କୋଭିଡ୍‌ କର୍ଫ୍ୟୁ ଯୋଗୁ ଫ୍ରେଞ୍ଚ୍‌ ଓପନ ପ୍ରେମୀଙ୍କ ଅସନ୍ତୋଷ

ପ୍ୟାରିସ, ୧୧ା୬(ଏପି): ଫ୍ରେଞ୍ଚ୍‌ ଓପନ ଗ୍ରାଣ୍ଡସ୍ଲାମ ଟେନିସରେ ବୁଧବାର ରାତି ୧୧ଟା ବେଳେ ଆକସ୍ମିକ କରୋନା ଭାଇରସ୍‌ କର୍ଫ୍ୟୁ ଜାରି ହେବାରୁ ଖେଳପ୍ରେମୀଙ୍କ ମହଲରେ ଏନେଇ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଲୋକେ ନୋଭାକ୍‌ ଜୋକୋଭିଚ୍‌ ବନାମ ମାଟେଓ ବେରେଟେନି କ୍ୱାର୍ଟରଫାଇନାଲ ମ୍ୟାଚ ଦେଖିବାକୁ ଆସିଥିଲେ। କର୍ଫ୍ୟୁ ଲାଗୁ ହେବା ପରେ ଷ୍ଟାଡିୟମରୁ ଦର୍ଶକ ଖାଲି କରିବାକୁ ପଡ଼ିଥିଲା। ୨୨ ମିନିଟ ବିଳମ୍ବରେ ଖେଳ ଆରମ୍ଭ ହୋଇଥିଲା ା ମହାମାରୀଜନିତ କଟକଣା କୋହଳ କରାଯିବା ପରେ ପ୍ରଥମେ ୧,୦୦୦ ଦର୍ଶକଙ୍କୁ ଅନୁମତି ମିଳିଥିଲା। ବୁଧବାର କୋର୍ଟ ଫିଲପ୍‌ ଚାଟ୍‌ରିଅରଠାରେ ମ୍ୟାଚ ଦେଖିବାକୁ ବୁଧବାର ୫,୦୦୦ ଦର୍ଶକଙ୍କୁ ଅନୁମତି ଦିଆଯାଇଥିଲା। ତେଣୁ ଆକସ୍ମିକ କରୋନା କର୍ଫ୍ୟୁ ଜାରି ପରେ ପରିସ୍ଥିତି କ’ଣ ହୋଇଥିବ ତାହା ସହଜେ ଅନୁମେୟ। ପରେ ଯେତେବେଳେ ମ୍ୟାଚ ଖେଳାଗଲା ଜୋକୋଭିଚ୍‌ ୬-୩, ୬-୨, ୬-୭(୫), ୭-୫ରେ ମ୍ୟାଚ୍‌ ଜିତିଥିଲେ। ଏଥିସହିତ ସେ ତାଙ୍କ ୪୦ତମ ଗ୍ରାଣ୍ଡସ୍ଲାମ ସେମିଫାଇନାଲରେ ପ୍ରବେଶ କରିଥିଲେ। ଜୋକୋଭିଚ୍‌ କହିଛନ୍ତି ମ୍ୟାଚ ବେଳେ ଦର୍ଶକଙ୍କଠାରୁ ଉତ୍ସାହ ମିଳିଲେ ଶକ୍ତି ବୃଦ୍ଧି ଘଟିଥାଏ। କର୍ଫ୍ୟୁରେ କେତେକ ସମର୍ଥକ ବିରକ୍ତି ପ୍ରକାଶ କରି କହିଥିଲେ ମ୍ୟାଚ ଦେଖିବା ଲାଗି ଆମେ ଟଙ୍କା ଖର୍ଚ୍ଚ କରିଛୁ, ତେଣୁ ଆମେ ଷ୍ଟାଡିୟମ ଛାଡ଼ିବୁ ନାହିଁ। କର୍ଫ୍ୟୁ ପାଇଁ ଉଭୟ ଖେଳାଳି ରାତି ୧୦ଟା ୫୫ରେ ଯେତେବେଳେ ସେମାନଙ୍କ ବ୍ୟାଗ୍‌ ସହ କୋର୍ଟ ପରିତ୍ୟାଗ କଲେ ଖେଳପ୍ରେମୀଙ୍କ ମଧ୍ୟରେ କୋଳାହଳ ସୃଷ୍ଟି ହୋଇଥିଲା। ଖେଳ ସ୍ଥଗିତ ରଖାଯିବା ବେଳେ ଶୀର୍ଷ ର଼୍ୟାଙ୍କିଙ୍ଗପ୍ରାପ୍ତ ଜୋକୋଭିଚ୍‌ ୨-୧ ସେଟ୍‌ରେ ଅଗ୍ରଣୀ ରହିଥିଲେ ଏବଂ ଚତୁର୍ଥ ସେଟ୍‌ରେ ୩-୨ରେ ଆଗୁଆ ରହିଥିଲେ।