ପ୍ରଭାବିତ ହେବନି କୃଷି କ୍ଷେତ୍ର

ନୂଆଦିଲ୍ଲୀ: କରୋନା ଦ୍ୱିତୀୟ ଲହର ଯୋଗୁ ଦେଶର କୃଷି କ୍ଷେତ୍ର ଉପରେ କୌଣସି ପ୍ରତିକୂଳ ପ୍ରଭାବ ପଡିବ ନାହିଁ ବୋଲି ନୀତି ଆୟୋଗ ସଦସ୍ୟ ରମେଶ ଚାନ୍ଦ ରବିବାର କହିଛନ୍ତି। ଏକ ସାକ୍ଷାତ୍‌କାରରେ ସେ କହିଛନ୍ତି, ମେ ମାସରେ ଦେଶର ଗ୍ରାମାଞ୍ଚଳଗୁଡିକରେ ସଂକ୍ରମଣ ବ୍ୟାପିଥିଲା। ଏହି ମାସରେ କୃଷି ସମ୍ପର୍କିତ କାର୍ଯ୍ୟକଳାପ ବହୁତ କମ୍‌ ହୋଇଥାଏ। ବର୍ତ୍ତମାନ ଭାରତର ନୀତି ଧାନ, ଗହମ ଏବଂ ଆଖୁ ଭଳି ଫସଲ ଲାଗି ବିଶେଷ ଭାବେ ଉଦ୍ଦିଷ୍ଟ ରହୁଛି। ଏ କ୍ଷେତ୍ରରେ ସବସିଡି, ମୂଲ୍ୟ ଏବଂ ଟେକ୍ନୋଲୋଜିକୁ ଗୁରୁତ୍ୱ ଦିଆଯାଉଛି। ଡାଲି ଜାତୀୟ ଫସଲ ଉପରେ ସରକାର ଧ୍ୟାନ କେନ୍ଦ୍ରିତ କରିବା ସହ ସଂଗ୍ରହ ଏବଂ ସର୍ବନିମ୍ନ ସହାୟକ ମୂଲ୍ୟ(ଏମ୍‌ଏସ୍‌ପି) ଉପରେ ଧ୍ୟାନ ଦେବାର ଆବଶ୍ୟକତା ରହିଛି।
ସେ ପୁଣି କହିଛନ୍ତି, ମେ ମାସରେ ଫସଲ ବୁଣିବା କିମ୍ବା କାଟିବା ଭଳି କାମ ହୋଇ ନ ଥାଏ। ଅଫ୍‌ ସିଜନ ଫସଲ ଏହି ସମୟରେ ହୋଇଥାଏ। ମାର୍ଚ୍ଚ କିମ୍ବା ଏପ୍ରିଲ ମଧ୍ୟ ଭାଗ ଯାଏ କୃଷି କାର୍ଯ୍ୟକଳାପ ଶୀର୍ଷରେ ରହିଥାଏ। ଏହା ପରବର୍ତ୍ତୀ ସମୟରେ ଏଥିରେ ହ୍ରାସ ପରିଲକ୍ଷିତ ହୋଇଥାଏ। ମୌସୁମୀ ଆସିବା ପରେ କୃଷି କାର୍ଯ୍ୟକଳାପ ପୁଣି ଥରେ ବୃଦ୍ଧି ହୋଇଥାଏ। ଏଭଳି ସ୍ଥିତିରେ ମେ ମାସରୁ ଜୁନ୍‌ ମଧ୍ୟଭାଗ ଯାଏ ଶ୍ରମିକଙ୍କ ଉପଲବ୍ଧତା କମ୍‌ ରହିଥାଏ ତେବେ କୃଷି କ୍ଷେତ୍ର ଉପରେ କୌଣସି ପ୍ରଭାବ ପରିଲକ୍ଷିତ ହୋଇ ନ ଥାଏ।