‘ଭାରତ ଜିତିବ ବିଶ୍ୱ ଟେଷ୍ଟ ଚାମ୍ପିୟନଶିପ୍‌’

ମେଲବୋର୍ନ,୧୬ା୬(ପି.ଟି.)-ନ୍ୟୁଜିଲାଣ୍ଡ ବିପକ୍ଷ ବିଶ୍ୱ ଟେଷ୍ଟ ଚାମ୍ପିୟନଶିପ୍‌ ଫାଇନାଲରେ ଭାରତ ଅତି ସହଜରେ ବିଜୟ ଲାଭ କରିବ, ଏଥିରେ କୌଣସି ସନ୍ଦେହ ନାହିଁ ବୋଲି କହିଛନ୍ତି ଅଷ୍ଟ୍ରେଲିଆର ଟେଷ୍ଟ ଅଧିନାୟକ ଟିମ୍‌ ପେନ୍‌। ବିଶ୍ୱର ଏହି ଦୁଇ ଶ୍ରେଷ୍ଠ ଟେଷ୍ଟ ଦଳ ମଧ୍ୟରେ ଟାଇଟଲ ମୁକାବିଲା ଜୁନ୍‌ ୧୮ରେ ସାଉଥାମ୍ପଟନର ଏଜାସ୍‌ ବାଓଲରେ ହେବ। ପେନ୍‌ ଉଭୟ ନ୍ୟୁଜିଲାଣ୍ଡ ଓ ଭାରତ ବିପକ୍ଷରେ ଅଷ୍ଟ୍ରେଲିଆ ଦଳର ଅଧିନାୟକତ୍ୱ କରିଛନ୍ତି। ତାଙ୍କ ନେତୃତ୍ୱରେ ଅଷ୍ଟ୍ରେଲିଆ ୨୦୧୯ରେ ନିଜ ଦେଶରେ ନ୍ୟୁଜିଲାଣ୍ଡକୁ ୩-୦ରେ ପରାସ୍ତ କରିଥିଲା। ୨୦୨୦ ପ୍ରଥମ ଭାଗରେ ଭ୍ରମଣକାରୀ ଭାରତ ବିପକ୍ଷରେ ତାଙ୍କ ଦଳ ୧-୨ରେ ହାରିଯାଇଥିଲା। ନ୍ୟୁଜିଲାଣ୍ଡ ଏହି ମ୍ୟାଚ ପାଇଁ ଭଲରୂପେ ପ୍ରସ୍ତୁତ ହୋଇ ଆସିଛି। ଇଂଲଣ୍ଡ ବିପକ୍ଷରେ ୧-୦ରେ ସିରିଜ ବିଜୟୀ ମଧ୍ୟ ହୋଇଛି। କିନ୍ତୁ ଏସବୁକୁ ଗୁରୁତ୍ୱ ଦେଉନାହାନ୍ତି ପେନ୍‌। ସେ କହିଛନ୍ତି ନ୍ୟୁଜିଲାଣ୍ଡ ବିପକ୍ଷରେ ଇଂଲଣ୍ଡର ଯେଉଁ ଦଳ ଖେଳିଥିଲା ସେଥିରେ ଜୋସ୍‌ ବଟଲର, ପେସ୍‌ ବୋଲର ଜୋଫ୍ରା ଆର୍ଚର ଓ ଉଇକେଟକିପର ବେନ୍‌ ଫୋକ୍ସ ନ ଥିଲେ। ଏହାଛଡ଼ା ବେନ୍‌ ଷ୍ଟୋକ୍ସ, ଖ୍ରିସ୍‌ ଓକ୍ସ ଓ ମୋଇନ ଅଲୀଙ୍କ ଭଳି ଅଲରାଉଣ୍ଡର ଅନୁପସ୍ଥିତ ଥିଲେ।