କରୋନା ଆକ୍ରାନ୍ତ ଛୋଟପିଲାଙ୍କ ପାଇଁ ମାର୍ଗଦର୍ଶିକା ଜାରି: ରେମଡେସିଭିର ବ୍ୟବହାର ମନା…

ନୂଆଦିଲ୍ଲୀ,୧୦।୬: ଦେଶରେ କରୋନା ସଂକ୍ରମଣ ଯୋଗୁ ଆତଙ୍କ ଦେଖାଦେଇଛି। ସଂକ୍ରମଣରୁ ସୁରକ୍ଷା ଲାଗି ସାର୍ବଜନୀକ ଟିକାକରଣ ଜାରି ରହିଛି। ଏପରିସ୍ଥଳେ କେନ୍ଦ୍ର ସରକାରଙ୍କ ପକ୍ଷରୁ କରୋନା ଆକ୍ରାନ୍ତ ଶିଶୁଙ୍କ ପାଇଁ ମାର୍ଗଦର୍ଶିକା ପ୍ରକାଶ ପାଇଛି। ଛୋଟପିଲାଙ୍କ କ୍ଷେତ୍ରରେ ରେମଡେସିଭିର ବ୍ୟବହାର ମନା କରାଯାଇଛି। ରେମଡେସିଭିର ପାର୍ଶ୍ୱ ପ୍ରତିକ୍ରିୟା ଛୋଟ ପିଲାଙ୍କ ଉପରେ କିଭଳି ରହୁଛି ସେ ନେଇ ପ୍ରର୍ଯ୍ୟାପ୍ତ ତଥ୍ୟ ଉପଲବ୍ଧ ନ ଥିବାରୁ କେନ୍ଦ୍ରୀୟ ସ୍ବାସ୍ଥ୍ୟ ମନ୍ତ୍ରଣାଳୟ ଅଧିନରେ କାର୍ଯ୍ୟ କରୁଥିବା ସ୍ବାସ୍ଥ୍ୟ ସେବା ମହାନିର୍ଦ୍ଦେଶାଳୟ ପକ୍ଷରୁ କୁହାଯାଇଛି।

ସେହିପରି ଜରୁରୀ କ୍ଷେତ୍ରରେ ସିଟି ସ୍କାନ୍‌ କରାଯିବାକୁ ମହାନିର୍ଦ୍ଦେଶାଳୟ ପକ୍ଷରୁ ନିର୍ଦ୍ଦେଶ ଜାରି ହୋଇଛି। ବିନା ଲକ୍ଷଣ କ୍ଷେତ୍ରରେ ଷ୍ଟେରଏଡ୍‌ର ବ୍ୟବହାରକୁ ମଧ୍ୟ ମନା କରାଯାଇଛି। ଛୋଟ ପିଲାଙ୍କ ଅକ୍ସିଜେନ୍‌ ସ୍ତର ଯାଞ୍ଚ୍‌ ପାଇଁ ୬ ମିନିଟ୍‌ର ଓ୍ବାର୍କ ଆଉଟ୍‌ କରାଯିବାକୁ ମାର୍ଗଦର୍ଶିକାରେ କୁହାଯାଇଛି। ୯୪ ପ୍ରତିଶତରୁ କମ୍‌ ସାଚୁରେଶନ କ୍ଷେତ୍ର ହସ୍ପିଟାଲ୍‌ରେ ଭର୍ତ୍ତି କରାଯିବାକୁ ନିର୍ଦ୍ଦେଶ ଜାରି ହୋଇଛି।

ସାଧାରଣ କରୋନା ସଂକ୍ରମଣ ଲକ୍ଷଣ ପ୍ରକାଶ ପାଉଥିବା ଛୋଟ ପିଲାଙ୍କୁ ସେମାନଙ୍କ ଶରୀର ଓଜନର ପ୍ରତି କିଲୋଗ୍ରାମ୍‌ ହିସାବରେ ୧୦-୧୫ ମିଲିଗ୍ରାମ୍‌ ପାରାସିଟାମଲ ୪ରୁ ୬ ଘଣ୍ଟା ଅନ୍ତରରେ ଦେବାକୁ କୁହାଯାଇଛି। ମଧ୍ୟମ ଆକ୍ରାନ୍ତ କ୍ଷେତ୍ରରେ ଅକ୍ସିଜେନ ଦେବାକୁ ମାର୍ଗଦର୍ଶିକାରେ ଦର୍ଶାଯାଇଛି।