ସହିତ ଭାବନାତ୍ମକଭାବେ ଅଧିକ ଜଡ଼ିତ ହେବା ଏବଂ ହରମୋନ୍‌ସ୍ତରରେ କେତେକ ପରିବର୍ତ୍ତନ ଯୋଗୁ କୌଭାଡେ ସିଣ୍ଡ୍ରୋମ୍‌ ସୃଷ୍ଟି ହୋଇଥାଏ ବୋଲି ରିପୋର୍ଟରେ ଦର୍ଶାଯାଇଛି।