ଛତ୍ରପୁର ଅଞ୍ଚଳରେ ବଢୁଛି ବେଆଇନ ଇଟା ଭାଟି

ଛତ୍ରପୁର,୧୪।୬(ଡି.ଏନ୍‌.ଏ.): ଗଞ୍ଜାମ ଜିଲାର ଛତ୍ରପୁର ତହସିଲ ଅଞ୍ଚଳରେ ଦୀର୍ଘ ବର୍ଷ ଧରି ବେଆଇନ ଇଟା, ବାଲି, ମାଟି ବ୍ୟବସାୟ କାରବାର ବୃଦ୍ଧି ପାଉଛି। ସେହିପରି ପୋଟଲାମପୁର ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟରୁ ୧ କି.ମି ଦୂରରେ ବହୁ ଦିନ ଧରି ବେଆଇନ ଭାବେ ଇଟାଭାଟି ଛତୁ ଫୁଟିଲା ପରି ବଢ଼ି ଚାଲିଛି। ସେଠାକାର ଅଞ୍ଚଳରେ ବେଆଇନ ଭାବେ ଚାଷଜମିର ମାଟି ତାଡି ନେଇଯାଉଛନ୍ତି। ଯାହାଫଳରେ ଜମିର ଉର୍ବରତା ହ୍ରାସ ପାଉଛି। ରାତି ଅଧରେ ଜେସିବି ମେଶିନ ଦ୍ବାରା ମାଟି ଖୋଲାଖୋଲି ଭାବରେ ତଡ଼ାଯାଉଛି।
ଅପରପକ୍ଷରେ ଛତ୍ରପୁର ତହସିଲ ପ୍ରଶାସନ ପ୍ରତିକ୍ରିୟାଶୀଳ ହୋଇ ବେଆଇନ ଭାବେ ଗଚ୍ଛିତ ମାଟି ଗଦାକୁ ଜବତ କରିବା ସହ ନାଲି ପତାକା ମାରିଥିବା ଦେଖିବାକୁ ମିଳିଛି। ସରକାରୀ ନିୟମ ନିର୍ଦ୍ଦେଶନାମାକୁ ଉଲ୍ଲଙ୍ଘନ କରି ଜମି ମାଲିକମାନଙ୍କୁ କିଛି ପ୍ରଲୋଭନ ଦେଖାଇ ବେଆଇନ ମାଟି ଚାଲାଣ ବୃଦ୍ଧି ପାଉଛି। ଜମିର ୬ ଇଞ୍ଚ ଉର୍ବର ମାଟିକୁ ନେବା ପାଇଁ ମଧ୍ୟ କାହାକୁ ଅନୁମତି ନାହିଁ କି ଜମି ମାଲିକମାନଙ୍କର ମଧ୍ୟ ଇଞ୍ଚେ ମାଟି ବାହାର କରିବାର କ୍ଷମତା ନାହିଁ। ଲୋକେ କହିବା ପ୍ରକାରେ ସେହି ଅଞ୍ଚଳର ୨୦ ବର୍ଷ ପୂର୍ବେ ଜମି ବହୁତ ଉଚ୍ଚା ଥିଲା। କିନ୍ତୁ ବର୍ତ୍ତମାନ ପାଖାପାଖି ୪ ରୁ ୫ ଫୁଟ ଖାଲ ହୋଇଗଲାଣି। ଯାହା ଫଳରେ ଅଳ୍ପ ବନ୍ୟାରେ ଋଷିକୂଲ୍ୟା ନଦୀର ପାଣି ସହଜରେ ଚାଷଜମିରେ ମାଡ଼ି ଯାଉଛି।