ଗୋଟିଏ ଉଇକେଟ୍‌ ନେଇ ୨ ରେକର୍ଡ କଲେ ଇଶାନ୍ତ ଶର୍ମା: କପିଳ ଦେବଙ୍କୁ ପଛରେ ପକାଇଲେ

ସାଉଥମ୍ପଟନ,୨୧।୬: ବିଶ୍ୱ ଟେଷ୍ଟ ଚାମ୍ପିୟନଶିପ୍‌ର ଫାଇନାଲରେ ଇଶାନ୍ତ ଶର୍ମା ଏପର୍ଯ୍ୟନ୍ତ ଗୋଟିଏ ଉଇକେଟ ନେଇଛନ୍ତି। ସେ ନ୍ୟୁଜିଲାଣ୍ଡର ଓପନର୍‌ ଡେଭନ କନୱେଙ୍କୁ ଆଉଟ କରିଛନ୍ତି। ଏହି ଗୋଟିଏ ଉଇକେଟ୍‌ ନେଇ ସେ ତାଙ୍କ ନାମରେ ଦୁଇଟି ରେକର୍ଡ ସୃଷ୍ଟି କରିଛନ୍ତି। ସେ ଟିମ ଇଣ୍ଡିଆର କିମ୍ବଦନ୍ତୀ ବୋଲର କପିଲ ଦେବଙ୍କୁ ପଛରେ ପକାଇଛନ୍ତି।
ଇଂଲଣ୍ଡରେ ଇଶାନ୍ତଙ୍କ ୪୪ଟି ଉଇକେଟ ରହିଛି। ଏହିପରି ସେ ଇଂଲଣ୍ଡର ସର୍ବାଧିକ ଉଇକେଟ ନେଇଥିବା ଭାରତୀୟ ବୋଲର ହୋଇଥିଲେ। ସେ ଏପର୍ଯ୍ୟନ୍ତ ୧୩ଟି ମ୍ୟାଚ୍‌ର ୨୦ ଇନିଂସରେ ହାରାହାରି ୩୪ରେ ୪୪ ଉଇକେଟ ନେଇଛନ୍ତି। ଦୁଇଥର ପାଞ୍ଚଟି ଉଇକେଟ ନେଇ ସଫଳତା ହାସଲ କରିଛନ୍ତି। ପୂର୍ବରୁ ଇଂଲଣ୍ଡରେ ୧୩ଟି ମ୍ୟାଚର ୨୨ ଇନିଂସରେ କପିଲ ଦେବ ୪୩ ଉଇକେଟ ନେଇଥିଲେ। ତାଙ୍କ ହାରାହାରି ୩୯ ଥିଲା ଏବଂ ସେ ଦୁଇଥର ୫ଟି ଉଇକେଟ ନେଇଥିଲେ। ଅନିଲ କୁମ୍ବଲେ (୩୬) ତୃତୀୟ, ବିଶନ ସିଂ ବେଦୀ (୩୫) ଚତୁର୍ଥ ଏବଂ ଜହିର ଖାନ (୩୧) ପଞ୍ଚମ ସ୍ଥାନରେ ଅଛନ୍ତି।
ସେହିପରି ଇଶାନ୍ତଙ୍କ ଦ୍ୱିତୀୟ ରେକର୍ଡ ହେଉଛି ବିଦେଶରେ ଖେଳିଥିବା ଟେଷ୍ଟରେ ସେ ୨୦୦ ଉଇକେଟ୍‌ ନେଇଛନ୍ତି ସେ ଏହା କରିବାରେ ଚତୁର୍ଥ ଭାରତୀୟ ବୋଲର ହୋଇଥିଲେ। ୬୧ଟି ମ୍ୟାଚରେ ଇଶାନ୍ତ ୨୦୦ ଉଇକେଟ୍‌ ନେଇଛନ୍ତି। ସେ ପାଞ୍ଚ ଥର ୯ରୁ ଅଧିକ ଏବଂ ଥରେ ୧୦ ଉଇକେଟ ନେଇ ସଫଳତା ହାସଲ କରିଛନ୍ତି। ଏହା ବ୍ୟତୀତ ଅନିଲ କୁମ୍ବଲେ (୨୬୯), କପିଲ ଦେବ (୨୧୫) ଏବଂ ଜହିର ଖାନ (୨୦୭) ମଧ୍ୟ ବିଦେଶରେ ୨୦୦ରୁ ଅଧିକ ଉଇକେଟ ନେଇଛନ୍ତି।