ମଲ୍‌ ଖୋଲିବାକୁ ମୁଖ୍ୟମନ୍ତ୍ରୀଙ୍କୁ ଅନୁରୋଧ କଲା ଏସ୍‌ସିଏଆଇ

ଭୁବନେଶ୍ୱର: କରୋନା ମହାମାରୀରେ ନିୟନ୍ତ୍ରଣ ଓ ସୁରକ୍ଷିତ ଭାବେ ମଲ୍‌ଗୁଡ଼ିକୁ ଖୋଲିବା ଲାଗି ରାଜ୍ୟ ସରକାରଙ୍କ ଅନୁମତି ପ୍ରଦାନ ପାଇଁ ଶପିଂ ସେଣ୍ଟର ଆସୋସିଏଶନ ଅଫ୍‌ ଇଣ୍ଡିଆ (ଏସ୍‌ସିଏଆଇ) ପକ୍ଷରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହସ୍ତକ୍ଷେପ ଲୋଡ଼ାଯାଇଛି। ଏଭଳି ଏକ ଗୁରୁତ୍ୱର ବିଷୟକୁ ସଂଘ ମୁଖ୍ୟମନ୍ତ୍ରୀଙ୍କ ଦୃଷ୍ଟିଗୋଚର ସହ ଏ ସମ୍ପର୍କିତ ସମସ୍ତ ସୂଚନା ତାଙ୍କୁ ଅବଗତ କରାଯାଇଛି। ମଲ୍‌ଗୁଡ଼ିକ ପକ୍ଷରୁ ଆବଶ୍ୟକ ପଦକ୍ଷେପ ସହ ଶ୍ରମଶକ୍ତିଙ୍କୁ ଭଲ ଭାବେ ପ୍ରଶିକ୍ଷଣ ଦିଆଯାଇଛି। ସେହିଭଳି ମଲ୍‌ଗୁଡିକୁ ନିୟମିତ ବ୍ୟବଧାନରେ ସଫେଇ ଓ ବିଶୋଧନ କରାଯିବ ବୋଲି ସଂଘ ପକ୍ଷରୁ କୁହାଯାଇଛି। ବର୍ତ୍ତମାନ ସମୟରେ ଉକ୍ତ ଶିଳ୍ପର ବିଭିନ୍ନ ସମସ୍ୟା ସମ୍ପର୍କରେ ଏସ୍‌ସିଏଆଇ ଅଧ୍ୟକ୍ଷ ମୁକେଶ କୁମାର କହିଛନ୍ତି, ମହାମାରୀ ଫଳରେ ସଙ୍ଗଠିତ ଖୁଚୁରା କ୍ଷେତ୍ର ଗୁରୁତର ଭାବେ ପ୍ରଭାବିତ ହୋଇଛି। ଏହାର କିପରି ଉଦ୍ଧାର ହୋଇପାରିବ ସେ ସମ୍ପର୍କରେ ସରକାରଙ୍କ ପକ୍ଷରୁ ତତ୍କାଳ ପଦକ୍ଷେପ ଗ୍ରହଣ ସହ ଆବଶ୍ୟକ ସହାୟତା ପାଇଁ ସଂଘ ଆଶା କରୁଛି। ସରକାରଙ୍କ ସମସ୍ତ କୋଭିଡ୍‌ ଗାଇଡ୍‌ଲାଇନ ପାଳନ ସହ ପ୍ରଶିକ୍ଷିତ ଶ୍ରମ ଶକ୍ତି ଏବଂ ସମ୍ବଳ ଜରିଆରେ ମଲ୍‌ ଖୋଲିବା ପାଇଁ ଆଶା ରହିଛି। ମଲ୍‌ ହିଁ ଏକମାତ୍ର ସ୍ଥାନ ଯେଉଁଠାରେ ପରିଦର୍ଶନକାରୀଙ୍କ ସୁରକ୍ଷା ଓ ସ୍ବଚ୍ଛ ପରିବେଶକୁ ନିଶ୍ଚିତ କରାଯାଇପାରିବ। ଯେହେତୁ ଆର୍ଥିକ ବୋଝ ଅସହ୍ୟ ହେଲାଣି ତେଣୁ ମଲ୍‌ ଖୋଲିବା ଲାଗି ଆମକୁ ଅନୁମତି ଦେବାକୁ ସରକାରଙ୍କୁ ଅନୁରୋଧ କରୁଛୁ ବୋଲି କୁମାର କହିଛନ୍ତି। ରାଜ୍ୟ ସରକାର ସାମୁଦ୍ରିକ ବାତ୍ୟା ୟାସ୍‌ ଓ କୋଭିଡ୍‌-୧୯ର ସଫଳ ମୁକାବିଲା କରିଥିବାରୁ ଏସ୍‌ସିଏଆଇ ପକ୍ଷରୁ ଓଡ଼ିଶା ସରକାରଙ୍କୁ ପ୍ରଶଂସା କରାଯାଇଛି। ବର୍ତ୍ତମାନ ସମୟରେ ଏସ୍‌ସିଏଆଇ ଅଧୀନରେ ୬୫୦ରୁ ଊର୍ଦ୍ଧ୍ୱ ବଡ଼ ମଲ୍‌ ଏବଂ ଏକ ଲକ୍ଷ ବର୍ଗଫୁଟରୁ କମ୍‌ ସ୍ଥାନରେ ସ୍ଥାପନ ହୋଇଥିବା ୧୦୦୦ରୁ ଅଧିକ ମଲ୍‌ ସଦସ୍ୟ ରହିଛନ୍ତି।