ଭାରତୀୟ କ୍ରିକେଟର ସ୍ବର୍ଣ୍ଣିମ ଦିନ

ନୂଆଦିଲ୍ଲୀ,୨୩।୬: ଠିକ୍‌ ୮ ବର୍ଷ ତଳେ ଅର୍ଥାତ ୨୦୧୩ ଜୁନ ୨୩ ତାରିଖରେ ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଟିମ୍‌ ଇଣ୍ଡିଆ ହାତେଇଥିଲା ଆଇସିସି ଚାମ୍ପିୟନ୍ସ ଟ୍ରଫି। ବର୍ଷା ବାଧାପ୍ରାପ୍ତ ଫାଇନାଲ ମ୍ୟାଚ୍‌ରେ ଇଂଲଣ୍ଡକୁ ୫ ରନ୍‌ରେ ହରାଇ ଇତିହାସ ରଚିଥିଲା ଭାରତ।

ବାରମ୍ବାର ବର୍ଷା କାରଣରୁ ୫୦ ଓଭରିଆ ମ୍ୟାଚ୍‌କୁ ଟି୨୦ ଭିତ୍ତିରେ ଖେଳାଯାଇଥିଲା। ଟସ୍‌ ଜିତି ଫିଲ୍ଡିଂ ବାଛିଥିଲା ଇଂଲଣ୍ଡ। ଟିମ୍‌ ଇଣ୍ଡିଆ ୨୦ ଓଭରରେ ୭ ଉଇକେଟ ହରାଇ ୧୨୯ ରନ୍‌ କରିବାକୁ ସକ୍ଷମ ହୋଇଥିଲା। ୪୩ ରନ୍‌ର ଆଖିଦୃଶିଆ ପାଳି ଖେଳିଥିଲେ ବିରାଟ କୋହଲି। ତାଙ୍କ ଇନିଂସରେ ସାମିଲ ଥିଲା ୪ ଚୌକା ଓ ଗୋଟିଏ ଛକା। ଶେଷ ଆଡ଼କୁ ରବୀନ୍ଦ୍ର ଜାଡେଜା ଧୂଆଁଦାର ୩୩ ରନ୍‌ର ପାଳି ଖେଳିଥିଲେ।

୧୩୦ ରନ୍‌ର ବିଜୟଲକ୍ଷ୍ୟର ପିଛା କରୁଥିବା ଇଂଲଣ୍ଡ ୪୬ ରନ୍‌ ମଧ୍ୟରେ ୪ ଉଇକେଟ ସଙ୍କଟରେ ପଡ଼ିଥିଲା। କିନ୍ତୁ ଇଆନ ମୋର୍ଗାନ ଓ ରବି ବୋପାରା ୫ମ ଉଇକେଟ ପାଇଁ ୬୪ ରନ୍‌ ଯୋଡ଼ିଥିଲେ। ଚାମ୍ପିୟନ୍ସ ଟ୍ରଫି ଠାରୁ ମାତ୍ର ୨୦ ରନ୍‌ ଦୂରରେ ଥିଲା ଇଂଲଣ୍ଡ। କିନ୍ତୁ ଲଗାତାର ମୋର୍ଗାନ (୩୩) ଓ ବୋପାରା (୩୦)ଙ୍କୁ ଆଉଟ୍‌ କରି ମ୍ୟାଚ୍‌ର ଫଳାଫଳ ବଦଳି ଦେଇଥିଲେ ଇଶାନ୍ତ ଶର୍ମା। ଦୁହେଁ ଆଉଟ୍‌ ହେବା ପରେ ମ୍ୟାଚ୍‌କୁ ଫେରି ପାରି ନ ଥିଲା ଇଂଲଣ୍ଡ। ଏହି ଟ୍ରଫି ସହ ଧୋନୀ କ୍ରିକେଟ ଇତିହାସର ପ୍ରଥମ ଅଧିନାୟକ ଭାବେ ଆଇସିସିର ସମସ୍ତ ଟ୍ରଫି (୫୦ ଓଭରିଆ ବିଶ୍ୱକପ୍‌, ଟି୨୦ ବିଶ୍ୱକପ୍‌ ଓ ଚାମ୍ପିୟନ୍ସ ଟ୍ରଫି) ନିଜ ନାମରେ କରିଥିଲେ।