କୋଭିଡ୍‌ ଭୟରେ ୫ ବର୍ଷର ଝିଅଙ୍କୁ ୧୫ ଥର ଭୁଷିଲେ ଛୁରି

ଲଣ୍ଡନ,୨୫।୬: କୋଭିଡ୍‌-୧୯ ଭୟରେ ୩୬ ବର୍ଷୀୟା ମହିଳା ଭାରତୀୟ ବଂଶଦ୍ଭୋବ ୟୁକେରେ ନିଜ ଘରେ ୫ ବର୍ଷର ଝିଅକୁ ଅତି ନିର୍ମମ ଭାବେ ହତ୍ୟା କରିଥିଲେ। ଏହି ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି ଅଭିଯୁକ୍ତା ସୁଥା ସିଭନାନଥମ। କୋଭିଡ୍‌ରେ ଯଦି ତାଙ୍କ ମୃତ୍ୟୁ ହୁଏ, ତେବେ କୁନି ଝିଅ ବଞ୍ଚିବ କେମିତି। ଏହା ଚିନ୍ତା କରି ଝିଅକୁ ହତ୍ୟା କରିଥିବା ସେଠାକାର ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି।

ସାଉଥ୍‌ ଲଣ୍ଡନ ସ୍ଥିତ ଫ୍ଲାଟରେ ୫ ବର୍ଷୀୟା ଝିଅ ସାୟାଗିଙ୍କୁ ଗତ ବର୍ଷ ଜୁନ ୩୦ ତାରିଖରେ ୧୫ ଥର ଛୁରି ଭୁଷି ହତ୍ୟା କରିଥିଲେ ମା’ ସିଭନାନଥମ। ଏଥି ପୂର୍ବରୁ ନିଜକୁ ମଧ୍ୟ ଗଭୀର ଆଘାତ ଦେଇଥିଲେ। ସେ କୋଭିଡ୍‌ ଭୟରେ ଏଭଳି କରିଛନ୍ତି। ତାଙ୍କ କାର୍ଯ୍ୟ ପାଇଁ ସେ ଦାୟୀ ନୁହଁନ୍ତି ବୋଲି କହିଛନ୍ତି ଅଭିଯୁକ୍ତାଙ୍କ ସ୍ବାମୀ।

ଓଲ୍ଡ ବେଲି କୋର୍ଟରେ ଗୁରୁବାର ହାଜର ହୋଇ ଝିଅକୁ ହତ୍ୟା କରିଥିବା ଅସ୍ବୀକାର କରିଥିଲେ ସୁଥା। କିନ୍ତୁ ହାତ୍ୟାକାଣ୍ଡ ଲାଗି ନିଜକୁ ଦାୟୀ କରିଛନ୍ତି। ଏଥି ଯୋଗୁ ତାଙ୍କୁ ଅନିର୍ଦ୍ଦିଷ୍ଟ କାଳ ପାଇଁ ହସ୍ପିଟାଲରେ ରଖାଯିବ।

୨୦୦୬ରେ ବିବାହ କରିଥିବା ସୁଥା ୨୦୧୯ରୁ ମାନସିକ ରୋଗରେ ପୀଡ଼ିତ ଥିଲେ। ଘଟଣା ଦିନ ସ୍ବାସ୍ଥ୍ୟ ଠିକ୍‌ ନ ଥିବାରୁ ସ୍ବାମୀଙ୍କୁ ଅଫିସ ଯିବାକୁ ମନା କରିଥିଲେ। ସୁଥା ଝିଅକୁ ହତ୍ୟା କରିବା ପୂର୍ବରୁ ନିଜକୁ ଛୁରି ଭୁଷିଥିଲେ। ଅପରାହ୍ନ ୪ଟାରେ ସୁଥାଙ୍କୁ କ୍ଷତାକ୍ତ ଅବସ୍ଥାରେ ଦେଖି ପୋଲିସକୁ ଖବର ଦେଇଥିଲେ ପଡ଼ୋଶୀ। ପୋଲିସ ହେପାଜତକୁ ପଠାଯିବା ପୂର୍ବରୁ ସେ ଦୁଇ ମାସ ଧରି ହସ୍ପିଟାଲରେ ଚିକିତ୍ସାଧୀନ ଥିଲେ। ସୋସିଆଲ ଆଇସୋଲେଶନ ଓ ଲକ୍‌ଡାଉନ ତାଙ୍କ ମାନସିକ ଅବସ୍ଥାକୁ ବିଗାଡ଼ି ଦେଇଥିଲା ବୋଲି କହିଛନ୍ତି ସୁଥାଙ୍କ ଚିକିତ୍ସା କରୁଥିବା ମାନସିକ ରୋଗ ବିଶେଷଜ୍ଞ।