ପାଲଲହଡ଼ାକୁ ଅଣଦେଖା

ପାଲଲହଡ଼ା,୧୩।୬(ଡି.ଏନ୍‌.ଏ.)  ଅନୁଗୋଳ ଜିଲାର ସମସ୍ତ ପେଟ୍ରୋଲ ପମ୍ପରେ କରୋନା ସଂକ୍ରମିତଙ୍କ ଲାଗି ନିଃଶୁଳ୍କ ଅକ୍ସିଜେନ ବ୍ୟବସ୍ଥା କରାଯାଇଥିବା ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି। ହେଲେ ଏଥିରେ ପାଲଲହଡ଼ା ଉପଖଣ୍ଡକୁ ଅଣଦେଖା କରାଯାଇଥିବା ଅଭିଯୋଗ ହୋଇଛି। ଉପଖଣ୍ଡରେ ୯ ପେଟ୍ରୋଲ ପମ୍ପ ଥିବାବେଳେ ମାତ୍ର ଗୋଟିଏ ଫିଲିଂ ଷ୍ଟେଶନରେ ଏହି ସୁବିଧା ଉପଲବ୍ଧ। ଏଭଳି ପାତରଅନ୍ତର ନୀତିକୁ ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
କରୋନା ମହାମାରୀ ସମୟରେ ମେଡିକାଲ ବ୍ୟବହାରଯୋଗ୍ୟ ଅକ୍ସିଜେନର ଅଭାବ ପରିଲକ୍ଷିତ ହୋଇଛି। ଗୁରୁତର ରୋଗୀଙ୍କୁ ଅତ୍ୟାବଶ୍ୟକ ସମୟରେ ଅକ୍ସିଜେନ ଯୋଗାଣ ଲାଗି ଉଭୟ ସରକାରୀ ଏବଂ ବେସରକାରୀସ୍ତରରେ ତତ୍ପରତା ପ୍ରକାଶ ପାଇଛି। ରାଜ୍ୟର ଅନ୍ୟତମ କୋଭିଡ୍‌ ପ୍ରଭାବିତ ଅନୁଗୋଳ ଜିଲାରେ ତରଳ ଅମ୍ଳଜାନ ଅଭାବ ପୂରଣ କରିବା ଲାଗି ଜିଲା ପ୍ରଶାସନ ଏବଂ ଜିଲା ପେଟ୍ରୋଲ ପମ୍ପ ମାଲିକ ସଂଘ ଅଣ୍ଟା ଭିଡ଼ିଛି। ଜିଲାର ପ୍ରତି ପେଟ୍ରୋଲ ପମ୍ପରେ ନିଃଶୁଳ୍କ ଅକ୍ସିଜେନ ଯୋଗାଇ ଦେବା ପାଇଁ ବ୍ୟବସ୍ଥା କରାଯାଇଛି। ତଦନୁଯାୟୀ ଜିଲାରେ ୨୭ ପେଟ୍ରୋଲ ପମ୍ପରେ ୫୦ ଅକ୍ସିଜେନ ସିଲିଣ୍ଡର ଏବଂ ୪ କନ୍‌ସନ୍‌ଟ୍ରେଟର ଉପଲବ୍ଧ ରହିଥିବା ପ୍ରଶାସନ ପକ୍ଷରୁ ସର୍ବସାଧାରଣଙ୍କ ଅବଗତି ଲାଗି ସୂଚନା ଦିଆଯାଇଛି।
ତେବେ ପାଲଲହଡ଼ା ଉପଖଣ୍ଡର ୯ଟି ପେଟ୍ରୋଲ ପମ୍ପ ଥିଲେ ମଧ୍ୟ କେବଳ ଖମାର ଅଞ୍ଚଳର ସୌମ୍ୟପ୍ରକାଶ ପେଟ୍ରୋଲ ପମ୍ପକୁ ଏହି ସେବାରେ ସାମିଲ କରାଯାଇଛି। ଏହା ପାଲଲହଡ଼ାବାସୀଙ୍କ ପ୍ରତି ଜିଲା ପେଟ୍ରୋଲ ପମ୍ପ ମାଲିକ ସଂଘ ଏବଂ ଜିଲା ପ୍ରଶାସନର ବୈମାତୃକ ମନୋଭାବ ବୋଲି ସାଧାରଣରେ ଚର୍ଚ୍ଚା ଜୋର୍‌ ଧରିଛି। ଉପଖଣ୍ଡରେ ଦୈନିକ ସଂକ୍ରମିତଙ୍କ ସଂଖ୍ୟା ୨ ଅଙ୍କ ତଳକୁ ଖସୁନାହିଁ। ଗୁରୁତରଙ୍କ ସଂଖ୍ୟା ବଢ଼ିବାରେ ଲାଗିଛି। ଏପରି ସ୍ଥଳେ ଉପଖଣ୍ଡର ସମସ୍ତ ପେଟ୍ରୋଲ ପମ୍ପରେ ନିଃଶୁଳ୍କ ଅକ୍ସିଜେନ ସେବା ଆରମ୍ଭ କରିବାକୁ ସାଧାରଣରେ ଦାବି ହୋଇଛି।

