ମୁହଁରେ ବଲ୍‌ ବାଜିବାରୁ ବ୍ୟାଟ୍ସମ୍ୟାନ୍‌ଙ୍କ ପଡିଲା ୭ ଷ୍ଟିଚ୍‌

କରୋନା କାରଣରୁ ସ୍ଥଗିତ ରଖାଯାଇଥିବା ପାକିସ୍ତାନ ସୁପର ଲିଗ (ପିଏସଏଲ)ର ଏହି ସିଜିନର ଅବଶିଷ୍ଟ ମ୍ୟାଚ ବୁଧବାରଠାରୁ ଆରମ୍ଭ ହେଉଛି। କିନ୍ତୁ ଏହାପୂର୍ବରୁ ଲାହୋର କଲନ୍ଦର୍ସ ଦଳକୁ ଏକ ବଡ଼ ଝଟ୍‌କା ଲାଗିଛି। ଅଭ୍ୟାସ ସମୟରେ ଦଳର ଷ୍ଟାର ବିଦେଶୀ ଖେଳାଳି ବେନ ଡଙ୍କ୍‌ ଗୁରୁତର ଆହତ ହୋଇଛନ୍ତି। ତାଙ୍କର ଓଠ ଅସ୍ତ୍ରୋପଚାର କରାଯାଇଛି। କ୍ୟାଚ ନେବାକୁ ଚେଷ୍ଟା କରୁଥିବାବେଳେ ବଲ ତାଙ୍କ ମୁହଁରେ ବାଜିଥିଲା। ଫଳରେ ସେ ଗୁରୁତର ଆହତ ହୋଇଥିଲେ।
ତାଙ୍କ ମୁହଁରେ ୭ଟି ଷ୍ଟିଚ୍‌ ପଡିଛି । ଫ୍ରାଞ୍ଚାଇଜ୍‌ ସିଇଓ ସାମିନ ରାଣା କହିଛନ୍ତି ଯେ, ଡଙ୍କ ଶୀଘ୍ର ଭଲ ହୋଇଯିବେ। ଏହି ସପ୍ତାହ ପରେ ଦଳ ପାଇଁ ତାଙ୍କର ପ୍ରଥମ ମ୍ୟାଚ ଖେଳିବେ ବୋଲି ଆଶା କରାଯାଉଛି ବୋଲି ସେ କହିଛନ୍ତି। ୩୪ ବର୍ଷୀୟ ଉଇକେଟ କିପର ବ୍ୟାଟ୍ସମ୍ୟାନ ଡଙ୍କ ଜୁନ ୬ ରେ ଇନଷ୍ଟାଗ୍ରାମରେ ଏକ ଭିଡିଓ ପୋଷ୍ଟ କରିଥିଲେ। ଭିଡିଓରେ ତାଙ୍କର ଅଭ୍ୟାସ ଏବଂ ଆଘାତ ପରେ ଚିକିତ୍ସାର ଫଟୋ ରହିଥିଲା।