ସେଣ୍ଟ ପିଟର୍ସବର୍ଗ, ୧୭।୬- ଆଲେକ୍ସି ମିରାନଚୁକ୍ଙ୍କ ଗୋଲ ବଳରେ ରୁଷିଆ ଚଳିତ ୟୁରୋ ଫୁଟ୍ବଲ ଚାମ୍ପିୟନଶିପ୍ରେ ବିଜୟ ସ୍ବାଦ ଚାଖିଛି। ବୁଧବାର ଅନୁଷ୍ଠିତ ମ୍ୟାଚରେ ରୁଷିଆ ୧-୦ ଗୋଲରେ ଫିନ୍ଲାଣ୍ଡକୁ ପରାସ୍ତ କରିଛି। ମ୍ୟାଚର ୪୫+୨ମିନିଟରେ ରୁଷିଆ ପକ୍ଷରୁ ମିରାନଚୁକ୍ ଏକମାତ୍ର ଗୋଲଟି ସ୍କୋର କରିଥିଲେ। ଗ୍ରୁପ୍ ‘ବି’ରେ ୨ ମ୍ୟାଚରୁ ରୁଷିଆର ଏହା ପ୍ରଥମ ବିଜୟ। ପୂର୍ବ ମ୍ୟାଚରେ ଦଳ ୦-୩ ଗୋଲରେ ବେଲଜିୟମଠାରୁ ପରାଜିତ ହୋଇଥିଲା। ରୁଷିଆ ଏହାର ଶେଷ ଲିଗ୍ ମ୍ୟାଚରେ ଡେନ୍ମାର୍କକୁ ୨୧ ତାରିଖରେ ଭେଟିବ। ସେହିଦିନ ଫିନ୍ଲାଣ୍ଡ ଓ ବେଲଜିୟମ ମଧ୍ୟରେ ମୁକାବିଲା ହେବ। ପୂର୍ବ ମ୍ୟାଚରେ ଡେନ୍ମାର୍କକୁ ୧-୦ ଗୋଲରେ ହରାଇଥିବାରୁ ଫିନ୍ଲାଣ୍ଡ ମଧ୍ୟ ରୁଷିଆ ସମକକ୍ଷ ୩ ପଏଣ୍ଟ ପାଇଛି।
