ଆଇନକୁ ହାତକୁ ନେଲେ ମାଜିଷ୍ଟ୍ରେଟ: ବୃଦ୍ଧ ବ୍ୟବସାୟୀଙ୍କୁ ମାଡ଼ ମାରିଲେ

ଝାରସୁଗୁଡ଼ା ଅଫିସ୍‌,୩।୬: ରାଜ୍ୟରେ କରୋନା ସଂକ୍ରମଣକୁ ରୋକିବା ପାଇଁ ଅନ୍ୟ ଜିଲା ଭଳି ଝାରସୁଗୁଡ଼ାରେ ମଧ୍ୟ ଲକ୍‌ଡାଉନ୍‌ ଓ ଶଟ୍‌ଡାଉନ୍‌ ଜାରି ରହିଛି। ଏହାକୁ ତଦାରଖ କରିବା ପାଇଁ ଜିଲାରେ ୧୭ଟି ସ୍କ୍ବାର୍ଡ ଗଠନ କରାଯାଇଛି। ଏଥିରେ ମାଜିଷ୍ଟ୍ରେଟ୍‌, ପ୍ରଶାସନିକ ଅଧିକାରୀ ଓ ପୋଲିସ ଅଧିକାରୀ ରହିଛନ୍ତି। ଏହି ସ୍କ୍ବାର୍ଡ ଜିଲାର ବିଭିନ୍ନ ଅଞ୍ଚଳ ଗ୍ରସ୍ତକରି କୋଭିଡ୍‌ ନିୟମ ସମ୍ପର୍କରେ ଲୋକଙ୍କୁ ସଚେତନତା କରିବା ସହ ଅମାନିଆଙ୍କୁ ସାବାଡ କରିବା ପାଇଁ ଜରିମାନା ଆଦାୟ କରୁଛନ୍ତି। ହେଲେ ସ୍କ୍ବାର୍ଡର ଜଣେ ମାଜିଷ୍ଟ୍ରେଟ୍‌ ଲୋକଙ୍କୁ ସଚେତନ କରିବା ଓ ଅମାନିଆଙ୍କୁ ଜରିମାନା କରିବା ପରିବର୍ତ୍ତେ ଦବଙ୍ଗଗିରି ଦେଖାଇ ଜଣେ ବୃଦ୍ଧ ବ୍ୟବସାୟୀ ଏବଂ ତାଙ୍କର ନାବାଳକ ପୁଅଙ୍କୁ ବାଡିରେ ମାଡ଼ ମାରିଥିବା ଅଭିଯୋଗ ହୋଇଛି। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।

ମାଜିଷ୍ଟ୍ରେଟ୍‌ ଜଣଙ୍କ ହେଉଛନ୍ତି ଝାରସୁଗୁଡ଼ା ଅତିରିକ୍ତ ତହସିଲଦାର ଯୋଗୀତା ତିର୍କୀ। ବୁଧବାର ମାଜିଷ୍ଟ୍ରେଟ୍‌ ତିର୍କୀ ହାତରେ ଏକ ବାଡି ଧରି ନିଜ ଗାଡିରେ ବାହାରି ଝାରସୁଗୁଡ଼ା ସହରର ବମ୍ବେ ଛକରେ ପହଞ୍ଚି ଥିଲେ। ସେଠାରେ ଜଣେ ବୃଦ୍ଧ ଏବଂ ତାଙ୍କର ନାବାଳକ ପୁଅ ତରଭୂଜ ବିକ୍ରି କରୁଥିଲେ। ନିୟମ ମୁତାବକ ପୂର୍ବାହ୍ନ ୧୧ଟାରେ ସେମାନେ ବେପାର ବନ୍ଦ ହେବା କଥା। ହେଲେ ଗାଡି ଆସି ନ ଥିବାରୁ ସେମାନେ ଛକରେ ଅପେକ୍ଷା କରିଥିଲେ। ଏହି ସମୟରେ ମାଜିଷ୍ଟ୍ରେଟ୍‌ ତିର୍କୀ ପ୍ରଥମେ ବୃଦ୍ଧ ବ୍ୟବସାୟୀଙ୍କୁ ଧମକ୍‌ଚମକ ଦେଇଥିଲେ। ବୃଦ୍ଧ ବ୍ୟବସାୟୀ ଜଣଙ୍କ କାକୁତି ମୀନତି ହୋଇଥିଲେ ମଧ୍ୟ ମାଜିଷ୍ଟ୍ରେଟ୍‌ କିଛି ଶୁଣି ନ ଥିଲେ। ପରେ ମାଜିଷ୍ଟ୍ରେଟ୍‌ ବୃଦ୍ଧ ଏବଂ ତାଙ୍କର ନାବାଳକ ପୁଅଙ୍କୁ ବାଡିରେ ମାଡ ମାରିଥିଲେ। ମାଜିଷ୍ଟ୍ରେଟ୍‌ ତିର୍କୀ ଆକ୍ସନମୁଡ୍‌ରେ ଆସି ବେହେରାମାଲ ଛକ ଓ କୋର୍ଟ ସମ୍ମୁଖରେ ବ୍ୟବସାୟୀଙ୍କୁ ଧମକ ଦେଇ ବାଡିରେ ମାଡ ମାରିଥିଲେ। ଏହି ମସସ୍ତ ଘଟଣାକୁ କିଛି ଲୋକ ମୋବାଇଲ୍‌ ଫୋନରେ ରେକଡ୍‌ କରି ସୋସିଆଲ ମିଡିଆରେ ପୋଷ୍ଟ କରିଥିଲେ। ବର୍ତ୍ତମାନ ଏହା ଭାଇରାଲ ହେଉଛି। ଏନେଇ ମାଜିଷ୍ଟ୍ରେଟ୍‌ଙ୍କ ମୋବାଇଲ ନମ୍ବରକୁ ଯୋଗଯୋଗ କରାଯାଇଥିବା ବେଳେ ସେ ଫୋନ ଉଠାଇ ନ ଥିଲେ। ଉପଜିଲାପାଳ ଶିବ ଟପ୍ପୋ ଏବଂ ତହସିଲଦାର କୁଳମଣି ରଣବିଡାଙ୍କୁ ଘଟଣା ସଂକ୍ରାନ୍ତରେ ପଚାରିବାରୁ ଏହି ସମ୍ପର୍କରେ ଜାଣି ନ ଥିବା କହିଛନ୍ତି।