ଜମିରେ ଧାନ ଗଜା, ସହାୟତା ଦାବି

ମହାକାଳପଡ଼ା,୧୧।୬(ଡି.ଏନ୍‌.ଏ.): ବାତ୍ୟା ୟାସ୍‌ ଚାଷୀଙ୍କ ମେରୁଦଣ୍ଡ ଭାଙ୍ଗିଦେଇଛି। ବିଶେଷକରି ଚାଷୀଙ୍କ ପନିପରିବା ଓ ଖରାଦିନିଆ ଡାଳୁଅ ଧାନ ଉଜୁଡ଼ିଯାଇଛି। ଭାଗଚାଷୀମାନେ ଜମି ମାଲିକଙ୍କୁ ଫସଲ ଦେବାକୁ ଅସମର୍ଥ। ଅନ୍ୟପକ୍ଷରେ ଭାଗ ଚାଷୀମାନେ ସ୍ବୟଂ ସହାୟିକା ମହିଳା ଗୋଷ୍ଠୀରୁ ଋଣ ନେଇ ଚାଷରେ ଖର୍ଚ୍ଚ କରିଥିଲେ। ଏହି ଅର୍ଥ କେଉଁଠୁ ପୂରଣ କରିବେ ସେ ନେଇ ଭାଳେଣି ପଡିଛି। ଏଭଳି ଘଟିଛି, ମହାକାଳପଡ଼ା ବ୍ଲକ ବଳିପାଳ ପଞ୍ଚାୟତର ଅନ୍ଦୁଳି ଗ୍ରାମର ଭାଗଚାଷୀଙ୍କ କ୍ଷେତ୍ରରେ। ଭାଗଚାଷୀମାନଙ୍କ କହିବା କଥା, ଗଁା ମଠ ସମ୍ପତ୍ତିର ୧୨ ଏକର ଜମିରେ କେତେଜଣ ଭାଗଚାଷୀ ଚାଷ କରିଥିଲୁ। ରାସାୟନିକ ସାର, ଔଷଧ, ବିହନ, ହଳ ସମେତ ଅନ୍ୟ ବାବଦରେ ଖର୍ଚ୍ଚ କରିଥିଲୁ। ତେବେ ୟାସ୍‌ ପ୍ରଭାବରେ ପ୍ରବଳ ବର୍ଷା ସାଙ୍ଗକୁ ପବନ ବହିବା ଯୋଗୁ ଧାନଜମିିରେ ପାଣି ଜମି ଗଜା ହେବା ସହ ନଷ୍ଟ ହେଲା। ଯାହା କିଛି ଧାନ ଅଛି କାଟି ବାନ୍ଧିଲା ବେଳକୁ ଝଡି ପଡୁଛି। ଏହି ଗଜାଧାନକୁ ନିକଟ ରାସ୍ତାରେ ଖରାରେ ଶୁଖାଇ ଅମଳ କରିବୁ। କିନ୍ତୁ ଧାନ ରଙ୍ଗ ବେରଙ୍ଗ ହେବା ଦେଖାଯାଇଛି। ଘରୋଇ ଋଣ ନେଇ ଚାଷ କରିଥିଲେ ମଧ୍ୟ ଏଥିରେ ବହୁ କ୍ଷତି ହୋଇଛି। ସ୍ଥାନୀୟ ଗଁାର ତ୍ରିଲୋଚନ ମଳିକ, ସୁନାକର ମଳିକ, କେଶବ ମହାରଣା, ଅର୍ଜୁନ ରାଉତ, ଶଙ୍କର ଦାସ, ମଙ୍ଗୁଳି ରାଉତ, ସନାତନ ରାଉତ, ନାରାୟଣ ରାଉତ ଭାଗଚାଷୀମାନେ ସରକାରୀ ଭାବେ ତଦନ୍ତ କରି ସହାୟତା ଦେବା ପାଇଁ କହିଛନ୍ତି। ଏହି ଭାଗଚାଷୀଙ୍କୁ ବ୍ଲକ କୃଷି ବିଭାଗ ପକ୍ଷରୁ କୌଣସି କୃଷି ସଚେତନତା କି ସହାୟତା ମିଳିଲା ନାହିଁ। ଦୌଡି ଦୌଡି ବିଭାଗ ବିହନ ଦେଲା ନାହିଁ। ବାଧ୍ୟ ହୋଇ ଖୋଲା ବଜାରରୁ ଚଢା ଦରରେ ସଙ୍କରଜାତୀୟ ମମତା ପ୍ଲସ, ସିଲିକ୍‌ ଧାନ ବିହନ କିଣି ଚାଷ କରିଛୁ। ଘରୋଇ ଋଣ ଓ ଜମି ମାଲିକଙ୍କ ଭାଗ ଧାନ କେଉଁଠୁ ଆଣିବୁ ବୋଲି ଦୁଃଖର ସହ ସେମାନେ କହିଛନ୍ତି। ୩ ମାସ ଜମିରେ ପରିଶ୍ରମ କରି ଫଳାଇଥିବା ଫସଲକୁ ୟାସ୍‌ ନେଇଗଲା ବୋଲି ସେମାନେ କହିଛନ୍ତି।