ସାଉଥାମ୍ପଟନ,୪।୬ : ନ୍ୟୁଜିଲାଣ୍ଡ ବିପକ୍ଷ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ମ୍ୟାଚ୍ ପାଇଁ ସାଉଥାମ୍ପଟନର ଏଜେସ ବାଉଲଠାରେ ପହଞ୍ଚିଛି ଟିମ୍ ଇଣ୍ଡିଆ। ଖେଳାଳିମାନଙ୍କୁ ଏବେ ହାର୍ଡ କ୍ୱାରେଣ୍ଟିନରେ ରଖାଯାଇଛି। ଏପରି କି ସାଥି ଖେଳାଳିଙ୍କୁ ଭେଟିବାକୁ ଅନୁମତି ଦିଆଯାଉ ନାହିଁ। ଭାରତୀୟ ସ୍ପିନର ଅକ୍ଷର ପଟେଲ ଶୁକ୍ରାବର ଏହା ସ୍ପଷ୍ଟ କରିଛନ୍ତି। ୩ ଦିନିଆ ହାର୍ଡ କ୍ୱାରେଣ୍ଟିନ ପରେ ଖେଳାଳିଙ୍କ ଅଭ୍ୟାସ ଲାଗି ଅନୁମତି ମିଳିବ।
” ହୋଟେଲ ରୁମ୍ରେ ପହଞ୍ଚିବା ପରେ ଭଲ ନିଦ ହେଲା। ୩ ଦିନ ପର୍ଯ୍ୟନ୍ତ ପରସ୍ପରକୁ ନ ଭେଟିବା ପାଇଁ ଆମକୁ କୁହାଯାଇଛି। ଏଣୁ ଆମକୁ ସେପର୍ଯ୍ୟନ୍ତ କ୍ୱାରେଣ୍ଟିନରେ ରହିବାକୁ ପଡ଼ିବ “ ବୋଲି ବିସିସିଆଇ ପକ୍ଷରୁ ଶେୟାର କରାଯାଇଥିବା ଭିଡିଓରେ ଅକ୍ଷର କହିଛନ୍ତି।
ଉଭୟ ପୁରୁଷ ଓ ମହିଳା ଦଳ ଗୋଟିଏ ଚାର୍ଟର ଫ୍ଲାଇଟରେ ଲଣ୍ଡନରେ ପହଞ୍ଚିଥିଲେ। ସେଠାରୁ ବସ୍ ଯୋଗେ ପୁରୁଷ ଖେଳାଳିଙ୍କୁ ସାଉଥାମ୍ପଟନ ନିଆଯାଇଥିଲା।
