ଭାକ୍ସିନକୁ ନେଇ ଲୋକଙ୍କ ମନରେ ରହିଛି ଅନ୍ଧବିଶ୍ୱାସ

ନୂଆଦିଲ୍ଲୀ,୨।୬: କରୋନା ସଙ୍କଟ ମଧ୍ୟରେ ଗୋଟିଏ ପଟେ ଟିକାକରଣ ଅଭିଯାନ ଯୁଦ୍ଧକାଳୀନ ସ୍ତରରେ ଜାରି ରହିଥିବା ବେଳେ ଅନ୍ୟପଟେ ଗ୍ରାମାଞ୍ଚଳରେ ଭାକ୍ସିନକୁ ନେଇ ଭୟ, ଅନ୍ଧବିଶ୍ୱାସ ଓ ଗୁଜବ ରହିଛି। ଏଥିଯୋଗୁ ଗାଁରେ ଟିକାକରଣ କାର୍ଯ୍ୟରେ ବାଧା ସୃଷ୍ଟି ହୋଇଛି। ଡିସେମ୍ବର ସୁଦ୍ଧା ଭାରତର ସମସ୍ତ ବୟସ୍କ ଲୋକଙ୍କୁ ଟିକାକରଣ କରିବାକୁ ସରକାର ଲକ୍ଷ୍ୟ ରଖିଛନ୍ତି। କିନ୍ତୁ ଗ୍ରାମାଞ୍ଚଳରେ ଏହାର ପରିସ୍ଥିତି ଭିନ୍ନ ରହିଛି। ଅନେକ ଗାଁଲୋକ ଏହି ଟିକାରଣକୁ ବିରୋଧ କରୁଛନ୍ତି। କାରଣ ଟିକାକରଣରେ ସୃଷ୍ଟି ହେଉଥିବା ପାର୍ଶ୍ୱ ପ୍ରତିକ୍ରିୟା ଏବଂ ଡୋଜ୍‌ ନେବା ପରେ ବି ଲୋକଙ୍କ ମୃତ୍ୟୁ ଯୋଗୁ ଏହି ଗୁଜବ ଅଧିକ ବ୍ୟାପିବାରେ ଲାଗିଛି। ଆଉ ଏହାର ମାଧ୍ୟମ ସାଜିଛି ସୋସିଆଲ ମିଡିଆ। ସୂଚନାଯୋଗ୍ୟ, ରାଜସ୍ଥାନ, ଲକ୍ଷ୍ନୌ, ବିହାର ଓ ମଧ୍ୟପ୍ରଦେଶ ଆଦି ରାଜ୍ୟର ସହରାଞ୍ଚଳରେ ଟିକାକରଣ ଅଭିଯାନ ଜୋରସୋରରେ ଚାଲିଛି। ହେଲେ କେତେକ ଗ୍ରାମାଞ୍ଚଳର ଲୋକେ ଏବେ ବି ଟିକା ନେଇନାହାନ୍ତି। ସେମାନଙ୍କ କହିବା କଥା ଟିକା ନେବା ପରେ ଅନେକ ଲୋକଙ୍କ ମୃତ୍ୟୁ ହେଉଥିବା ବେଳେ ଆଉ କେତେକଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହୋଇପଡ଼ୁଛି। ତେଣୁ ଆମେ ଟିକା କାହିଁକି ନେବୁ ବୋଲି ଗାଁଲୋକେ କହିଛନ୍ତି। ଅନ୍ୟପଟେ ସ୍ଥାନୀୟ ପ୍ରଶାସନ ଏହି ଗ୍ରାମାଞ୍ଚଳଗୁଡ଼ିକରେ ପହଞ୍ଚି ଟିକାକୁ ନେଇ ସେମାନଙ୍କ ମନରେ ଥିବା ଭୟ, ଅନ୍ଧବିଶ୍ୱାସ ଓ ଗୁଜବକୁ ଦୂର କରିବାକୁ ଉଦ୍ୟମ ଚଳାଇଛି। କିନ୍ତୁ ଏହାର ବ୍ୟାପକ ପ୍ରଭାବ ଏବେ ବି ଦେଖିବାକୁ ମିଳିନାହିଁ।