ଗୋପନୀୟତା କ୍ଷୁଣ୍ଣ ଦର୍ଶାଇ ଆବେଦନ ରଦ୍ଦ କଲେ ହାଇକୋର୍ଟ

କଟକ ଅଫିସ, ୧୫।୬: କରୋନାରେ ସଂକ୍ରମିତ ରୋଗୀଙ୍କ ସମ୍ପର୍କରେ ଅଧିକ ତଥ୍ୟ ଜାଣିବା ପାଇଁ କୋଭିଡ୍‌ ହସ୍ପିଟାଲରେ ସିସିଟିଭି କ୍ୟାମେରା ସହ ହସ୍ପିଟାଲ ପରିସରରେ ଡିସ୍‌ପ୍ଲେ ବୋର୍ଡ ଲଗାଇବାକୁ ଭାରତୀୟ ବିକାଶ ପରିଷଦ ପକ୍ଷରୁ ଆଗତ ଜନସ୍ବାର୍ଥ ମାମଲା ଖାରଜ ହୋଇଛି। ହାଇକୋର୍ଟ ମୁଖ୍ୟ ବିଚାରପତି ଏସ୍‌.ମୁରଲୀଧର ଏବଂ ବିଚାରପତି କେ. ଆର୍‌. ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ଏହି ଆବେଦନର ଶୁଣାଣି କରି କହିଛନ୍ତି, ହସ୍ପିଟାଲଗୁଡ଼ିକରେ ସିସିଟିଭି ଲଗାଇବା ଦ୍ୱାରା ରୋଗୀଙ୍କ ଗୋପନୀୟତା କ୍ଷୁଣ୍ଣ ହେବାର ଯଥେଷ୍ଟ ସମ୍ଭାବନା ରହିଛି। ସମସ୍ତ ବିଷୟକୁ ଅନୁଧ୍ୟାନ ନ କରି କେବଳ ଉପର ଠାଉରିଆ ଭାବେ ଏଭଳି ଆବେଦନ କରାଯାଇଛି। ଆବେଦନକାରୀ କିମ୍ବା ତାଙ୍କ ଓକିଲ ମାମଲା ରୁଜୁ କରିବା ପୂର୍ବରୁ ଜଣେ ରୋଗୀଙ୍କ ଗୋପନୀୟତା କ୍ଷୁଣ୍ଣ ସମ୍ପର୍କିତ ବାସ୍ତବ ସ୍ଥିତିକୁ ବିଶ୍ଲେଷଣ କରିନାହାନ୍ତି ବୋଲି ଖଣ୍ଡପୀଠ ଉଲ୍ଲେଖ କରିଛନ୍ତି। ଏପରି କି ଅବସରପ୍ରାପ୍ତ ବିଚାରପତି କେ.ଏସ୍‌. ପୁଟ୍ଟାସ୍ବାମୀ ବନାମ କେନ୍ଦ୍ର ସରକାରଙ୍କ ମାମଲାରେ ଗୋପନୀୟତାର ସାମ୍ବିଧାନିକ ଅଧିକାର ସମ୍ପର୍କରେ ସୁପ୍ରିମକୋର୍ଟ ଦେଇଥିବା ରାୟକୁ ଆବେଦନକାରୀ ବୁଝିବାକୁ ଚେଷ୍ଟା କରି ନାହାନ୍ତି। କୌଣସି ପ୍ରସଙ୍ଗରେ ପୁଙ୍ଖାନୁପୁଙ୍ଖ ଅନୁଧ୍ୟାନ ନ କରାଯାଇ ଆବେଦନ କରାଯିବାକୁ ଖଣ୍ଡପୀଠ ନାପସନ୍ଦ କରିଛନ୍ତି। ଜନସ୍ବାର୍ଥ ମାମଲା ସମ୍ବନ୍ଧିତ ଆବେଦନର ବିଚାର କରିବା ନେଇ ସମ୍ବିଧାନର ଧାରା ୨୨୬ରେ ହାଇକୋର୍ଟଙ୍କ ପର୍ଯ୍ୟାପ୍ତ କ୍ଷମତା ରହିଛି। କିନ୍ତୁ ଆବେଦନକାରୀ ଉପଯୁକ୍ତ ତଥ୍ୟ ଏବଂ ଘଟଣାବଳୀକୁ ଉଚିତ ଢଙ୍ଗରେ ଅଦାଲତରେ ଉପସ୍ଥାପନା କରିବା ଆବଶ୍ୟକ। ଅଧିକାଂଶ ସମୟରେ ଆବେଦନକାରୀ କୌଣସି ବିଷୟବସ୍ତୁକୁ ଠିକ୍‌ ଭାବେ ନ ବୁଝି କୋର୍ଟଙ୍କ ଦ୍ୱାରସ୍ଥ ହୋଇଥାନ୍ତି, ଯାହାକି ସମାଜ ପାଇଁ ଭଲ କରିବା ପରିବର୍ତ୍ତେ କ୍ଷତି ପହଞ୍ଚାଇଥାଏ ବୋଲି ଖଣ୍ଡପୀଠ କହିଛନ୍ତି।