ମ୍ୟାଚ୍‌ର ପ୍ରଥମ ବଲ୍‌ ସାମ୍ନା କରିବାକୁ ଭୟ କରୁଛନ୍ତି ଶୁଭମନ୍‌: ଜାଣନ୍ତୁ କାହିଁକି

ବିରାଟ କୋହଲିଙ୍କ ନେତୃତ୍ୱରେ ଟିମ ଇଣ୍ଡିଆ ଜୁନ ୧୮ ରୁ ୨୨ ପର୍ଯ୍ୟନ୍ତ ବିଶ୍ୱ ଟେଷ୍ଟ ଚାମ୍ପିଅନସିପର ଐତିହାସିକ ଫାଇନାଲ ମ୍ୟାଚ ନ୍ୟୁଜିଲାଣ୍ଡ ବିପକ୍ଷରେ ଖେଳିବା ପାଇଁ ସାଉଥମ୍ପଟନ ଗ୍ରାଉଣ୍ଡରେ ଅବତରଣ କରିବ। ଏହି ସମୟ ମଧ୍ୟରେ ଯୁବ ବ୍ୟାଟ୍ସମ୍ୟାନ ଶୁଭମନ ଗିଲଙ୍କ ଉପରେ ନଜର ରହିବ। ଯୁବ ବ୍ୟାଟ୍ସମ୍ୟାନ ତାଙ୍କର ଛୋଟ ଅନ୍ତର୍ଜାତୀୟ କ୍ୟାରିୟରରେ ଅନେକ କ୍ରିକେଟ ବିଶେଷଜ୍ଞଙ୍କୁ ପ୍ରଭାବିତ କରିଛନ୍ତି ଏବଂ ଆଶା କରାଯାଉଛି ଯେ ସେ ଐତିହାସିକ ଫାଇନାଲରେ ଅଂଶଗ୍ରହଣ କରିବାର ସୁଯୋଗ ପାଇବେ। ନ୍ୟୁଜିଲାଣ୍ଡର ଭେଟେରାନ ବୋଲର ଟ୍ରେଣ୍ଟ ବୋଲ୍ଟ ଏବଂ ଟିମ ସାଉଥୀ ନୂତନ ରେଡ ବଲରୁ ଆରମ୍ଭ କରିବେ ଏବଂ ଗିଲ୍‌ ପ୍ରଥମ ବଲ ମୁକାବିଲା କରିବାକୁ ଚାହଁୁନାହାନ୍ତି। ତାଙ୍କ ଟେଷ୍ଟ କ୍ୟାରିୟରରେ କେବଳ ଥରେ ଗିଲ ପ୍ରଥମ ବଲର ସମ୍ମୁଖୀନ ହୋଇଛନ୍ତି । ଚଳିତ ବର୍ଷ ଆରମ୍ଭରେ ଅହମ୍ମଦାବାଦରେ ଖେଳାଯାଇଥିବା ଇଂଲଣ୍ଡ ବିପକ୍ଷ ଚତୁର୍ଥ ଟେଷ୍ଟରେ ସେ ଏହା କରିଥିଲେ। ସେହି ମ୍ୟାଚରେ ଗିଲଙ୍କୁ ତୃତୀୟ ଇନ୍‌ସ୍ବିଙ୍ଗ ବଲରେ ଜେମ୍ସ ଆଣ୍ଡରସନ ତାଙ୍କ ଏଲ୍‌ବିଡବ୍ଲ୍ୟୁ ଆଉଟ୍‌ କରିଥିଲେ।
ତାଙ୍କର ସେହି ଉଇକେଟକୁ ମନେ ପକାଇ ୨୧ ବର୍ଷୀୟ ଓପନର୍‌ ଗିଲ୍‌ କହିଛନ୍ତି ଯେ, ସେ ମ୍ୟାଚ୍‌ର ପ୍ରଥମ ବଲ୍‌ ମୁକାବିଲା କରିବାକୁ କିଛିଟା ଭୟ କରନ୍ତି। କିନ୍ତୁ ଅହମ୍ମଦାବାଦ ଟେଷ୍ଟରେ ଗିଲ ପ୍ରଥମ ବଲ୍‌ ଖେଳିବାକୁ ନିଷ୍ପତ୍ତି ନେଇଥିଲେ ଏବଂ ପରେ ତାଙ୍କ ନିଷ୍ପତ୍ତିରେ ଅନୁତାପ କରିଥିଲେ। ତେଣୁ ଆଗକୁ ପ୍ରଥମ ବଲ୍‌ ଖେଳିବାକୁ କିଛିଟା ଭାବିବାକୁ ପଡିବ ବୋଲି ସେ କହିଛନ୍ତି।