ପନ୍ତଙ୍କ ଅପରାଜିତ ଶତକ, ଶୁବମନ ୮୫

ସାଉଥାମ୍ପଟନ, ୧୩ା୬ (ପି.ଟି.)-ଏଠାରେ ଭାରତୀୟ କ୍ରିକେଟ ଦଳର ଇଣ୍ଟ୍ରା-ସ୍କ୍ବାଡ ମ୍ୟାଚ୍‌ରେ ରିଷଭ ପନ୍ତ ଅପରାଜିତ ଶତକ ହାସଲ କରିଥିବାବେଳେ ଓପନର ଶୁବମନ ଗିଲ୍‌ ଆକର୍ଷଣୀୟ ୮୫ରନ ସହ ଭଲରୂପେ ଓ୍ବାର୍ମ ଅପ୍‌ ହୋଇଛନ୍ତି। ବିରାଟ କୋହଲି ଓ କେଏଲ୍‌ ରାହୁଲ ଦୁଇଟି ଦଳର ନେତୃତ୍ୱ ନେଇଥିଲେ। ପ୍ରଥମ ଦଳରେ ଭଲ ବ୍ୟାଟ୍ସମ୍ୟାନ ଓ ନିୟମିତ ବୋଲର ରହିଥିଲେ। ଅନ୍ୟଟିରେ ରାହୁଲ, ରିଦ୍ଧିମାନ ଓ ହନୁମା ବିହାରୀଙ୍କ ଭଳି ରିଜର୍ଭ ଖେଳାଳି ପ୍ରତିନିଧିତ୍ୱ କରିଥିଲେ। ଫର୍ମରେ ଥିବା ପନ୍ତ ସ୍ପିନରଙ୍କ ସମେତ ସମସ୍ତ ବୋଲରଙ୍କୁ ପ୍ରହାର କରିଥିଲେ। ସେ ୯୪ ବଲ୍‌ରୁ ୧୨୧ ରନ କରି ଅପରାଜିତ ରହିଥିଲେ। ରୋହିତ ଶର୍ମାଙ୍କ ସହ ଓପନିଂ କରି ଗିଲ୍‌ ୧୩୫ ବଲ୍‌ରୁ ୮୫ ରନ କରିଥିଲେ। କୋହଲିଙ୍କ ଟିମ୍‌କୁ କେବଳ ଅଡୁଆରେ ପକାଇଥିଲେ ଭେଟେରାନ ପେସ୍‌ ବୋଲର ଈଶାନ୍ତ ଶର୍ମା। ସେ ୩୬ ରନ ବିନିମୟରେ ୩ ଉଇକେଟ ଅକ୍ତିଆର କରିଥିଲେ।