ଚୁମ୍ବକମ୍ୟାନ ରାଜେନ୍ଦ୍ର

ସଜନାଗଡ଼, ୧୩।୬ (ଡି.ଏନ.ଏ.)-ତାଙ୍କ ଦେହରୁ ବାହାରୁଛି ଚୁମ୍ବକୀୟ ଶକ୍ତି। ଶରୀରରେ ଷ୍ଟିଲ ଚାମଚ, କଏନ ଯାହା ଲଗାଇଲେ ସେସବୁ ଲାଖି ରହୁଛି। କଥାଟା ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ। ଲୋକମାନେ ତାଙ୍କୁ ଏବେ ତାଙ୍କୁ ଚୁମ୍ବକମ୍ୟାନ୍‌ ବୋଲି ଡାକିବାକୁ ଆରମ୍ଭ କଲେଣି। ସେ ହେଲେ ବାଲେଶ୍ୱର ଜିଲା ନୀଳଗିରି ବ୍ଲକ ଜାମୁଡ଼ିହା ପଞ୍ଚାୟତ ଅଧୀନ ମଲ୍ୟାଣି ଗାଁର ରାଜେନ୍ଦ୍ର ମହାପାତ୍ର।
ଉକ୍ତ ଗ୍ରାମରେ କେତେଜଣ କରୋନା ଟିକା ନେବା ପରେ ସେମାନଙ୍କ ଦେହରେ ଚୁମ୍ବକୀୟ ଶକ୍ତି ଜାତ ହେଉଥିବା କୁହାକୁହି ହେଉଥିଲେ। ଏ ବିଷୟ ଶୁଣିବା ପରେ ରାଜେନ୍ଦ୍ରଙ୍କ ମନରେ କୌତୁହଳ ସୃଷ୍ଟି ହେଲା। ସେ ଏପ୍ରିଲ ୨୬ରେ ଟିକା ନେଇଥିବାରୁ ଏକଥାର ସତ୍ୟତା ଜାଣିବା ପାଇଁ ନିଜ ଦେହରେ ଚାମଚ, କଏନ୍‌ ଆଦି ଲଗାଇ ରଖିଥିଲେ। ସେସବୁ ଲାଖି ରହିଥିଲା। ପ୍ରଥମେ ଏକଥା ନିଜେ ମଧ୍ୟ ବିଶ୍ୱାସ କରିପାରି ନ ଥିଲେ। ଭାବୁଥିଲେ ଝାଳ ପାଇଁ ବୋଧହୁଏ ଏଭଳି ହୋଇଥାଇପାରେ। ପରେ ପୁଣି ଥରେ ଦେହସାରା ପୋଛାପୋଛି କରି ଷ୍ଟିଲ୍‌ ଓ ଅନ୍ୟ ଧାତବ ଜିନିଷ ଲଗାଇଲେ ମଧ୍ୟ ତାହା ଶରୀରରେ ଲାଖି ରହିଥିଲା। ଏହି ଘଟଣା ପ୍ରଚାରିତ ହେବା ପରେ ରାଜେନ୍ଦ୍ରଙ୍କ ଘରକୁ ଲୋକଙ୍କ ସୁଅ ଛୁଟିଛି। ସେପେଟ ଟିକା ନେବା ପରେ ଏଭଳି ପାର୍ଶ୍ୱ ପ୍ରତିକ୍ରିୟା ଘଟିଥାଇପାରେ ବୋଲି ଭାବି ଲୋକମାନେ ଭୟଭୀତ ହୋଇପଡ଼ିଛନ୍ତି।