ମହାନ କ୍ରିକେଟରଙ୍କ ଭବିଷ୍ୟବାଣୀ: ୪-୦ରେ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍‌ ଜିତିବ ବିରାଟବାହିନୀ

ନୂଆଦିଲ୍ଲୀ,୪।୬: ଇଂଲଣ୍ଡ ବିପକ୍ଷରେ ଖେଳାଯିବାକୁ ଥିବା ଆଗାମୀ ଟେଷ୍ଟ ସିରିଜରେ ବିରାଟ କୋହଲି ନେତୃତ୍ୱାଧୀନ ଭାରତୀୟ ଟିମ୍‌ ଭଲ ପ୍ରଦର୍ଶନ କରିବ। ଦଳ ଏହି ସିରିଜକୁ ୪-୦ରେ ଜିତିବ ବୋଲି ଦୃଢ଼ୋକ୍ତି ପ୍ରକାଶ କରିଛନ୍ତି ମହାନ କ୍ରିକେଟର ସୁନୀଲ ଗାଭାସ୍କର।

ଗାଭାସ୍କର କହିଛନ୍ତି, ଇଂଲଣ୍ଡରେ ଅଗଷ୍ଟେ ଏବଂ ସେପ୍ଟେମ୍ବର ମାସରେ ଭାରତ ଭଳି ଗରମ ଅନୁଭୂତ ହେବ। ଏହାର ଫାଇଦା ଅତିଥି ଟିମ୍‌କୁ ମିଳିବ। ଭାରତ ଏହି ସିରିଜ୍‌କୁ ୪-୦ରେ ଜିତିବ। ଚଳିତ ବର୍ଷ ଆରମ୍ଭରେ ଭାରତୀୟ ପିଚ୍‌ରେ ଖେଳି ଇଂଲଣ୍ଡର ଖେଳାଳିମାନେ ଅସନ୍ତୋଷ ପ୍ରକାଶ କରିଥିଲେ। ଏଣୁ ସେମାନେ ପଡ଼ିଆରେ ଘାସ ରଖିପାରନ୍ତି। ହେଲେ ତାହା ଚିନ୍ତାର ବିଷୟ ନୁହେଁ। ଭାରତ ପାଖରେ ଆକ୍ରମଣାତ୍ମକ ବୋଲର୍‌ ରହିଛନ୍ତି। ସେମାନେ ଇଂଲଣ୍ଡ ବ୍ୟାଟ୍ସମ୍ୟାନ୍‌ମାନଙ୍କୁ ଅଡୁଆରେ ପକାଇବେ ବୋଲି ସେ କହିଛନ୍ତି।

ପ୍ରକାଶ ଥାଉ କି, ଭାରତୀୟ ଟିମ୍‌ ଗୁରୁବାର ୟୁକେରେ ପହଞ୍ଚିଛି। ସେଠାରେ ପହଞ୍ଚିବା ପରେ ଖେଳାଳିମାନେ କ୍ୱାରାଣ୍ଟାଇନ୍‌ରେ ରହିଛନ୍ତି। ଏହି ଗସ୍ତକାଳରେ ଦଳ ନ୍ୟୁଜିଲାଣ୍ଡ ବିପକ୍ଷରେ ବିଶ୍ୱ ଟେଷ୍ଟ ଚାମ୍ପିୟନଶିପ୍‌ର ଫାଇନାଲ ମ୍ୟାଚ୍‌ ଖେଳିବ। ଏହାପରେ ଇଂଲଣ୍ଡ ବିପକ୍ଷରେ ୫ ମ୍ୟାଚ୍‌ ବିଶିଷ୍ଟ ଟେଷ୍ଟ ସିରିଜ୍‌ ଖେଳାଯିବ।