ଟିକା ନେବା ସତ୍ତ୍ୱେ ସଂକ୍ରମଣ: କାରଣ ଖୋଜିବ ୮ଜଣିଆ କମିଟି

ଭୁବନେଶ୍ୱର, ୨୦।୬(ବ୍ୟୁରୋ): କରୋନା ଲଢ଼େଇରେ ସବୁଠାରୁ ବଡ଼ ଅସ୍ତ୍ର ହେଉଛି ଟିକା। ବାରମ୍ବାର ପରୀକ୍ଷଣ ପରେ ଏବେ ଦେଶରେ କୋଭିଶିଲ୍ଡ ଓ କୋଭାକ୍ସିନ ଟିକା ଦିଆଯାଉଛି। ଅନୁମତି ପାଇଥିବା ଆଉ କେତେକ ଟିକାର ମାନବୀୟ ପରୀକ୍ଷଣ ଚାଲିଛି। ତେବେ ଟିକାର ଦୁଇ ଡୋଜ୍‌ ନେବା ପରେ ବି ଲୋକେ ସଂକ୍ରମିତ ହେଉଛନ୍ତି। ଜୀବନ ବି ଯାଉଛି। ଏହାର କାରଣ ଜାଣିବାକୁ ରାଜ୍ୟ ସରକାରଙ୍କ ପକ୍ଷରୁ ଆରମ୍ଭ ହୋଇଛି ପ୍ରକ୍ରିୟା। ଭୁବନେଶ୍ୱର ଜୀବ ବିଜ୍ଞାନ ପ୍ରତିଷ୍ଠାନ(ଆଇଏଲ୍‌ଏସ୍‌) ନିର୍ଦ୍ଦେଶକ ଡା. ଅଜୟ ପରିଡ଼ାଙ୍କ ଅଧ୍ୟକ୍ଷତାରେ ଏକ ୮ଜଣିଆ କମିଟି ଗଠିତ ହୋଇଛି। ଏହି କମିଟିର ପ୍ରଥମ ବୈଠକ ଶନିବାର ଅନୁଷ୍ଠିତ ହୋଇଯାଇଛି। ପ୍ରଥମ ଡୋଜ୍‌ କିମ୍ବା ଦ୍ୱିତୀୟ ଡୋଜ୍‌ ଟିକା ନେବାର କେତେ ଦିନ ପରେ ସଂକ୍ରମଣ ହେଉଛନ୍ତି ଓ କେତେ ଦିନ ପରେ ମୃତ୍ୟୁ ହେଉଛି ସେସବୁର ତର୍ଜମା କରିବ କିମଟି। ଓଡ଼ିଶାରେ ଟିକା ନେବାପରେ କେତେ ଲୋକଙ୍କର ମୃତ୍ୟୁ ହୋଇଛି ତାହାର ତର୍ଜମା ଚାଲିଛି। ଆବଶ୍ୟକ ପଡ଼ିଲେ ଅନ୍ୟ ବୈଷୟିକ କମିଟିର ସହାୟତା ନେବୁ ବୋଲି ଆଇଏଲ୍‌ଏସ୍‌ ନିର୍ଦ୍ଦେଶକ ଡା. ପରିଡ଼ା କହିଛନ୍ତି। ତେବେ ସମସ୍ତେ ସରକାରଙ୍କ କୋଭିଡ୍‌ ଗାଇଡ୍‌ଲାଇନକୁ ଠିକ୍‌ ଭାବେ ଅନୁପାଳନ କରିବାକୁ ସେ ପରାମର୍ଶ ଦେଇଛନ୍ତି।

ରାଜ୍ୟ ସ୍ବାସ୍ଥ୍ୟ ନିର୍ଦ୍ଦେଶକ ଡା. ବିଜୟ ମହାପାତ୍ର କହିଛନ୍ତି, ପରିବେଶରେ ସଂକ୍ରମଣ ରହିଥିବାରୁ ଲୋକେ ସଂକ୍ରମିତ ହେଉଛନ୍ତି। କିନ୍ତୁ ଟିକା ନେବା ପରେ ସିଭିୟରିଟି କମୁଛି। ଟିକା ନେଲେ କୋଭିଡ୍‌ ହେବ ନାହିଁ ବୋଲି ଏପରି କିଛି ନାହିଁ। ବିଭିନ୍ନ ଟିକା ୭୦ ରୁ ୯୦% ଭିତରେ କାର୍ଯ୍ୟ କରୁଛି। ଟିକା ନେବା ଦ୍ୱାରା ଆମ ଶରୀରରେ ରୋଗ ପ୍ରତିରୋଧକ ଶକ୍ତି ସୃଷ୍ଟି ହୋଇଥାଏ। ଓଡ଼ିଶାରେ ଟିକାର ଦୁଇଟି ଡୋଜ୍‌ ନେବା ପରେ କେତେଜଣ ସଂକ୍ରମିତ ହେଉଛନ୍ତି, ତାହା ଉପରେ ଅଧିକ ପରୀକ୍ଷା ନିରୀକ୍ଷା କରିବା ପାଇଁ ଗଠିତ ବୈଷୟିକ କମିଟି ବିଶେଷ କରି ୪ଟି ଦିଗ ଉପରେ କାର୍ଯ୍ୟ କରିବ ବୋଲି ସେ କହିଛନ୍ତି।

ସମଗ୍ର ଦେଶରେ ୬ଟି ଡେଲଟା ପ୍ଲସ ଭୂତାଣୁ ଚିହ୍ନଟ ହୋଇଛି। ଏଥିମଧ୍ୟରୁ ପଡୋଶୀ ଝାଡ଼ଖଣ୍ଡ ଓ ପଶ୍ଚିମବଙ୍ଗର ଦୁଇଟି ରହିଥିବା ଜଣାପଡ଼ିଛି। ସାରା ଦେଶରେ ଏବେ ୨୮ ଲାବରାଟୋରୀରେ ପାଖାପାଖି ୪୦ହଜାର ନମୁନାର ଜିନୋମ ସିକ୍ୟୁଏନ୍‌ସିଂ କରାଯାଉଛି। ଯେଉଁଥିରେ ଭୁବନେଶ୍ୱର ଜୀବ ବିଜ୍ଞାନ ପ୍ରତିଷ୍ଠାନ(ଆଇଏଲ୍‌ଏସ୍‌) ୪ ରାଜ୍ୟ ବିହାର, ଛତିଶଗଡ଼, ଓଡ଼ିଶା ଓ ଝାଡ଼ଖଣ୍ଡରୁ ଆସୁଥିବା ନମୁନାକୁ ନେଇ ଜିନମ ସିକ୍ୟୁଏନ୍‌ସିଂ ପରୀକ୍ଷା କରୁଥିବା ଆଇଏଲ୍‌ଏସ୍‌ ନିର୍ଦ୍ଦେଶକ ଡା. ଅଜୟ ପରିଡ଼ା କହିଛନ୍ତି। ତେବେ ଅଧିକ ସାମ୍ପୁଲର ଜିନମ ସିକ୍ୟୁଏନ୍‌ସିଂ କରାଗଲେ ଡେଲ୍‌ଟା ପ୍ଲସ ଭାଇରସର ସ୍ଥିତି କ’ଣ ରହିଛି ତାହା ଜଣାପଡ଼ିବ ବୋଲି ସେ କହିଛନ୍ତି।