ଜୀବନ ସହ ସଂଘର୍ଷ କରୁଛନ୍ତି ଯଦୁମଣି

ବାଣପୁର,୧୩ା୬(ଡି.ଏନ୍‌.ଏ.): ଖୋର୍ଦ୍ଧା ଜିଲା ବାଣପୁର ବ୍ଲକ ଆୟତପୁର ପଞ୍ଚାୟତର ପାତ୍ରପୁର ଗ୍ରାମର ଯଦୁମଣି ନାୟକ(୪୫)। ସ୍ତ୍ରୀ ସୁକୁମାରୀ, ଗୋଟିଏ ଝିଅ ଓ ପୁଅ ଏବଂ ବିଧବା ମା’ଙ୍କୁ ନେଇ ତାଙ୍କ ପରିବାର। ବାହାର ରାଜ୍ୟରେ ଶ୍ରମିକ ଭାବେ କାର୍ଯ୍ୟ କରି ପରିବାର ଚଳାଇଥାନ୍ତି। ହଠାତ୍‌ ତାଙ୍କ ଶରୀର ଅସୁସ୍ଥ ହେବାରୁ ଗଁାକୁ ଫେରି ଆସିଥିଲେ। ସ୍ଥାନୀୟ ଡାକ୍ତରଖାନାରେ ଚିକିତ୍ସା କରାଇଥିଲେ ମଧ୍ୟ ରୋଗ ସମ୍ପର୍କରେ ଜାଣିପାରି ନ ଥିଲେ। ପରେ ଭୁବନେଶ୍ୱର ଏମ୍‌ସ ହସ୍ପିଟାଲରେ ଦେଖାଇବା ପରେ ତାଙ୍କ ପେଟରେ ଏକ ଟ୍ୟୁମର ଥିବା ଜଣାପଡ଼ିଥିଲା। ଘର ବନ୍ଧା ପକାଇବା ସହ ରଖିଥିବା ସଞ୍ଚିତ ଟଙ୍କା ଯଦୁମଣିଙ୍କ ଚିକିତ୍ସାରେ ଖର୍ଚ୍ଚ ସାରିଲେଣି। ଘରର ଏକମାତ୍ର ରୋଜଗାରିଆ ଯଦୁମଣି ପ୍ରାୟ ୫ବର୍ଷ ହେବ ଜୀବନ ସହ ସଂଘର୍ଷ କରୁଛନ୍ତି। ଫଳରେ ପରିବାର ଚଳିବା କଷ୍ଟକର ହୋଇପଡିଛି। ଭୋକ ଉପାସରେ ସ୍ବାମୀର ଚିକିତ୍ସା ପାଇଁ ସ୍ତ୍ରୀ ସୁକୁମାରୀ ଏ ମେଡିକାଲରୁ ସେ ମେଡିକାଲକୁ ଦୌଡୁଛନ୍ତି। ଟ୍ୟୁମରର ଅପରେଶନ ପାଇଁ ସ୍ଥାନୀୟ ଜନପ୍ରତିନିଧି ଓ ପ୍ରଶାସନିକ ଅଧିକାରୀଙ୍କୁ ସହାୟତା ପାଇଁ ନିବେଦନ କରିଥିଲେ ମଧ୍ୟ ମିଳିଲା ନାହିଁ। ଅର୍ଥାଭାବ ତାଙ୍କ ଚିକିତ୍ସାରେ ବାଧକ ସାଜିଛି। ଅନ୍ୟପଟେ ଆର୍ଥିକ ଅନଟନ ଯୋଗୁୁ ପିଲାଙ୍କ ପାଠପଢ଼ାରେ ଡୋରି ବନ୍ଧା ହେବାକୁ ବସିଲାଣି। ଓଳିଏ ଖାଇଲେ ଓଳିିଏ ଉପବାସ ରହିବାକୁ ପଡୁଛି। ଫଳରେ ପରିବାର ଲୋକେ ଭାଗ୍ୟକୁ ଆଦରି ରହିଛନ୍ତି। ସରକାରୀ, ସାମାଜିକ ଅନୁଷ୍ଠାନ କିମ୍ବା ସହୃଦୟ ବ୍ୟକ୍ତି ସହାୟତା କଲେ ତାଙ୍କର ଅପରେଶନ ହୋଇପାରିବ ବୋଲି ଯଦୁମଣି କହିଛନ୍ତି।