ଫୁଟୁଥିବା ଗରମ ପାଣିରେ ୩ କିଲୋ ଚିନି ମିଶାଇ ଶୋଇଥିବା ସ୍ବାମୀଙ୍କ ଉପରେ ଢାଳିଦେଲେ ସ୍ତ୍ରୀ, ଆଉ ତା’ ପରେ…

ଲଣ୍ଡନ,୧୮।୬: ଇଂଲଣ୍ଡର ଜଣେ ୫୯ ବର୍ଷୀୟା ମହିଳା ୮୧ ବର୍ଷୀୟ ବୃଦ୍ଧ ସ୍ବାମୀଙ୍କ ଉପରେ ଫୁଟୁଥିବା ଗରମ ପାଣିରେ ଚିନି ମିଶାଇ ଢାଳି ଦେବାରୁ ତାଙ୍କର ମୃତ୍ୟୁ ଘଟିଛି। ଏହି ମହିଳାଙ୍କ ନାମ କୋରିନା ବେସ୍‌। ସ୍ବାମୀଙ୍କ ସହ ୩୮ ବର୍ଷ ଧରି ସଂସାର କରିବା ପରେ କୌଣସି କଥାକୁ ନେଇ ପ୍ରବଳ ପାଟିତୁଣ୍ଡ ହୋଇଥିଲା। ଏଥିରେ ରାଗିଯାଇ କୋରିନା ସ୍ବାମୀଙ୍କ ଉପରେ ଖାଲି ଫୁଟନ୍ତା ଗରମପାଣି ଢାଳି ନ ଥିଲେ, ବରଂ ଏଥିରେ ୩ କେଜି ଚିନି ମିଶାଇ ଢାଳି ଦେଇଥିଲେ। ଏଥିରୁ ଜଣାପଡୁଛି ଯେ, ସେ ସ୍ବାମୀଙ୍କର କିପରି କ୍ଷତି କରିବାକୁ ପ୍ରସ୍ତୁତ ଥିଲେ। କାରଣ ଗରମପାଣିରେ ଚିନି ମିଶାଇଲେ ଏହା ଘାତକ ହୋଇଥାଏ। ଫଳରେ ଲୋକଙ୍କ ମୃତ୍ୟୁ ହେବା ସ୍ବାଭାବିକ। ଯାହାକି କୋରିନାଙ୍କ ସ୍ବାମୀଙ୍କ ଜୀବନ ନେଲା।

ସୂଚନାଯୋଗ୍ୟ, କୋରିନା ତାଙ୍କ ଝିଅଙ୍କ ସହିତ ମାର୍କେଟିଂ କରିବାକୁ ଯାଇଥିଲେ। ମାତ୍ର ସ୍ବାମୀ ତାଙ୍କୁ ଘରକୁ ଶୀଘ୍ର ଫେରିବା ପାଇଁ ଫୋନ୍‌ କରି ଡାକିଥିଲେ। ସେତେବେଳେ କୋରିନା ତାଙ୍କୁ କିଛି କହି ନ ଥିଲେ। ଘରକୁ ଫେରିବା ପରେ ଏହି କଥାକୁ ନେଇ ଝଗଡ଼ା ହୋଇଥିଲା। ଏଥିରେ ଉତ୍‌କ୍ଷିପ୍ତ ହୋଇ କୋରିନା ସ୍ବାମୀଙ୍କ ଜୀବନ ନେଇଗଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ କୋରିନାଙ୍କୁ ଗିରଫ କରିଛି।