ଇନ୍ଧନ ଦର ବୃଦ୍ଧିରୁ ସମସ୍ୟା

ଭୁବନେଶ୍ୱର: ଦେଶରେ କ୍ରମାଗତ ଭାବେ ଇନ୍ଧନ ମୂଲ୍ୟ ବୃଦ୍ଧି ପାଇ ଚାଲିଛି। ଫଳରେ ଏହାର ପ୍ରଭାବ ବିଶେଷ ଭାବେ ପରିବହନ ବ୍ୟବସ୍ଥା ଉପରେ ପଡୁଛି। ପରିବହନ ଯୋଗୁ ପରିବାଠାରୁ ଆରମ୍ଭକରି ସାଧାରଣ ଜୀବନରେ ଆବଶ୍ୟକ ସମସ୍ତ ଅତ୍ୟାବଶ୍ୟକ ସାମଗ୍ରୀ ଦର ମଧ୍ୟ ସେହି ଅନୁପାତରେ ବୃଦ୍ଧି ପାଉଛି। ଏ ସମ୍ପର୍କରେ ବଜାର ବିଶେଷଜ୍ଞଙ୍କ କହିବା କଥା, ୨୦୧୯-୨୦ ଆର୍ଥିକ ବର୍ଷରେ ଉଭୟ ପେଟ୍ରୋଲ ଓ ଡିଜେଲ ଦର ପ୍ରାୟ ୭୩ ଏବଂ ୬୭ ଟଙ୍କାରେ ବିକ୍ରି ହେଉଥିଲା। ଗତ ଦୁଇ ବର୍ଷରେ ତୈଳ ଦର ବ୍ୟାପକ ଭାବେ ବୃଦ୍ଧି ପାଇଛି। ୨୦୧୯-୨୦ରୁ ୨୦୨୦-୨୧ ମଧ୍ୟରେ ପେଟ୍ରୋଲ ପ୍ରାୟ ୧୮ ଟଙ୍କା ବଢ଼ିଥିବା ବେଳେ ଡିଜେଲ ୧୪ ଟଙ୍କା ବୃଦ୍ଧି ପାଇଥିଲା। କିନ୍ତୁ ୨୦୨୧-୨୨ର ଅଦ୍ୟାବଧି ସମୟ ମଧ୍ୟରେ ପେଟ୍ରୋଲ ଉପରେ ଅତିରିକ୍ତ ୬ ଟଙ୍କା ବଢ଼ି ୨୪ ଟଙ୍କାରେ ଏବଂ ଡିଜେଲରେ ୭ ଟଙ୍କା ବୃଦ୍ଧିହୋଇ ୨୧ ଟଙ୍କାରେ ପହଞ୍ଚତ୍ଛି। ଫଳରେ କରୋନା ମହାମାରୀ ଭଳି ମାନ୍ଦାବସ୍ଥାରେ ଖାଉଟିଙ୍କ ପକେଟ ଉପରେ ଭାରି ପଡୁଥିବା ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି। ଦେଶରେ ତୈଳ ମୂଲ୍ୟ ବୃଦ୍ଧି ଯୋଗୁ ବଜାରରେ ପନିପରିବା ଦରଠାରୁ ଆରମ୍ଭ କରି ସମସ୍ତ ଅତ୍ୟାବଶ୍ୟକ ସାମଗ୍ରୀର ଦର ଆକାଶଛୁଅଁା ହୋଇଛି, ଯାହା ଜଣେ ଗରିବ ଓ ମଧ୍ୟବିତ୍ତଙ୍କ ପକ୍ଷେ ଅସମ୍ଭବ ବୋଲି କୁହାଯାଇଛି। ଚଳିତବର୍ଷ ମେ ୪ରୁ ଅଦ୍ୟାବଧି ୨୬ ଥର ପେଟ୍ରୋଲ ଓ ଡିଜେଲ ମୂଲ୍ୟ ବୃଦ୍ଧି ଘଟିଲାଣି। ଫଳରେ ଟ୍ରାନ୍ସପୋର୍ଟରେ ଆସୁଥିବା ପନିପରିବା, ଫଳ ଓ ଅନ୍ୟ ସମସ୍ତ ସାମଗ୍ରୀର ଦର ହୁ ହୁ ହୋଇ ବଢ଼ିବାରେ ଲାଗିଛି।
ରାଜ୍ୟରେ ୨୦୨୦-୨୧ରେ ଯେଉଁସବୁ ଅତ୍ୟାବଶ୍ୟକ ସାମଗ୍ରୀ ଦର ୧୦୦ରୁ ଊର୍ଦ୍ଧ୍ୱ କିମ୍ବା ୧୦୦ ନିକଟବର୍ତ୍ତୀରେ ବିକ୍ରି କରାଯାଉଥିଲା, ବର୍ତ୍ତମାନ ସମୟରେ ସେସବୁ ୧୭୦ରୁ ୨୦୦ ଟଙ୍କାରେ ବିକ୍ରି ହେଉଛି। ଏହାର ପ୍ରମୁଖ କାରଣ ହେଉଛି ଇନ୍ଧନ ଦର ବୃଦ୍ଧି ଏବଂ କେନ୍ଦ୍ର ଓ ରାଜ୍ୟ ସରକାରଙ୍କ ଟିକସ ପରିମାଣ ବୃଦ୍ଧି ସହ ଉପତ୍ାଦନ ହ୍ରାସ ପାଉଛି ବୋଲି ରାଜ୍ୟ ବ୍ୟବସାୟୀ ମହାସଂଘର ମହାସଚିବ ସୁଧାକର ପଣ୍ଡା କହିଛନ୍ତି। ସେହିଭଳି ଯେଉଁସବୁ ପନିପରିବା ବାହାର ରାଜ୍ୟରୁ ଆମଦାନୀ ହେଉଛି ତା’ର ଦର ମଧ୍ୟ ଅନେକାଂଶରେ ବୃଦ୍ଧି ପାଇଛି। ଇନ୍ଧନର ଦର ବୃଦ୍ଧି ଯୋଗୁ ପରିବହନ ଭଡ଼ା ବୃଦ୍ଧି ପାଇଛି। ଏଥିପାଇଁ ଅତ୍ୟାବଶ୍ୟକ ସାମଗ୍ରୀର ଦରରେ ମଧ୍ୟ ପରିବର୍ତ୍ତନ ହେଉଛି। ଆଳୁ, ପିଆଜ, ତେଲ,ମସଲା ଆଦି ବାହାର ରାଜ୍ୟରୁ ଆସୁଥିବାରୁ ସେ ସବୁର ଦର ଆକାଶଛୁଆଁ ହେଉଛି। ଭୁବନେଶ୍ୱରର ବିଭିନ୍ନ ପରିବାହାଟରେ ପରିବା ଦର ଉପରମୁହଁା ରହିଥିବା ବେଳେ ମସଲା ଓ ତୈଳ ଜାତୀୟ ସାମଗ୍ରୀ ଦର ସର୍ବାଧିକ ରହୁଛି ବୋଲି ବ୍ୟବସାୟୀମାନେ ସୂଚନା ଦେଇଛନ୍ତି।