ଏଇ ଭାରତରେ

ପଞ୍ଜାବର ଦୁଇ ମହିଳା ବନ ଅଧିକାରୀ କଳ୍ପନା କେ ଏବଂ ଏମ୍‌ ଗୀତାଞ୍ଜଳିଙ୍କର ପରିବେଶ ତଥା ଜୀବ ସୁରକ୍ଷା ପ୍ରତି ଶତ ପ୍ରତିଶତ ସମର୍ପିତ ଭାବ ଅନ୍ୟମାନଙ୍କ ପାଇଁ ପ୍ରେରଣା ନିଶ୍ଚୟ। କଳ୍ପନା ଡିଏଫ୍‌ଓ ଥିବାବେଳେ ଗୀତାଞ୍ଜଳି ବନ ସଂରକ୍ଷକ ଭାବେ ଦାୟିତ୍ୱ ନିର୍ବାହ କରୁଛନ୍ତି। ଏମାନେ ପଞ୍ଜାବର ଅବୋହର ମୁକ୍ତ ବନ୍ୟଜନ୍ତୁ ଅଭୟାରଣ୍ୟରେ କୃଷ୍ଣସାର ମୃଗଙ୍କ ସୁରକ୍ଷା ପାଇଁ ଦିନରାତି ଲାଗି ପଡ଼ିଛନ୍ତି। ୧୮,୬୫୦ ହେକ୍ଟର ପରିମିତ ଏହି ଅଭୟାରଣ୍ୟରେ ରହିଛି ୧୩ଟି ଗ୍ରାମ। ଏଠାରେ ବାସକରୁଛନ୍ତି ବିଷ୍ଣୋଇ ଜନଜାତିର ଲୋକ। କଳ୍ପନା ଓ ଗୀତାଞ୍ଜଳି ଏମାନଙ୍କୁ ସଚେତନ କରିବା ସହ ମୃଗ ଶିକାର ସମ୍ପୂର୍ଣ୍ଣ ବନ୍ଦ କରିପାରିଛନ୍ତି। ବିଷ୍ଣୋଇ ଜନଜାତିର ଲୋକମାନେ ଅଭୟାରଣ୍ୟରେ ଚାଷ କରି ଜୀବିକା ନିର୍ବାହ କରୁଛନ୍ତି। ମୃଗ କୃଷିର କ୍ଷତି କଲେ ସେଥିପାଇଁ ସ୍ବତନ୍ତ୍ର କ୍ଷତିପୂରଣ ପ୍ରଦାନ କରି ଗ୍ରାମବାସୀଙ୍କୁ ମୃଗ ଶିକାରରୁ ଦୂରେଇ ରଖିତ୍ପାରିଛନ୍ତି ଏହି ଦୁଇ ଅଧିକାରୀ। କୃଷ୍ଣସାରମୃଗଙ୍କୁ ବଞ୍ଚାଇବାରେ ଏହି ଅଭିଯାନକୁ ଭାରତୀୟ ବନ ସେବା ସଂଘ ପ୍ରଶଂସା କରିବା ସହ ଦୁହିଁଙ୍କୁ ‘ଗ୍ରୀନ୍‌ କୁଇନ୍‌ ଅଫ୍‌ ଇଣ୍ଡିଆ’ଆଖ୍ୟା ଦେଇଛି। କୌଣସି କାରଣରୁ ଆହତ ମୃଗଙ୍କ ଲଗି ୨୪ ଘଣ୍ଟିଆ ଚିକିତ୍ସା ବ୍ୟବସ୍ଥା ମଧ୍ୟ କରାଯାଇଛି ଓ ଆମ୍ବୁଲାନ୍ସ କେଜ୍‌ ବ୍ୟବସ୍ଥା ରହିଛିି। ଏହାଦ୍ୱାରା କୃଷ୍ଣସାର ମୃଗଙ୍କ ମୃତ୍ୟୁହାର ଯଥେଷ୍ଟ କମ୍‌ ହୋଇପାରିଛି।