ନୂଆଦିଲ୍ଲୀ,୧୩।୬: କରୋନା ମହାମାରୀ ସଂକ୍ରମଣ ଯୋଗୁ ଭାରତରେ ମୃତ୍ୟୁ ସଂଖ୍ୟା ବୃଦ୍ଧି ପାଉଛି। ଏହା ସରକାରୀ ରିପୋର୍ଟଠାରୁ ୭ ଗୁଣା ଅଧିକ ବୋଲି ବିଦେଶୀ ମିଡ଼ିଆ ଦ ଇକୋନମିଷ୍ଟ୍ରେ ଏକ ଆର୍ଟିକିଲ୍ ପ୍ରକାଶ ପାଇଥିଲା। ତେବେ ଏହାକୁ କେନ୍ଦ୍ର ସରକାରଙ୍କ ପକ୍ଷରୁ ଖଣ୍ଡନ କରାଯାଇଛି। କେନ୍ଦ୍ରୀୟ ସ୍ବାସ୍ଥ୍ୟମନ୍ତ୍ରୀ ଡ. ହର୍ଷ ବର୍ଦ୍ଧନ କୌଣସି ମିଡ଼ିଆର ନାମ ନ ନେଇ କହିଛନ୍ତି ଯେ, ଏଭଳି ତଥ୍ୟ ସମ୍ପୂର୍ଣ୍ଣ କପୋଳକଳ୍ପିତ। ଏଥିରେ ସତ୍ୟତା ହିଁ ନାହିଁ। ମହାମାରୀର ବୈଜ୍ଞାନିକ ଆଧାରରେ ରିପୋର୍ଟରେ ତଥ୍ୟ ପ୍ରଦାନ କରାଯାଇ ନ ଥିବା ସେ କହିଛନ୍ତି। ପ୍ରକାଶିତ ରିପୋର୍ଟ କେଉଁ ପଦ୍ଧତି ଆଧାରରେ ପ୍ରକାଶିତ ହୋଇଛି ତାହା ଉଲ୍ଲେଖ କରାଯାଇ ନ ଥିବା ହର୍ଷ ବର୍ଦ୍ଧନ କହିଛନ୍ତି। ସେହିପରି ଏଥିରେ ତେଲଙ୍ଗାନା ବୀମା କ୍ଲେମ୍କୁ ଆଧାର ଭାବେ ଗ୍ରହଣ କରାଯାଇଛି। ଯାହାକି କୌଣସି ବୈଜ୍ଞାନିକ ଆଧାର ନୁହେଁ ବୋଲି ସେ କହିଛନ୍ତି। ନିର୍ବାଚନ ସର୍ଭେ କରୁଥିବା ସି-ଭୋଟର ସଂସ୍ଥାର ତଥ୍ୟକୁ ଗ୍ରହଣ କରାଯାଇଛି। ଏଭଳି ସଂସ୍ଥାର ସ୍ବାସ୍ଥ୍ୟ କ୍ଷେତ୍ରରେ କୌଣସି ଅଭିଜ୍ଞତା ନାହିଁ। ସେହିପରି ରିପୋର୍ଟରେ ମୃତ୍ୟୁ ସଂଖ୍ୟା ୭ଗୁଣା ହୋଇଥିବା ନେଇ ଅନୁମାନ କରାଯାଇଥିବା ଉଲ୍ଲେଖ କରାଯାଇଛି। ତେଣୁ ଏହି ରିପୋର୍ଟ ବିଶ୍ୱାସଯୋଗ୍ୟ ନୁହେଁ ବୋଲି ହର୍ଷବର୍ଦ୍ଧନ କହିଛନ୍ତି। ଏହା ଲୋକଙ୍କୁ ଭ୍ରମିତ କରିବା ଲକ୍ଷ୍ୟ ନେଇ କରାଯାଇଥିବା l ଭାରତ ସରକାର ଆଇସିଏମ୍ଆର୍ ଏବଂ ବିଶ୍ୱସ୍ବାସ୍ଥ୍ୟ ସଂଗଠନ ଦ୍ୱାରା ନିର୍ଦ୍ଧାରିତ ମାର୍ଗଦର୍ଶିକା ପାଳନ କରୁଥିବା ସେ କହିଛନ୍ତି।
