ସ୍ପେନ୍‌- ସ୍ବିଡେନ ମ୍ୟାଚ୍‌ ଗୋଲ ଶୂନ୍ୟ

ସେଭିଲେ,୧୬।୬: ୟୁରୋକପ୍‌ରେ ଗ୍ରୁପ୍‌ ଇ’ରେ ସୋମବାର ସ୍ପେନ୍‌ ଓ ସ୍ବିଡେନ ପରସ୍ପରକୁ ଭେଟିଥିଲେ। କଡ଼ା ସଂଘର୍ଷପୂର୍ଣ୍ଣ ଏହି ମ୍ୟାଚ୍‌ ଗୋଲ ଶୂନ୍ୟ ଭାବେ ଶେଷ ହେବା ସହ ଅମୀମାଂସିତ ରହିଥିଲା। ସ୍ଥାନୀୟ ଲା କାର୍ଟୁଜା ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍‌ରେ ଅବଶ୍ୟ ସ୍ବିଡେନ କେତୋଟି ସୁଯୋଗ ସୃଷ୍ଟି କରିଥିଲେ ମଧ୍ୟ ଗୋଲ ସ୍କୋର କରିପାରି ନ ଥିଲା। ଆଲେକଜାଣ୍ଡର ଇସାକ ଚମତ୍କାର ପ୍ରଦର୍ଶନ କରିଥିଲେ।
ଏହାପୂର୍ବରୁ ସ୍ପେନ୍‌-ପର୍ତ୍ତୁଗାଲ ଓ୍ବାର୍ମଅପ୍‌ ମ୍ୟାଚ୍‌ ମଧ୍ୟ ଗୋଲ ଶୂନ୍ୟ ଭାବେ ଡ୍ର ରହିଥିଲା। ସ୍ପେନ୍‌ ଘନଘନ ଆକ୍ରମଣ କରିଥିଲା। ବଲ୍‌ ପଜେଶନ, ପାସ୍‌ ଓ ପାସ୍‌ ଆକ୍ୟୁରେସିରେ ସ୍ପେନ୍‌ ଯଥେଷ୍ଟ ଆଗରେ ରହିଥିଲେ ମଧ୍ୟ ଏହାର ଫାଇଦା ଉଠାଇପାରି ନ ଥିଲା। ୭୫ ପ୍ରତିଶତ ବଲ୍‌ ପଜେଶନ ସହ ସ୍ପେନ୍‌ ୧୭ଟି ଗୋଲ ପ୍ରୟାସ କରିଥିଲା। ଏଥିମଧ୍ୟରୁ ୫ଟି ପୂରା ଗୋଲ ପୋଷ୍ଟ ଉପରେ ଟାର୍ଗେଟ ହୋଇଥିଲା। ମ୍ୟାଚ୍‌ ଫଳାଫଳ ନିଶ୍ଚିତ ଭାବେ ସ୍ପେନ୍‌କୁ ନିରାଶ କରିଛି। ୟୁରୋକପ୍‌ରେ ସ୍ପେନ ତା’ର ଶେଷ ୧୪ଟି ମ୍ୟାଚ୍‌ରେ ଗୋଲ ଦେବାରେ ବିଫଳ ହୋଇଛି। ଅନ୍ୟପଟେ ସ୍ବିଡେନ ତା’ର ଶେଷ ୧୭ଟି ମ୍ୟାଚ୍‌କୁ ଡ୍ର ରଖିନାହିଁ। ୨୦୨୦ ୟୁରୋ କ୍ୱାଲିଫାଇଂରେ ସ୍ପେନ୍‌ ବିପକ୍ଷରେ ସ୍ବିଡେନ ମ୍ୟାଚ୍‌ ଡ୍ର ରଖିଥିଲା। ଏହି ମ୍ୟାଚ୍‌ରେ ୧୨,୫୧୭ ଦର୍ଶକ ଉପସ୍ଥିତ ଥିଲେ। ଶନିବାର ସ୍ପେନ ତା’ର ପରବର୍ତ୍ତୀ ମ୍ୟାଚ୍‌ରେ ପୋଲାଣ୍ଡକୁ ଓ ୨୩ ତାରିଖରେ ସ୍ଲୋଭାକିଆକୁ ଭେଟିବ।
୨୦୦୪ ପରେ ସ୍ବିଡେନ ୟୁରୋକପ୍‌ରେ କେବେ ବି ଗ୍ରୁପ୍‌ ପର୍ଯ୍ୟାୟ ପାର କରିପାରିନାହିଁ। ସ୍ବିଡେନ ଶୁକ୍ରବାର ସ୍ଲୋଭାକିଆକୁ ସେଣ୍ଟ ପିଟର୍ସବର୍ଗରେ ଭେଟିବ ଓ ପରେ ପୋଲାଣ୍ଡକୁ ଭେଟିବ। କୋଭିଡ୍‌-୧୯ କାରଣରୁ ଉଭୟ ଦଳରେ କେତେକ ତାରକା ଖେଳାଳି ସ୍ଥାନ ପାଇନାହାନ୍ତି।