ପରିତାପର ବିଷୟ
ପ୍ରଶାସନ ଉଦ୍ୟମରେ ଜିଲାର ପେଟ୍ରୋଲ ପମ୍ପଗୁଡ଼ିକରେ ନିଃଶୁଳ୍କ ଅକ୍ସିଜେନ ସେବା ଆରମ୍ଭ ହୋଇଛି। ପାଲଲହଡ଼ା ସଦରରେ ୪ଟି ପେଟ୍ରୋଲ ପମ୍ପ ଥିବା ସତ୍ତ୍ୱେ କୌଣସି ଗୋଟିଏରେ ଏହି ସେବା ଉପଲବ୍ଧ ନ ହେବା ପରିତାପର ବିଷୟ।
-ଦିବ୍ୟକିଶୋର ଗଡ଼ନାୟକ, ସଭାପତି, ୟୁଥ୍‌ ଫର୍‌ ପାଲଲହଡ଼ା

ଜିଲା ପ୍ରଶାସନର ଦୃଷ୍ଟି ଆକର୍ଷଣ କରାଯିବ
ଜିଲାର ସମସ୍ତ ପେଟ୍ରୋଲ ପମ୍ପରେ ନିଃଶୁଳ୍କ ଅକ୍ସିଜେନ ବ୍ୟବସ୍ଥା କରାଯିବା ସ୍ବାଗତଯୋଗ୍ୟ ପଦକ୍ଷେପ। କିନ୍ତୁ ପାଲଲହଡ଼ା ସଦର ବାସିନ୍ଦା ଏଥିରୁ ବଞ୍ଚତ୍ତ ହେବା ନିଶ୍ଚିତ ଭାବେ ଦୁର୍ଭାଗ୍ୟଜନକ। ଏଥିପ୍ରତି ଜିଲା ପ୍ରଶାସନର ଦୃଷ୍ଟି ଆକର୍ଷଣ କରାଯିବ।
-ଅଶୋକ ମହାନ୍ତି , ଭାଜପା ରାଜ୍ୟ କାର୍ଯ୍ୟକାରିଣୀ ସଦସ୍ୟ

ଖୁବ୍‌ଶୀଘ୍ର ସବୁ ଫିଲିଂ ଷ୍ଟେଶନରେ ସେବା
ପ୍ରଥମ ପର୍ଯ୍ୟାୟରେ ଜିଲାର ୪୦ ପେଟ୍ରୋଲ ପମ୍ପରେ ମାଗଣା ଅକ୍ସିଜେନ ସୁବିଧା କରାଯାଇଛି। ପ୍ରଶାସନ ଏବଂ ପେଟ୍ରୋଲ ପମ୍ପ ମାଲିକଙ୍କ ସହିତ ଆଲୋଚନା ପରେ ଏହି ନିଷ୍ପତ୍ତି ହୋଇଛି। ଖୁବ୍‌ଶୀଘ୍ର ଦ୍ୱିତୀୟ ପର୍ଯ୍ୟାୟରେ ଜିଲାର ସମସ୍ତ ଫିଲିଂ ଷ୍ଟେଶନରେ ଏହି ସେବା ଉପଲବ୍ଧ ହେବ।
-ବିଶ୍ୱଜିତ୍‌ ପଟ୍ଟନାୟକ, ସଭାପତି, ଜିଲା ପେଟ୍ରୋଲ ପମ୍ପ ମାଲିକ ସଂଘ