ଷ୍ଟମ୍ପରେ ପିଟିପିଟି ଖେଳାଳିଙ୍କୁ ମାରିଦେଲେ

ରାୟଗଡ଼ା ଅଫିସ,୨୧ା୬: କ୍ରିକେଟ ଖେଳ ବେଳେ ଦୁଇ ଦଳ ମଧ୍ୟରେ ଗଣ୍ଡଗୋଳରୁ ଜଣେ ଖେଳାଳିଙ୍କ ଜୀବନ ଚାଳିଯାଇଛି। ରାୟଗଡ଼ା ଜିଲା କାଶୀପୁର ବ୍ଲକ୍‌ ମନୁଶୁ ପଞ୍ଚାୟତର ଗୁଞ୍ଜିଗଡ଼ା ଗ୍ରାମରେ ଏଭଳି ଘଟଣା ଘଟିଛି। ମୃତ ଖେଳାଳି ହେଲେ କଳାହାଣ୍ଡି ଜିଲା ଥୁଆମୂଳ ରାମପୁର ଅଞ୍ଚଳର ଦେବବ୍ୟାସ ନାୟକ(୧୭)।
ସୂଚନା ଅନୁଯାୟୀ, ଗୁଞ୍ଜିଗଡ଼ା ଗ୍ରାମରେ ଏକ କ୍ରିକେଟ ଟୁର୍ନାମେଣ୍ଟ ଚାଲିଥିଲା। ଭୁଲ ବୁଝାମଣାରୁ ବେନ୍ଦଲାପାସ ଏବଂ ରାମପୁରର ଡୁମେରପଦର ଦଳ ମଧ୍ୟରେ ଗଣ୍ଡଗୋଳ ହୋଇଥିଲା। ଏଥିରେ ବେନ୍ଦଲାପାସ ଦଳର ଖେଳାଳିମାନେ ଉତ୍ତ୍ୟକ୍ତ ହୋଇ ପ୍ରତିପକ୍ଷ ଦଳର ଖେଳାଳି ଦେବବ୍ୟାସଙ୍କୁ ଷ୍ଟମ୍ପ୍‌ରେ ଆକ୍ରମଣ କରିଥିଲେ। ଏଥିରେ ଦେବବ୍ୟାସଙ୍କ ମୁଣ୍ଡରେ ଶକ୍ତ ଆଘାତ ଲାଗିଥିଲା। ଫଳରେ ସେ ଚେତାଶୂନ୍ୟ ହୋଇପଡ଼ିଥିଲେ। ସାଥୀ ଖେଳାଳୀ ତାଙ୍କୁ ତୁରନ୍ତ କାଶୀପୁର ଡାକ୍ତରଖାନାକୁ ନେଇଥିଲେ। ପରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟ ଏବଂ ପରେ ଅବସ୍ଥା ସଙ୍କଟାପନ୍ନ ହେବାରୁ ବ୍ରହ୍ମପୁରକୁ ସ୍ଥାନାନ୍ତର କରାଯାଉଥିଲା। ବାଟରେ ତାଙ୍କର ମୃତ୍ୟୁ ଘଟିଥିଲା। ଏ ନେଇ ଦେବବ୍ୟାସଙ୍କ ବଡ଼ବାପା କାଶୀପୁର ଥାନାରେ ଏତଲା ଦେଇଛନ୍ତି। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରିଛି। କାଶୀପୁର ପୋଲିସ ବେନ୍ଦଲାପାସ ଦଳର ଖେଳାଳି ଗଙ୍ଗା ମାଝିକୁ ଅଟକ ରଖି ପଚରାଉଚୁରା କରୁଛି।